O Le Filemu ma le Olioli i le Iloa o loo Soifua le Faaola

Ua faaopoopo le malamalamaaga taua mai le tala faamama’i masani tatou te faamatalaina i le taimi o le Kerisimasi e pei ona tusia i le Luka, mataupu e 2: “O aso lava ia na oo mai ai le poloaiga a Kaisara Aokuso ia tusia uma ai le lalolagi” (Luka 2:1).

O se lafoga faavae moni lava lea, o se faitauga aofai, ma se tusigaigoa—o se resitalaga o tagatanuu o le malo o Roma. Sa faatonuina e le Tupu o Herota ina ia faitauina tagata i le nuu o o latou augatama. O Maria ma Iosefa, sa nonofo i le taimi lea i Nasareta, sa tatau ona la malaga agai i saute i le aai o Tavita, o se mamao pe tusa ma le 90 maila (145 km). Atonu pe sa mamao atu se mea sa la malaga ai pe afai sa uiui mamao mai le itumalo faamimisa o Samaria lea latou te sosoo.

Toetoe lava ina a mautinoa moni sa latou malaga ma aiga sa tatau ona o i le nuu o o latou augatuaa. E le masalomia o lenei malaga faigata sa ave ai ma a latou meaola, e pei o taifau ma asini. Atonu e i ai ni po sa latou tolauapi ai i le ala aua e ono manaomia i la latou malaga ni aso se tolu pe fa. Ina ua latou taunuu i Peteleema, ua oo i le taimi mo le fanau mai o le Tamaitiiti Paia.

“Ua fanau e ia lana tama ulumatua, ua ia aui ia te ia i le ie, ma faataoto ia te ia i le falepovi; aua latou te le ofi i le fale e tali ai malo” (Luka 2:7).

E tumu lenei fuaiupu i uiga, ua faamauoaina i le iloaina o se upu mai le uluai tusiga faa-Eleni o le Feagaiga Fou ma le malamalama i le aganuu o lena taimi ma le nofoaga. O le upu na faaliliu mai ai le “fale e tali ai malo” o le kataluma.² O le sope faa-Eleni i luma o upu o le kata (po o le cata) o lona uiga o “lalo” i le taimi po o le nofoaga. A tuufaatasi le kata ma le luma, ona ta’u mai ai lea e le upu o se nofoaga e taapeape ai tagata, pe mapu ai foi mai la latou malaga. I le Feagaiga Fou i le gagana Eleni, o le upu kataluma e na o le lua lava isi fuaitau o loo ta’ua ai, ma e le o faaliliuina i taimi taitasi o se “faletalimalo” ae o se “afeafe e api ai malo” (Mareko 14:14; Luka 22:11).

I lena taimi ma lena nofoaga, e le pei se faletalimalo i Asia o se Holiday Inn po o le Bethlehem Marriott i le taimi nei. O se nofoaga e tali ai malo i na aso sa i ai mea e mapu i ai karaveni femalagaai, e aofia ai tagata ma a latou meaola. E tuu karaveni i le mea sa iloa i na aso (ma o loo iloa ai pea lava) o se caravansary, po o se khan. O loo faauigaina e le lomifefiloi nei faaupuga o se afeafe tele e tali ai malo e siomia ai se malae i atunuu i sasae (po o Asia) lea e malolo ai karaveni i le po.³

O lena ituaiga o nofoaga e masani lava e fa ona itu, e aofia ai se lotoa tutotonu mo meaola, e siosiomia e potu faatafafa puipui e malolo ai tagata. O nei tamai potu faatafafa e mafai ona faamaualuga teisi a’e ia tagata mai a latou meaola, e tatala faitotoa ina ia mafai ai e tagata ona vaavaai a latou meaola. O le Faaliliuga a Iosefa Samita o le Luka 2:7 o loo ta’u mai ai sa leai se avanoa mo i la’ua i le “fale e tali ai malo,” o lona uiga ua tutumu uma tamai potu faatafafa puipui o le afeafe tele e tali ai malo.

O le manatu faapea sa lei talileleia pe sa agaleaga ia pule o faletalimalo, atonu e le sa’o. O tagata foi iina i lena taimi e mautinoa e pei foi ona i ai i le taimi nei e—talimalo lelei. Aemaise lava e tatau ona moni lena mea i se vaitau e faatupulaia ai le faitau aofai masani o Ierusalema ma lona tuaoi o Peteleema i le toatele o tagata o aiga o le nuu.

I se afeafe e tali ai malo i le atu Asia, sa malupuipuia meaola mo le po i le tulimanu o le lotoa. I lena lotoa e ono i ai ni asini, taifau, mamoe, atonu foi o ni kamela ma ‘oti, faatasi ai ma otaota ma le manogi o meaola.

Ona ua tutumu ia faleapitaga talimalo sa siosiomia ai le lotoa, atonu na faia ai e Iosefa le faaiuga e tapena le faatosagaina o Maria i le ogatotonu o le lotoa sa i ai se afeafe e tali ai malo, i le mea sa i ai meaola. E matuai foliga mai ai lava o se tulaga maualalo faapena na soifua mai ai le Tamai Mamoe a le Atua.

E faalua ona ta’u mai i le Luka 2 le aui i le ie. O le a le uiga o le fasifuaitau “aui i le ie” (Luke 2:7)? Ou te lagonaina le taua e sili atu i le faaaogaina o se napekini masani po o se ie mafanafana masani. Nai lo na upu e lima i le tusiga faa-Peretania, e na o le tasi le upu o loo faaaoga i le tusiga faa-Eleni o le Feagaiga Fou. O lena upu o le sparganoo, o se veape o lona uiga o le aui o se pepe meamea i se ie faapitoa, o ona pito e fesaua’i mai le tasi itu i le isi itu.⁴ Atonu e i ai i le ie se faailoga faaleaiga e le mafaamatalaina. O lena faiga sa faapitoa ona faatatau i le fanau mai o se atalii ulumatua.

Sa faasilasila mai e le agelu, “O le faailoga lenei ia te outou; e iloa e outou le tama meamea ua aui i le ie, o loo taoto i le fale povi” (Luka 2:12). O le ie na aui ai o Ia e mautinoa lava sa iloagofie ma iloga.

E faapefea le moega vaovao? O tagata e tautatala faa-Farani latou te iloa o le moega vaovao o lona uiga o le “aai ai.” O le moega vaovao o se faatanoa po o se atigi pusa i se falemanu e fuafua e tuu ai meaai mo meaola. Atonu o se faatanoa, sa maualuga a’e mai le palapala o le lotoa, o le mea aupito sili lea ona mama sa avanoa. O lena faatanoa e fafaga ai meaola, na avea o se moega pepe mo lo tatou Alii!

E sili atu ona taua nai lo le mea maualalo na soifua mai ai le Faaola o Ona tuaa e le mafaatusalia. E tele mau o loo faia le fesili “O ai na te tala atu Lona tupulaga?” (Isaia 53:8; Galuega 8:33; Mosaea 14:8; 15:10). O lona uiga “O ai o le a talatalaina Lona gafa?” I le taimi nei, i le lua afe tausaga mulimuli ane, ua tatou folafolaina o Iesu le Keriso na soifua mai i se Tama tino ola pea ma se tina i la le tino. Mai Lona Tama tino ola pea, na maua mai ai e Iesu le mana e ola ai e faavavau. Mai Lona tina i la le tino, na Ia maua mai ai le tulaga lē ma’alofia o le oti faaletino.

Sa faailoa mai e Iesu nei mea moni ina ua aafia ai Lona lava soifua: “E leai se tasi na te aveeseina ia te au,” Na Ia fetalai ai, “a e peitai a’u ou te tuuina atu e a’u lava. O ia te a’u le pule e tuuina atu ai, o i ai foi le pule e toe aumai ai. Ua ou maua lena poloaiga mai lo’u Tama” (Ioane 10:18).

O na uiga auau mama tulaga ese o Ona tuaa, sa tatau ona i ai mo Lana misiona e togiola mo agasala a tagata uma. O lea, sa soifua mai Iesu Keriso ina ia maliu ona toetu mai ai lea i le ola e faavavau (tagai 3 Nifae 27:13–15). Na maliu o Ia ina ia mafai ai ona tatou toe ola. Sa soifua mai o Ia ina ia mafai ai ona faatoafilemu tagata uma mai le tiga o le oti ma ola ai i talaatu o le tuugamau (tagai 1 Korinito 15:55; Mosaea 16:7–8; Alema 22:14; Mamona 7:5).

Na faatino Lana Togiola i Ketesemane, lea na Ia afutoto ai (tagai Luka 22:44), ma luga i Kolokota (po o Kalevaria), lea na si’i a’e ai Lona tino i luga o se satauro i le “mea o i ai le ulupoo,” lea e faatusa i le oti (Mareko 15:22; Mataio 27:33; tagai foi 3 Nifae 27:14). O lena Togiola aoao e lē gata o le a faasaoloto mai ai le tagata mai le oti e lē gata (tagai 2 Nifae 9:7). O le Togiola a le Faaola ua avea ai le toetu o se mea moni ma le ola e faavavau o se avanoa mo tagata uma. O Lana Togiola ua avea ma vaega autu o le talafaasolopito o tagata uma.

Na faamamafa mai e le Perofeta o Iosefa Samita, o lē na faapea mai, “O mataupu faavae autu o lo tatou talitonuga o molimau a le au Aposetolo ma Perofeta, e faatatau ia Iesu Keriso, o lea na Ia maliu, ma tanumia, ma toetu mai i le aso tolu, ma afio a’e i le lagi; ma o isi mea uma e faatatau i lo tatou talitonuga ua na o ni faaopoopoga i ai.”⁵

O lenei tautinoga o le musumusuga mautu lea sa taialaina ai le Au Peresitene Sili ma le Korama a Aposetolo e Toasefululua i ni nai tausaga ua mavae ina ua tatou tulata i le lona 2,000 tausaga o le soifua mai o le Faaola. O i matou, o alii e toa 15 ua tuuina mai i ai ki o le malo, sa saunia a matou molimau tusitusia. Sa matou faaulutalaina “O Le Keriso Soifua: O Le Molimau a Aposetolo.”⁶ Ona tofu faapipii lea i ai e Aposetolo e toa 15 sa i ai i lena taimi lana saini i lena molimau.

O tagata taitoatasi ua i ai se molimau i le Alii, ua i ai le avanoa, i le faatuatua e iloa ai Ona tuaa paia ma molimau atu o Iesu o le Alo o le Atua soifua. O le molimau faamaoni e aofia ai le mea moni na faaali le Tama ma le Alo i le Perofeta o Iosefa Samita, lea tatou te faamanatuina lona aso soifua i le 23 o Tesema. O lena molimau e aofia ai le mea moni O Le Ekalesia a Iesu Keriso o le Au Paia o Aso e Gata Ai e moni ma o loo taitaia e se Alii soifua e ala mai i valoaga ma faaaliga i taitai ua faatagaina, o ē mauaina ma tali atu i le taitaiga mai ia te Ia.

E oo lava i taimi aupito tugā o le olaga faaonaponei, e aumaia ia i tatou e lenei iloa le filemu ma le olioli. “Ia fiafia,” na fetalai mai ai le Alii, “ma aua le fefefe, aua o A’u o le Alii ua ou faatasi ma outou, ma o le a tu i tafatafa o outou; ma o le a outou molimau atu A’u o Iesu Keriso lava, o A’u o le Atalii o le Atua soifua, ma sa Ou i ai, ma o loo Ou i ai, ma o le a Ou alu atu” (MF&F 68:6). Ma le faanaunau, tatou te taofimau ai i Ana folafolaga faamanuia.

O loo fotua’i mai aso faigata. Ua faateleina le agasala. Sa muai vaai Paulo i tagata o le Ekalesia o le a onosaia sauaga (tagai 2 Timoteo 3:1–13; MF&F 112:24–26). Sa apoapoai mai Peteru, “Afai e faatigaina se tasi aua o ia o le Kerisiano, aua le maasiasi ai o ia, a ia vivii atu i le Atua ona o lea lava mea” (1 Peteru 4:16). Talu ai na afio ifo Iesu i lalo i mea uma ina ia tulai i luga a’e o mea uma, ua faamoemoe foi o Ia ia tatou mulimuli i Lana faataitaiga. A tauamo faatasi ma Ia, ona mafai lea e i tatou taitoatasi ona tulai i luga a’e o o tatou luitau uma, tusa lava po o le a le faigata e foliga mai ai (tagai Mataio 11:29–30).

Mafaufau i mea uma na faia e le Faaola—ma o loo faia pea lava—mo i tatou, o le a se mea e mafai ona tatou faia mo Ia? O le meaalofa aupito silisili e mafai ona tatou foai atu i le Alii i le Kerisimasi, po o se isi lava taimi, o le tausisia lea o i tatou lava ia lē pona mai le lalolagi, ia agavaa e auai atu i Lona malumalu paia. Ma o Lana meaalofa ia i tatou o le filemu i le iloaina lea ua tatou saunia e faafetaia’i ia te Ia, pe a oo mai lena taimi.

O le atoaga o le misiona a le Matai o loo taoto i le lumanai. E lei faataunuuina valoaga o Lona Afio Mai Faalua. E moni, i le Kerisimasi, tatou te taulai atu ai i Lona soifua mai. Ma o le a toe afio mai o Ia i lenei lalolagi. I Lona Afio Mai Muamua, sa toetoe lava ina afio mai faalilolilo Iesu. Sa na o ni nai tagata na iloa Lona soifua mai. I Lona Afio Mai Faalua, o le a iloa e tagata uma Lona toe foi mai. Ma o le a afio mai o Ia, e le pei “o se tagata o malaga i le lalolagi” (MF&F 49:22), ae “faaalia mai le pupula o Ieova, e vaaia lava e tagata uma faatasi” (Isaia 40:5; tagai foi MF&F 101:23).

I le avea ai o se molimau faapitoa i Lona suafa paia, ou te molimau atu ai o Iesu le Keriso o le Alo paia o le Atua soifua. O le a alofa o Ia ia te oe, si’i a’e oe, ma faailoa atu Ia lava ia te oe pe afai e te alofa ia te Ia ma tausi Ana poloaiga (tagai Ioane 14:21). Ioe, o loo ifo atu pea ia te Ia o alii ma tamaitai atamamai.