Fesili & Tali
“Pe faapefea ona ou iloa pe afai o ou luitau ua fuafuaina e fesoasoani ia avea au ma se tagata e sili atu po o se auala a le Tama Faalelagi e lapatai ai au o loo sese le auala o loo ou agai i ai?”
E mafai ona fesoasoani tofotofoga e avea ai oe ma se tagata sili atu—tusa lava po o le a le mafuaaga—pe afai e te faaaogaina e tuputupu ae ai faaleagaga.
O le a ta’u atu e lou mafaufau pe afai o loo sese le auala o loo e agai i ai. Afai e le lelei ou lagona i se mea na e faia, tatalo i le Tama Faalelagi ma aioi atu mo Lana faamagaloga. Taumafai e foia soo se faafitauli na e faia. E mafai foi ona e saili se fautuaga mai ou matua ma taitai perisitua. O nei laasaga o le a fesoasoani ia lelei atili ai ou lagona ma toe tuuina oe i le auala sao.
E mafai foi ona fesoasoani ia tofotofoga e le o ni taunuuga o se agasala e avea ai oe ma se tagata sili atu. O nei ituaiga tofotofoga e mafai ona suesue ai lou faatuatua po o le onosai po o le mafai ai foi ona e aoao e uiga ia te oe lava. Ina ia faaaoga nei tofotofoga mo lou tuputupu ae, fesili ia te oe lava ia po o a ni mea e mafai ona e aoao mai ai ae po o a foi ni mea e mafai ona e faia ia sili atu.
E mafai ona faamalosia lou faatuatua i taimi o tofotofoga pe afai e te aioi atu mo le fesoasoani a le Tama Faalelagi. E pei ona faia e le Faaola ina ua puapuagatia o Ia, e mafai ona e tatalo “atili” (tagai i le Luka 22:44). E mafai ona aveesea e le Tama Faalelagi le tofotofoga, pe mafai foi ona Ia faamalosia oe e tauaveina (tagai i le Mosaea 24:14–15).
E Mafai ona Fesoasoani ia Uo ma Aiga
O se tasi o auala e lapataia ai au e le Tama Faalelagi pe a sese le auala ou te agai i ai o Lona musuia lea o uo po o tagata o le aiga e faasoa mai a latou molimau po o se aafiaga patino ia te au. Afai ou te lagona le faanoanoa po o se manao ina ia suia a o latou faasoa mai o latou lagona, ou te iloa ai e manaomia ona ou salamo ma faia ni suiga i lou olaga.
Luis S., 17 tausaga, Florida, ISA
Saili Lou Loto
Saili lou loto ina ia iloa ai po o le mea o loo e faia o le mea moni lava lea o loo finagalo i ai le Tama oi le Lagi e te faia. O loo i ai i o tatou olaga le Agaga Paia e aoaoina i tatou i le lelei mai le leaga. Afai e te sailia le Atua ma aioi atu, o le a faaalia ia te oe e le Agaga Paia le mea e tatau ona e faia. E tusa lava po o le tofotofoga o le aoao atu po o le lapataiina, e tutusa lava le faamoemoega: e fesoasoani ia te oe e tuputupu ae ma ia atoatoa ia Keriso pe a e tali atu ma le faatuatua ma faalagolago i le Alii.
Emily B., 18 tausaga, Kalefonia, ISA
O Le a Faamafanafanaina Oe e le Alii
Na fuafuaina e le Tama Faalelagi ia tofotofoga uma ia avea ma aafiaga faamalosiau ma ia mamanuina ai oe e avea ma se tagata sili atu. Ua i ai uma lava i le ala e te taulimaina ai. Ou te iloa o nisi tofotofoga e foliga mai e faigata tele ona tatou gafatia, ae o le a faamanuiaina ai i tatou pe a tatou faatuatua. Ou te taumafai lava ia manatua le fetalaiga a le Alii ia i tatou: “Ou te le tuua outou o matuaoti: ou te sau ia te outou” (Ioane 14:18). O lenei malamalama o le a mafai ona e faatoilaloina ai soo se tofotofoga e te lua fetaia’i, ma o le a e malosi atili ai. Afai e te lagona ua lapataia oe e le Tama Faalelagi ona ua sese le auala ua e agai ai, ia faatuatua ma faalogo i uunaiga a le Agaga ina ia mafai ai ona e pipiimau pea i le ai uamea. E alofa o Ia ia te oe ma finagalo pea o Ia ina ia e avea ma se tasi e sili atu a o Ia fesoasoani ia te oe i le olaga.
Olivia B., 18 tausaga, Minnesota, ISA
Mafaufau i Ai
Ou te iloa o le auala sili lava e iloa ai le faamoemoega o le tofotofoga o le anapogi lea ma tatalo i ai ma le faamaoni. Taumafai foi e mafaufau i ai. Afai e te faatoilaloina le tofotofoga, mata o le a avea oe o se tagata sili atu pe o le a e tumau ai pea e le suia? Afai e te mafaufau o le faatoilaloina o se tofotofoga o le a sili ai ona e lelei ma fiafia, o lona uiga o lena e te i ai i le ala sa’o.
Ammon K., 16 tausaga, Iuta, ISA
Tumau i le Ala Sa’o
E tatau ona faitau a tatou tusitusiga paia i aso uma, ma afai o loo tatou faia nei mea ma o loo ogatasi ma le Agaga Paia, o le a faaalia mai e le Atua ia i tatou po o a ni filifiliga e tatau pe le tatau foi ona tatou faia. Afai e te mafaufau o le auala o loo e agai i ai e le o se auala o le a filifili e le Tama oi le Lagi mo oe, ia toe foi i tua. Ia tumau pea i le ala sao ma le vaapiapi.
Elizabeth P., 15 tausaga, Pennsylvania, ISA
Tatalo ina ia Aoao mai i Tofotofoga
E tuuina mai pea e lo tatou Tama Faalelagi ia tofotofoga i o tatou olaga, ma e faamalolosia ai i tatou i Lana talalelei ma lo tatou faatuatua. Afai o i ai i se ala leaga, o le taunuuga na o filifiliga leaga na tatou faia. Ia tatalo e le aunoa ina ia faamalosia oe e le Atua ma fesoasoani ina ia e iloaina mea e lelei mai lena tofotofoga. E i ai sau molimau mautu, o tofotofoga o loo tuuina e le Tama Faalelagi i o tatou ala e aoao ai i tatou, faateleina a tatou molimau, fesoasoani ia tatou aoao e aua nei toe pauu, pe fesoasoani ai foi i isi e ala i o tatou aafiaga.
Ruddy R., 17 tausaga, Guayas, Ekuatoa
E Mafai e Tofotofoga ona Lapatai Mai
Ou te manatu o tofotofoga uma lava ua fuafuaina ina ia tatou malolosi atili ai, e tusa lava pe o nisi taimi e le foliga mai i ai. Ina ua 14 o’u tausaga, sa ou ma’i ma e valu masina na ou le toe alu ai i le aoga ae sa ou suesue i le fale. Sa fesoasoani lenei luitau e avea ai au ma se tagata sili ona lelei, ma sili atu ona malosi. Na fesoasoani ou te lagona ai le agaga faafetai mo mea na ou maua. O nisi taimi e mafai e tofotofoga ona tatou toe iloilo ai le mea o tatou agai i ai i le olaga, o lea e mafai ona avea o se logo fagufagu lelei.
Jennifer P., 17 tausaga, Motu i Matu, Niu Sila
Ia Onosai
Afai e feagai ma faigata ona o le le usitaia o se poloaiga, atonu la o se lapataiga. Ae afai e le mafai ona taofia, atonu la o loo i ai iina e fesoasoani i lou tuputupu ae. Ou te tatalo ma fesili atu i le Tama Faalelagi pe i ai se mea e tatau ona e suia pe e te aoao mai ai i lenei aafiaga, ma afai e i ai, fesili atu ia te Ia e ta’u atu po o le a. Tatalo mo le malosi ma le toafilemu. Ma ia onosai; atonu o loo sau le tali.
Michaela P., 17 tausaga, Idaho, ISA