Anak nga mga Babaye sa Akong Gingharian: Usa ka Makasaysayanong Buhat sa LDS nga mga Babaye Karon

Ang proyekto nagsugod isip buluhaton gikan sa Unang Kapangulohan. Si Susan W. Tanner, kanhi kinatibuk-ang presidente sa Young Women, gi-set apart sa pagsulat sa libro. Si Sister Beck ug ang iyang mga magtatambag, sila si Silvia H. Allred ug Barbara Thompson, gi-assigned sa pagdumala sa proyekto ug sa pagtrabaho uban ni Sister Tanner, mga editor, tigdesinyo, ug sa uban aron sa pagtino sa mga sulod niini sumala sa espiritu sa pagpadayag. “Wala pa gyud ko katrabaho og proyekto nga gigihayan sa Espiritu kay niini,” miingon si Sister Beck.

Lakip niana nga proseso mao ang pagdesisyon kon unsa sa liboang mga istorya sa kasaysayan ang kinahanglang ilakip sa libro. Si Sister Beck, iyang mga magtatambag, ug si Sister Tanner nagribyu sa mga minute sa miting sa unang Relief Society sa Nauvoo ug sa uban pang mga kasaysayan ug mga panghitabo kabahin sa Relief Society ug sa kababayen-an sa Simbahan.

Sister Beck miingon nga ang resulta dili mao ang matang sa kronolohiya nga kasaysayan kon dili usa ka espirituhanon nga kasaysayan sa kababayen-an sa Simbahan ug sa Relief Society.

“Atong gitun-an ang atong kasaysayan tungod kay kini makatabang nga kita mag-usab,” miingon si Sister Beck sa iyang pakigpulong niadtong Septyembre 2010 nga kinatibuk-ang miting sa Relief Society. “Sa katapusan, ang bili sa kasaysayan dili kaayo sa mga petsa, mga panahon, o mga dapit niini. Kini bililhon kay kini nagtudlo kanato sa mga baruganan, mga katuyoan, ug mga sumbanan nga atong kinahanglan nga sundon, ug kini nagtabang kanato nga makaila kon kinsa kita kon unsa ang atong buhaton ug naghiusa kanato sa paglig-on sa mga panimalay sa Zion ug sa pagtukod sa gingharian sa Dios dinhi sa yuta” (“Anak nga mga Babaye sa Akong Gingharian: Ang Kasaysayan ug ang Buhat sa Relief Society,” Liahona, Nob. 2010, 115).

Samtang ang libro nagsunod sa dagan sa panahon [time line], ang mga pagtulun-an niini gipresentar sa mga kapitulo sumala sa hilisgutan. Kini naggamit og mga istorya ug mga panig-ingnan gikan sa mga kasulatan ug sa panahon karon, gikan sa mga pulong sa mga propeta, ug sa mga lider sa Relief Society aron sa pagtudlo sa importanting mga mensahe.

Miingon si Sister Beck nga pinaagi sa libro ang mga sister makakat-on kon unsaon pagkab-ut sa mga katuyoan sa Relief Society sa ilang kinabuhi mismo ug isip kaigsoonan sa kababayen-an nga mga disipulo nga nagtuman sa pakigsaad.

“Sila makakat-on kon unsay ipasabut nga mopalambo sa pagtuo ug personal nga pagkamatarung, molig-on sa mga pamilya ug panimalay, ug mangita ug motabang niadtong nanginahanglan,” miingon si Sister Beck sa usa ka interbyu sa magasin sa Simbahan. “Kon ang mga sister mismo makakaplag sa buhat sa Relief Society, sila makasabut kon unsa ka dako ang impluwensya sa mga babaye sa kalamboan sa Simbahan, sa karaan ug sa ulahing mga adlaw, ug sila masayud sa ilang katuyoan ug sa ilang pagkatawo.”

Si Sister Beck nagtuo nga kadtong mobasa sa libro makakat-on pinaagi sa panig-ingnan ug lagda kon unsaon sa pagpaminaw sa Espiritu Santo ug sa pagdawat og personal nga pagpadayag. Sila usab malig-on ug madasig sa ilang inadlaw-adlaw nga pagpakabuhi ug sa mga pasulay ug kalisdanan.

“Adunay talagsaong kalig-on sa basahon—talagsaong kalig-on nga mahimo natong sundon,” miingon si Sister Beck. “Busa atol sa lisud nga mga panahon, maglaum ko nga ang mga tawo moandam sa libro ug mokuha ug mobasa og usa ka istorya o panig-ingnan nga makapalig-on kanila.”

Si Sister Beck miingon usab nga ang basahon maanaa sa panimalay sa mga miyembro sa Simbahan pinaagi sa mga sister, apan siya nagtuo nga ang libro mahimong importante nga kapanguhaan sa lalaki ug babaye. Kini makatabang sa batan-ong mga babaye kon unsaon nila nga maapil sa tibuok kalibutan nga panag-igsoonay sa mga kababayen-an, ug kini makapahiusa sa bana ug asawa sa ilang balaanong buhat sa paggiya sa ilang pamilya ug sa pagserbisyo sa Simbahan.

Pagkahuman og tuon sa libro, si Dale Cook, presidente sa Syracuse Utah Bluff Stake, miingon nga importante kini nga kapanguhaan sa pagtabang usab sa mga lalaki, dili lang sa mga babaye sa Simbahan nga makasabut sa ilang tahas isip mga disipulo ni Kristo. “Inyong mabasa ug makita kon sa unsang paagi [ang Relief Society] may kalabutan ug masumpay sa priesthood,” miingon si Presidente Cook. “Kini nakatabang kanako sa pagkaamgo sa gahum nga anaa sa akong kapikas ug [sa unsang paagi] nga [mas] mohigugma ug motabang ug mosuporta kaniya.”

Ang libro usa ka kapanguhaan alang sa personal nga pagtuon ug sa pagtudlo sa panimalay, sa Relief Society, ug sa ubang mga kalihokan sa Simbahan. Kini ipadala ngadto sa mga bishop ug mga presidente sa branch, kinsa makig-alayon sa mga presidente sa Relief Society sa pagdesisyon kon unsaon sa pag-apud-apod ang mga libro nga kini mahimong panalangin ngadto sa mga sister sa ward ug branch.

Ang libro gipaabut nga naa sa hapit duha ka dosena nga mga pinulongan sa katapusan sa Enero 2012. Daghan niini anaa na sa internet, diin ang mga miyembro makakita og mga video, makipagbahin og mga kinutlo, ug makabasa og mga sugyot kon unsaon sa paggamit ug pagpakigbahin sa mga mensahe niini nga libro. Adto sa lds.org/relief-society/daughters-in-my-kingdom. I-klik ang “Additional Languages (PDF)” sa tunga-tunga sa pahina ubos sa “Related Resources.” Usa ka listahanan sa mga pinulongan nga anaa na niini makita sa tuo nga bahin sa sunod pahina. Ang website sa katapusan hubaron ngadto sa daghang pinulongan.

Usa ka hardbound nga edisyon sa libro ang giplanohan sa English, Portuguese, ug Spanish sa katapusan sa tuig ug makuha pinaagi sa Distribution Services ug store.lds.org.