Faigā Uo i le Pasefika

Ina ua o mai nisi o tamaiti aooga faatausima’i mai le Iunivesite o Polika Iaga e o i Toga, sa latou manatu o le a avea ma se mea malie le faauo o tamaiti mai Iuta ma tamaiti Toga.

O lea na talosagaina ai e tamaiti aoga ia tamaiti Peraimeri o le Uarota Iva a Oak Hills i Provo, Iuta e tusi ni ata mo tamaiti i Toga. Sa latou pueina foi ni ata o tamaiti.

Ina ua latou taunuu atu i Toga, sa fesoasoani tamaiti aooga faatausima’i i le taimi o le fetufaaiga i le Uarota a Neiafu Tolu. Sa latou tuuina atu i tamaiti taitasi se ata tusi ma se ata na pue o se tamaitiiti mai Iuta. Sa fiafia tamaiti e aoao e uiga i a latou uo fou i Iuta.

Sa tusia foi e tamaiti ni ata mo tamaiti i Iuta. O nisi sa tusia ni savali e uiga ia i latou lava ma e uiga i le olaga i Toga. O nisi savali sa tusia i le gagana Peretania, ae o isi i le gagana Toga. Sa tusia e le peresitene o le latou Peraimeri se faaliliuga faa-Peretania o savali faa-Toga. Sa pueina foi e tamaiti aooga faatausima’i ia ata o tamaiti.

Sa tusia e se tasi o tamaitiiti, “Ou te taalo lakapi, ma e ese le vevela o Toga.” Sa tusia e se teineitiiti, “E ese lo’u fiafia i lou ata. E ese lou aulelei. Ou te fiafia e pese, e pei foi o oe.” Sa tusi se isi tamaitiiti e uiga i le Peraimeri ma ta’u atu ona alofaaga: “O la’u lesona ananei e faatatau i perofeta. Ou te alofa tele ia te oe!”