Mekreos el Yaksok er a Babier er a Mormon

Betok el rak er a mla memong eak dilechor er a bita ra ngeasek el chedam el ngii a mocha er a kodall. Ngikal ngara klengit el reng el bechil ma reterung el ngelekir a dilechor bitar ngii. Ngurrekedii chimak, ea osengel a mad el kora olengit, e dulang el kmo, “Bisop, ak medengei el kmo ak mora kodall. Ka mouchais el kmo sel kmad ea delbengek ng mekerang.”

Ak dillii a kedeb el nglunguuch ra renguk el olengit a ngesou ra babeluades e milsang er bebul a tebel er bitar ngii a chedaol llechukl el babier. Ak ngiluu tial babier e ulereched el omiis a llel. Meng dimlak sal kora meringel lomiis a llel tial babier, e di mle mereched el metik ra kusiik er ngii, el okeuang el bliongel ra babier ra Alma ra chelsel a Babier er a Mormon. Ak chiluiiu aikakid el tekoi el mor ngii:

“Ka morrenges, ng mlo chemolt el mer ngak lokiu a anghel el kmo, a reng ra rokui el chad, sel le tobed er tial mora kodall el bedenged,… a mengai el mo remei er ngikel Dios el milsterir a klengar.

“E ngii… a reng er tirkel melemalt a mengai el mora delengchokl er a deoureng, el lomekedong er ngii el kmo baradis, el delengchokl er a ulengull, el delengchokl er a budech, me te mo nguu a ulengellir er a rokui el tellemall el mlor tir, me a rokui el ngerchelir, ma klengit el reng” (Alma 40:11–12).

Tia er a kulemolem el menguiiu el kirel Okiis er a Kodall, eng mlo dmiich osengel ngikal ngeasek el chad e mlo klikmechur. A ulebongel er a odngelek, eak millemesumech er tial telungalk.

Ak liluut el mo kaseues ngak me ngikal redil ma rengalk ra kemeldiil. Ak mlo dobedebekii sel kesus er ngikal ngeasek el chad ra losiik ra klemerang, e rirenges a nger er a keril, er a chelsel a Babier er a Mormon.

A Babier er a Mormon a meskid a bebil er a mekreos el yaksok, luldimukl er ngii a yaksok er a budech, iilmokl ma klengeltengat alsekum e kede mesiou er a Dios, el ngii a Jesus Kristo (mesa Ether 2:12).

Me ngara ikaikid el bades e kede metik ra “diak a ulebengelel” telbiil el mor “tirkel oltirakl a llechul a Dios. Mosterir, te ngeltengat ra rokui el tekoi ra klechad, ma tekingel a Dios” (Mosiah 2:41).

E ngara chelsel aikal bades e kede metik ra telbiil el “diak el sebeched el smodii el deoureng” el mor tirkel tir a dongu ra chimal a Dios el ngara siik el kirir a remekreos el Ngelekel sechal ma redil (Alma 28:8; 29:9).

E ngara chelsel aikal bades e kede metik ra telbiil el kmo a reberberiid el chad ra Israel a lmuut el mo mekidb—el ngii a ureor el doruul er ngii lokiu a blak el reng ra remisionari el berberiid ra beluulechad (mesa 3 Nephi 16; 21–22).

E ngara chelsel aikal bades e kede metik ra telbiil el kmo sel doluluuch el mora Chedam lokiu a chedaol ngklel a Jesus Kristo, ea telungalk er kid a mo mukngeltengat (mesa 3 Nephi 18:21).

E ngara chelsel aikal bades e kede metik er sel mla mekedmokl el yaksok el kmo “ngmor ngii ra chelsel a klengar kid ma rekeblid a klisichel a Reng ra Rubak, el mesisiich el blak el reng el mo olngesenges a Llechul, ma mesisiich el klaumerang ra ngar el Ngelekel a Dios.”¹

E dirrek el ngara ikal bades ra chelsel a Babier er a Mormon e kede metik er sel telbiielel a Moroni el kmo ngokiu a nglunguuch, el meral ngarngii ra rengud, ma klaumerang ra Kristo, e kede mo medengelii a klemerang ra ikal telbiil “lokiu a klisichel Chedaol Reng” (mesa Moroni 10:4–5).

Mak teloi er tirkel bebil ra profet er chelechal taem, e ochotii a klaumerang er ngak el kirel tiang el “kot el meral babier ra ngii dil babier er a beluulechad,”² ngii el Babier er a Mormon, el dirrek el ouchais el kirel a Jesus Kristo A klemechel a mekekii a beluulechad e mesterir tirkel mo menguiiu er ngii a klemedengei el kirel a klemerang. Ng klaumernag er ngak el kmo a Babier er a Mormon a melodech a klengar. A derstang er kid bo donguiiu er ngii e deluut el menguiiu er ngii. E bol sebeched el dmeu a rengud louchais el kirel a mekreos el yaksok er ngii el mora rokui el ngelekel a Dios.