Mangil, mangil Boch’uw, Rib Mangil

U lane sabathin rok ko October 2007 ko general conference, Elder Dallin H. Oaks ko fare Ulung ko Ragag nge L’agruw i Apostle e ke weliy mornga’agen e pi gosgos nib “mangil, mangil boch’uw, nge rib mangil.” Napan ni taw ko bang ni mornga’agen e “Kay gun alamrin ko bitir,” me kikireb rogog u lane chiya’ rog.

Ku nang ni kay gi yo’or ni ku rrin’. Guba u lane pi gosgos u skul, gube cheg nigeg u lane pi class u sikul, mug un nga fithik boech e gosgos. Danug yul’yul’ i un ko gosgos ko Bpin ni Rugod, ma pi Madnom rog e rib sug ko magawon ni gube gay rogon ni nggu mu’ nag e homework rog. Fil e musik nge newspaper ko skul e ke yaen e chugum rorad nga biyang ni fan ko gosgos ma ke mang e murwel.

Numon ku Elder Oaks e ke n’anggineg kug sap ko schedule rog nib fal’ rogon. Pi gosgos rog e ba mangil, machane kaygi yo’or. Ngug fek e tin ni rib mangil u fithik. Napan ni gube gay rogon ni ngguy ko bin ngan e pi gosgos ni nggu siyeg, me yib ko tafney rog ni fare gospel ku Yesus Kristus e bin tha’abi ga’fan ni rayog ngak bee’. Ku tay e meybil nge chep nib thothup ni ngan fil ko somm’on ko list rog, rofen nem, me yan e yafas rog nib mangil rogon.

Ke fil Elder Oaks ngog ni napan ni gadad ra rrin’ e n’en ni ba’adag Somoel ni ngad rin’ned ko somm’on, ma gubin ban’en ma ra fal’ rogon. Fa’anra gu fil e chep nib thothup rog um’on ni nggu fafal fa um’on ni nggu fal’eg e skul rog, ma gubin ban’en nib ga’fan ma ra m’ay. Napan ni ra gu tay e yafas rog ngak Somoel, ko bin ni ngan tay ni tomur ko tafney ma yafas rog e ra yo’or e gapas nge mangil riy.

Chiney e rug ma sag’al ni ngug motoyil ko n’en ni yima yoeg ko general conference!