O Faamanuiaga o le Sefuluai

O le faamoemoega o le Atua i le tuuina mai o poloaiga, ia faamanuia ai i tatou. E finagalo o Ia e tuuina mai ia i tatou le ola e faavavau, o le meaalofa silisili o Ana meaalofa uma (tagai i le MFF 14:7). Ina ia maua le meaalofa o le nonofo faatasi ma Ia e faavavau i ni aiga i le malo selesitila, e tatau ona tatou ola i tulafono o lena malo (tagai i le MFF 88:22).

Ua Ia tuuina mai ia i tatou ni poloaiga i lenei olaga e fesoasoani ia i tatou e atiina ae ai lena agavaa. O le tulafono o le sefuluai o se tasi lea o na poloaiga sauniuni. O le tulafono tatou te tuuina atu ai i le Alii le tasi vae-sefulu o a tatou tupe maua uma. E faigofie lava e oo a i se tamaitiiti e mafai ona malamalama ai. Na ou vaai i tamaiti o tuuina atu i se epikopo se teutusi o le sefuluai o loo i ai ni tupe siliva, o le tasi vae-sefulu lea o a latou tupe na maua.

O se tasi o faamanuiaga e maua mai i le totogiina atoa o se sefuluai o le atiina ae lea o le faatuatua e ola i se tulafono maualuga atu. Ina ia nofo ai i le malo selesitilia, e tatau ona tatou ola i le tulafono o le faapaiaga. O iina e tatau ona tatou lagona ai o i tatou uma ma mea uma ua tatou maua e a le Atua lea.

E le itiiti ifo ma le tolu ni auala e saunia ai i tatou i lenei olaga e ala i le totogiina o se sefuluai atoa ia lagonaina mea e manaomia ona tatou lagona, e maua ai le meaalofa o le ola e faavavau.

Muamua, pe a totogiina a tatou sefuluai i le Ekalesia, e liligi mai e le Tama Faalelagi ia faamanuiaga i o tatou luga. Soo se tasi lava o loo totogiina atoa e le aunoa le sefuluai na te iloa e moni lenei mea. O nisi taimi o faamanuiaga e faaleagaga a o nisi taimi e faaletino. E tuuina mai i le taimi o le Alii ma e tusa ai ma mea e Na te silafia e sili ona lelei mo i tatou.

Pe a oo mai na faamanuiaga, o le a faateleina lo tatou faatuatua o le Atua, o le puna lea o mea uma e lelei i o tatou olaga. O le a faigofie ona iloa o le faapaiaina e iloagofie ai le upumoni o foafoaga uma a le Atua o Ana lava. Tatou te lagona ai le agaga faafetai ona ua na o le 10 pasene o mea ua ia tuuina mai ia i tatou, ua poloai mai ai. O lea la ua tatou saunia lelei ai e ola i le tulafono o le faapaiaga pe a poloaiina ai i tatou.

Lona lua, o i tatou uma lava o e na totogiina atoa e le aunoa le sefuluai e lagonaina le faamautinoaga maoae i le ole atu i le Atua mo mea e manaomia e i tatou ma o tatou aiga. Ua Ia folafola mai faamanuiaga e silisili atu nai lo mea ua tatou maua pe a tatou faamaoni i a tatou feagaiga e totogi a tatou sefuluai (tagai Malaki 3:10). O lea la, o se tasi o faamanuiaga sili o le sefuluai o le talitonu i mea o le a tutupu i le lumanai. Po o le a lava o tatou tulaga, o le a galulue mea uma mo lo tatou lelei. Pe a tausia a tatou folafolaga, o le a Ia tausia foi Lana vaega. O se tasi o faamanuiaga sili o le totogiina atoa o le sefuluai o le lagonaina lea o le filemu. E mafai e i latou o e na tausia le poloaiga o le sefuluai ona molimau mai i le moni ma le taua o le faamanuiaga o le filemu.

Lona tolu, e lagonaina e i latou o e na totogiina le sefuluai le faateleina o lo latou alofa i le Atua ma fanau uma a le Atua. O lena faateleina o le alofa e sau mai le iloaina lea o le auala e faaaoga ai e le Tama ia sefuluai lea tatou te ofoina atu ina ia faamanuiaina ai tagata i lenei lalolagi ma le faavavau.

E ala atu i Ana auauna ua faatagaina, e Na te taulimaina ai ia sefuluai ma le faaeteetega tele. E fesoasoani le tagata totogi sefuluai i le Alii i le fausiaina o malumalu, lea e mafai ona faamau ai e faavavau ia aiga. E fesoasoani ia te Ia le tagata totogi sefuluai i le auina atu o le talalelei i tagata i soo se nofoaga. E fesoasoani ia te Ia le tagata totogi sefuluai i le faaitiitia o le fiaai ma le puapuagatia i Lana lava ala e ala atu i Ana auauna. E mafai ona tau atu e soo se tasi o na auauna ia te oe le auala na faateleina ai le alofa ona sa faaaogaina le sefuluai e faamanuia ai tagata. Ma e faapea foi i le tagata totogi sefuluai ma le faamaoni.

O le faatalanoaga o le sefuluai e faia i ni masina i le lumanai. Ou te tatalo atu ina ia outou amata nei ona fuafua ma saunia ma o outou aiga ina ia agavaa mo faamanuiaga e liligi mai e le Atua ia i latou uma o e tautino atu ia te Ia, o i latou o ni tagata e totogi atoa le sefuluai.