Gud, Moa Gud, Gud Evriwan

Long toktok blong jeneral konfrens blong Oktoba 2007, Elda Dalin H. Oks blong Kworom blong Olgeta Twelef Aposol, i bin tokbaot ol aktiviti we oli “gud, moa gud, gud evriwan.” Taem hem i kasem pat we i tokbaot blong “putum tumas aktiviti blong ol pikinini,” mi sidaon long jea mo smael mo filim se mi ia nao mi rong wantaem.

Mi bin save se mi bin stap mekem tumas samting. Mi stap long ol drama blong skul, tekem ol strong klas long skul, mo stap long sam moa aktiviti. Mi no stap go gud long ol aktiviti blong Ol Yang Woman, mo evri Sandei we mi gat, i gat tumas samting, mo mi traem blong finisim,ol las minit homwok blong mi. Blong praktis long miusik mo stap mekem niuspepa blong skul i nomo blong gat wan gud taem be i kam olsem wan wok.

Toktok blong Elda Oks i mekem mi go luklukbak gud long taemtebol blong mi. Ol aktiviti blong mi oli ol gudwan, be i gat plante tumas. Mi mas jusum olgeta we oli gud evriwan. Taem mi stap traem mekem tingting blong mi long wanem aktiviti bae mi livim, mi luksave se gospel blong Jisas Kraes i wan fas gud aktiviti we eniwan i save gat. Mi putum prea mo stadi long skripja i kam faswan long lis blong mi, mo stat long taem ia, laef blong mi i go gud moa.

Elda Oks i tijim mi se taem yumi mekem wanem we Lod i wantem yumi blong mekem faswan, evri nara samting bae i kam foldaon gud wantaem long ples blong olgeta. Sapos mi stadi long skripja blong mi bifo mi go pleplei, o bifo mi go mekem homwok blong mi, evri impoten samting, bae mi save mekem olgeta. Taem mi stanemap laef blong mi raon long Lod, be mi no ademap Hem olsem wan tingting we i kam biaen, laef blong mi i gat moa pis mo sakses.

Naoia, mi lukaot gud blong lisin long kaonsel we oli stap givim long jeneral konfrens!