Elder Tad R. Callister

No paturu-noa-hia iho nei o Elder Tad Richards Callister i roto i te peresideniraa o te Hiti Ahuru e e melo no te pŭpŭ piti o te Hitu Ahuru, e te faaite nei oia e, hoê o te mau titauraa a te mau Taea‘e maori râ, te faatupuraa ïa « i te tupuraa mau i te rahi » i roto i te Ekalesia. « Na te reira e tura‘i i te taata eiaha ia haere noa mai i te pureraa oro‘a, ia amu atoa râ i te oro‘a mo‘a, ia farii i te mau oro‘a ta te Ekalesia e horo‘a nei, e ia haapa‘o i ta ratou mau fafauraa », te na reira ra oia.

No to’na hinaaro ia tauturu i te mau ti‘a faatere i tera fenua e tera fenua i roto i taua tautooraa ra, ua oaoa o Elder Callister i te mea e, ua horo‘a mai te Fatu ia’na i te mau rave‘a no te tavini i roto i te mau piiraa e rave rahi. « Na roto i te peeraa i te taahiraa o te mau taata ta’u e haa nei i piha‘i iho i teie nei,—te mau peresideni tĭtĭ e te mau episekopo e te mau peresideni pŭpŭ peresibutero—te mana‘o nei au e, na te reira i tauturu ia‘u ia ite maite i to ratou mau hinaaro », te na reira ra oia.

Ua tavini te taea‘e Callister ei misionare rave tamau i roto i te misioni no Eastern Atlantic States, ei peresideni pŭpŭ peresibutero, ei peresideni misioni tĭtĭ, ei tauturu no te peresideni tĭtĭ, ei episekopo, ei peresideni tĭtĭ, ei ti‘a retioni, ei Hitu Ahuru Area, ei peresideni no te Misioni no Canada Toronto East (2005–08), e te tavini ra oia ei peresideni no te Area no Patifita a piihia ai oia i roto i te peresideniraa o te Hitu Ahuru.

Ua fanauhia te taea‘e Callister e Reed e o Norinne Callister i te ava‘e titema 1945, i Glendale, Kalifonia, USA, e ua farii oia i te parau tu‘ite no te ohipa matutu i Brigham Young University i te matahiti 1968. Ua farii oia i te parau tu‘ite no te haapiiraa ture i te fare haapiiraa tuatoru no Kalifonia, i Los Angeles i te matahiti 1971. I te matahiti 1972 ua roaa ia’na te parau tu‘ite LLM (« master ») no te ture i te pae no te tute i roto i te fare haapiiraa haapiiraa tuatoru no New York. Mai te matahiti 1972 e tae atu i te matahiti 2005 ua faaohipa oia i te ture, e ua papa‘i oia i te mau buka no ni‘a i te Taraehara, te Taivaraa e te Ti‘a-faahou-raa.

Ua faaipoipo oia ia Kathryn Louise Saporiti i te ava‘e titema 1968 i roto i te Hiero no Los Angeles Kalifonia. E ono ta raua mau tamarii.

Ua ite te taea‘e Callister i te rima o te Fatu i roto i to’na oraraa. « No te rahi o te here o te Faaora, te feruri nei au e, te tia‘i tuutuu ore nei te Faaora e to tatou Metua i te Ao ra ia haamaitai ia tatou i te maitai iti roa a‘e ta tatou e rave, no te mea, te reira to Raua natura ».