Lav long Hom—Kaonsel we I Kam long Profet blong Yumi

“Taem yumi stap eksperiensem plante mo go aot longwe mo luk olsem wanem ol samting we wol i stap soemaot, oli stap blong sot taem nomo, mo samtaem, oli ol giaman samting, i mekem se fasin blong talem tankgyu blong yumi i gro from janis ia blong kam pat blong wan samting we yumi save dipen long hem—we hem i hom mo famle mo olsem wanem olgeta we yumi lavem tumas oli stap tru. Yumi kam blong save wanem i minim blong stap strong tugeta tru long diuti, tru long respek, tru long fasin blong kam pat blong wan samting. Yumi lanem se i no gat samting i save tekem ful ples blong ol gudfala rilesensip blong famle laef.”¹

“Talem wan naesfala toktok blong leftemap tingting blong pikinini blong yu mo putum han raon long hem; mo talem se ‘Mi lavem yu;’ oltaem talemaot ol tangkyu blong yu. Neva letem se blong stretem wan problem i kam moa impoten bitim blong lavem wan man. Ol fren oli muvaot, ol pikinini oli groap, olgeta we yumi lavem tumas oli ded i go. Hem i isi nomo blong tingting nating long ol narafala wan, kasem dei ia taem we oli lus long ol laef blong yumi mo yumi stap wetem ol filing ia: ‘wanem nao sapos’ mo ‘sapos nomo.’ …

“Letem yumi glad long laef taem yumi laef long hem; faenem glad long rod mo serem lav blong yumi wetem ol fren mo famle blong yumi. Wan dei, wanwan long yumi bae i nomo luk tumoro. Letem yumi no putumaot ol samting we oli moa impoten.”²

“Ol brata, bae yumi tritim waef blong yumi wetem gud fasin mo wetem respek. Oli ol kompanion blong yumi we i no save finis. Ol sista, givim ona long hasban blong yufala. Oli nidim blong harem wan gudfala toktok. Oli nidim wan gudfala smael. Oli nidim wan gudfala toktok blong tru lav. …

“Long yufala we yufala i ol papa mo mama. Mi talem, soem lav long pikinini blong yufala. Yufala i save se yufala i lavem olgeta, be mekemsua se oli save hemia tu. Oli impoten tumas. Letem olgeta oli save. Prea long Papa blong yumi long Heven from help taem yufala i stap kea long ol nid blong olgeta evri dei mo taem yufala i lukluk long ol jalenj we oli kam wetem fasin blong stap olsem wan papa o mama. Yufala i nidim moa bitim waes blong yufalawan blong lukaotem ol pikinini blong yufala oli kam antap.”³

“Long yufala ol papa mo mama. Talemaot lav blong yufala long ol pikinini blong yufala. Prea from olgeta blong oli save stanap agensem ol nogud samting blong wol. Prea se bae oli gro wetem fet mo testemoni. Prea se bae oli folem ol laef blong gud fasin mo laef blong givim seves long ol narafalawan.

“Ol pikinini. letem papa mo mama blong yufala i save se yufala i lavem olgeta. Letem olgeta oli save hamas yufala i luksave evri samting we oli bin mekem mo stap gohed blong mekem blong yufala.”⁴

“Wanem i moa impoten, kolosap oltaem i gat insaed olgeta pipol raon long yumi. Oltaem yumi stap ting se oli mas save hamas nao yumi lavem olgeta. Be yumi no mas tingting olsem ia; yumi mas letem olgeta oli save. Wiliam Sekspia i bin raetem: ‘Olgeta we oli no soem lav blong olgeta, oli no gat lav.’ Bae yumi neva save fogetem ol kaen toktok we yumi bin talem o lav we yumi bin soem. Be i tru, ol sore blong yumi bae oli kam sapos ol samting ia oli no gat long ol rilesensip blong yumi wetem olgeta we oli moa impoten long yumi.”⁵

“Letem ol famle mo hom blong yumi i fulap wetem lav: lav blong wanwan blong yumi, lav blong gospel, lav blong ol man raon long yumi, mo lav blong Sevya blong yumi. Olsem wan risal, heven bae i kam kolosap smol moa long wol.

“Letem yumi mekem ol hom oli kam ol tabu ples we ol memba blong famle blong yumi bae oli wantem blong gobak long hem.”⁶

“Folem hamas we famle yunit i stap long atak long wol tedei, mo folem hamas oli stap mekem fani long plante samting we oli bin stap holem i tabu longtaem, mifala i askem Yu, Papa blong mifala, blong mekem mifala i strong semmak long ol jalenj we mifala i fesem, blong mifala i save stanap strong from trutok mo stret mo gud fasin. Letem ol hom blong mifala oli kam ol sef ples blong pis, blong lav mo blong spirit.”⁷