2011
Irair Laud en Mwekidki oh en Mie Lipweiong
December 2011

Iren Mahsen en Padahk en Pas, Tihsempe 2011

Irair Laud en Mwekidki oh en Mie Lipweiong

Onopiki iren mahsen wet, oh ni duwen eh pahn konehng, koasoaiahkihieng lih akan me komw kin pwarek. Doadoahngki peidek kan pwehn seweseikomwi kakehlailih riomw lih akan oh pwehn wiahda Pwihn en Sawas en Lih en wiahla pali kesempwal en pein ahmw mour.

Pwoson • Peneinei • Sawas

Kauno, Sapwellime Mwomwohdiso, peneinei kan, oh kousapw kan anahne lipwen lih mour pwung kan. Ni mehlel, Elder M. Russell Ballard en Pwihn en Wahnpoaron Ehk-riemeno padahngki me, “lih koaros nan Mwomwohdiso wet me wiahdahr inou sarawi kan rehn Kauno ahniki poahngoak sarawi en sawas doarehla ngehn kan, en kaweid lih akan en sampah, en kakehlailih ihmw akan en Saion, oh en kauwada wehin Koht.”1

Ekei lih akan pahn medemedewe ma irail pahn kak kapwaiada soangen doadoahk laud pwukat. Ahpw duwen Eliza R. Snow (1804–87), keriaun president lap en Pwihn en Sawas en Lih, eh kawehwe, “Sohte lih emen me nohn kelehpwla, oh irair me e kak en mie lipweiong nohn tikitik ahpw me e kak wia inenen laud ong kauwada Wehin Koht pohn sampah.”2 Sister Snow pil padahngki me Pwihn en Sawas en Lih koasoandi “ong pweidahn doadoahk koaros me mwahu oh lapalap.”3

Towehda Pwihn en Sawas en Lih kin kalaudehla irair me kak mie lipwatail ong sang ni eh kin kihong emenemen lih ansou mwahu kan en kakairada pwoson, en kakehlailih peneinei kan oh ihmw akan, oh en kihda doadoahk en papah ni ihmw oh pil nan sampah pwon. Oh paiete, atail doadoahk ni duwen emenemen oh ni duwen Pwihn akan en Sawas en Lih sohte anahne laud oh katoutou, ahpw atail doadoahk anahne en wia mehkot me kitail koasoanehdi en mwekidki oh me kitail kin koadkoadoahkehte kohwei. Tiahk pwung kan me rasehng pein kapakap oh kapakap en peneinei rahn koaros, wadwadek pwuhk sarawi rahn koaros, oh kin kapwkapwaiada ni pweida mwahu atail pwukoa malipilip kan en Mwomwohdiso pahn sawas kalaude pwoson oh kauwada wehin Kauno.

Ong lih akan me kin medewe ma sawas mwomwen tikitik pwukat mie lipwe, Elder Ballard kamehlel: “Emenemen lih me uhki mehlel oh mour pwung kin katikala lipwen me suwed. Emenemen lih me kin kakehlailih oh sinsile ah peneinei wiewia doadoahk en Koht. Emenemen lih me kin momour ni duwen lih en Koht kin wiahla mehn ser de karasaras ong mehteikan en idawehn oh kin padokedi werentuhke en lipw pwung me pahn dondoldi erein sounpar tohto nan sounpar kan me kohkohdo.”4

Sang Pwuhk Sarawi Kan

1 Korint 12:4–18; 1 Timoty 6:18–19; Mosiah 4:27; Iren Pwoson Akan 1:13

Sang Atail Poadoapoad

Eliza R. Snow, me papah ni duwen sekteri ni ansou me Pwihn en Sawas en Lih kokouda nan Nauvoo, malipilipda sang President Brigham Young (1801–77) en seiloakseli nan wasa kan me Mwomwohdiso mihie, sewsewese pisop kan kauwada Pwihn en Sawas en Lih nan arail ward kan.

Sister Snow padahngki: “Ma sohte lipilipil serepein kan oh nohno kan nan Israel wie pepehm me irail soakoahiek de soitar nan irair me re mih loale ansou wet, irail pahn diar met laudlahn manaman oh koahiek ong wiewia me mwahu me irail kapaikidahr ni sapan. … President Young kapirehr kiho ong irair me tehlap oh laud en mwekidki oh katapan.”5

© 2011 sang Intellectual Reserve, Inc. Kolokol pwuhng koaros. Ntingda nan USA. Kamanaman ong lokaiahn wai: 6/10. Kamanaman ong kawehwe: 6/10. Kawehwehpen Visiting Teaching Message, December 2011. Pohnpeian. 09772 885

Iren Sawas Akan

  1. M. Russell Ballard, “Women of Righteousness,” Liahona, Tihsempe 2002, 39.

  2. Eliza R. Snow, “An Address,” Woman’s Exponent, Septempe 15, 1873, 62.

  3. Eliza R. Snow, “Female Relief Society,” Deseret News, Epreil 22, 1868, 81.

  4. M. Russell Ballard, Liahona, Tihsempe 2002, 39.

  5. Eliza R. Snow, Deseret News, Epreil 22, 1868, 81.

Dah Me I Kak Wia?

  1. Ia duwen ei kak sewese lih akan me I kin pwarek en kasawiada oh mwekidki arail koahiek en ahniki lipw pwung?

  2. Ia duwen ei kak doadoahngki ahi kisakis kan oh pein ahi koahiek kapai tohrohr kan pwehn kapaiada mehteikan?