Tausia o Feagaiga

O se feagaiga o se maliega e fusia ai faaleagaga, o se tautoga faamaoni i le Atua lo tatou Tama o le a tatou ola ma mafaufau ma galulue i se ala faapitoa—o le ala a Lona Alo, le Alii o Iesu Keriso. A o le isi itu, e folafola mai e le Tama, le Alo, ma le Agaga Paia le matagofie uma o le ola e faavavau.

E mataina ia te a’u le faapea o feagaiga e osia e le tagata lava ia, taitoatasi. E i ai se feagaiga i le taimi o le papatisoga ma le faamauga, lea e amata ai lo tatou ala e agai atu i le ola e faavavau. O na sauniga o loo faatinoina mo tagata taitasi, e taitoatasi, e tusa lava po o le a le toatele e iu ina mauaina.

E i ai se feagaiga i le taimi e maua ai e alii le perisitua. O lena faaeeina atu e masani ona tuuina atu i le tagata e toatasi i le taimi.

O feagaiga aupito maualuluga e mafai ona tatou osia e i totonu o le malumalu. O iina tatou te faia ai a tatou tautinoga e sili ona faamaoni i lo tatou Tama oi le Lagi ma o iina foi Na te tatala mai ai ia i tatou le uiga moni atoatoa o Ana folafolaga ia i tatou. E toe faapea atu, o nei aafiaga e taitoatasi, e tusa lava pe tatou te o atu i le malumalu ina ia faamauina i isi tagata taitasi.

O le auala lena e fausia ai le malo o le Atua—e tasi le tagata i le taimi, e tasi le feagaiga i le taimi, o auala uma i la tatou faigamalaga i le olaga nei e tau atu i le feagaiga tupito o le malumalu paia.

E matuai taua ona e malamalama o le alu atu i le malumalu mo lou lava faaeega paia, e aofia ai sauniga matagofie e sauniuni ai oe mo lena faaeega paia, o se vaega taua o au tapenaga o le misiona ma lou tuuto i le misiona.

Pe a e alu i le malumalu, o le a amata ona e malamalama ai i le taua o na feagaiga o le malumalu, o le sootaga e le mavavaeeseina i le va o lou faaeega paia iina ma le faamanuiaina o lau misiona.

E moni, o le upu lava ia o le faaeega paia ua faaalia ai le aano moni o lena sootaga taua. O le faaeega paia o se meaalofa. O loo i ai le upu autu e tasi o le pelega, o se meaalofa faapitoa lea e amata ai se ulugalii fou i lo laua olaga faaipoipoina. A o avea au ma peresitene o le Iunivesite o Polika Iaga, sa ou faaaluina se vaega o lo’u taimi e taumafai ai e fausia le pelepelega a le iunivesite, o lana pusa o meaalofa mai tagata foai agalelei.

O le mea lena e fai e le Atua mo i tatou i taimi uma tatou te faia ai se feagaiga ma Ia. Na te faaeeina i tatou. Tatou te folafola atu e faia ni mea faapitoa, e faalagolago lava i le sauniga, ae folafola mai e Ia ni meaalofa faapitoa—meaalofa matagofie, meaalofa e le mafaamatalaina, toetoe lava o ni meaalofa e le mafai ona malamalama i ai. O lea ou te fai atu ai ia te outou e pei ona ou fai ifo ia te au lava—afai tatou te mananao moni ia faamanuiaina i o tatou valaauga, afai tatou te mamanao e maua fesoasoani uma ma avanoa uma ma faamanuiaga uma mai le Tama, afai tatou te mananao e matala mai le faitotoa o le lagi ia i tatou, ina ia mafai ona tatou maua le mana o le faaleatua, e tatau ona tausi a tatou feagaiga!

E te silafia e le mafai ona e faia na o oe lenei galuega. E tatau lava ona tatou maua le fesoasoani mai le lagi; e tatau ona tatou maua meaalofa a le Atua. Na Ia aoao mai lenei mea i le amataga lava o le galuega i lenei tisipenisione. I le aoaoina mai “o le togiolaina o Siona,” na fetalai mai ai le Alii:

“Ina ia mafai ona saunia i latou lava, ma ia mafai ona aoaoina atili atoatoa lo’u nuu, ma maua le poto masani, ma iloa atili atoatoa e faatatau i lo latou tiute, ma mea ua Ou manaomia mai i o latou lima.

“Ma e le mafai ona faataunuuina lenei mea seia faaeeina a’u toeaina i le mana mai luga.

“Aua faauta, ua Ou saunia se faaeega ma se faamanuiaga tele ia sasaa mai i luga o i latou, o le tulaga e oo i ai le latou faamaoni ma faaauau pea i le lotomaualalo i o’u luma” (MF&F 105:10–12).

O lenei galuega e matuai ogaoga lava, ma ua matuai malosi foi le tetee i ai a le fili, o lea tatou te manaomia ai mana uma faalelagi e faaleleia a tatou taumafaiga ma uunai pea i luma le Ekalesia. O le ki i lena mea, mo i tatou o ni tagata taitoatasi o le feagaiga lea tatou te osia i le malumalu—o la tatou folafolaga e usitai ma ositaulaga, ia faapaia mo le Tama, ma Lana folafolaga e faamamanaina i tatou “i se faaeega maoae.”

Pe o fesoasoani lenei mea ia e iloa ai le taua o a tatou folafolaga patino, faaletagata lava ia, i le vaaiga atoa ma le mamalu o le galuega? E pei o isi mea uma i le ata o le faaolataga, o le faamanuiaina o alii ma tamaitai faifeautalai uma i le lalolagi e iloa lea i le faifeautalai e toatasi i le taimi.

Tatou te le osia ni feagaiga i ni uarota po o ni siteki atoa. Leai, tatou te osia feagaiga o Uso Brown po o Uso Burns, Tuafafine Jones, po o Tuafafine Jensen. O le ki i lenei galuega o le tausia o a tatou feagaiga o tagata taitoatasi.

Ou te le iloa po o le a le misiona o le a e galue ai, ae ou te le talitonu na faia e lo tatou Tama oi le Lagi ni folafolaga faapitoa i lau misiona o se misiona [atoa]. Ou te iloa ua Ia faia ni folafolaga maoae ia te oe lava ia e toatasi.

O le taimi lava e tutu faatasi ai se misiona atoa e ala i le malosi o le amiosa’o o faifeautalai uma lava, i le tausia taitoatasi o feagaiga e faifeautalai uma, ona mafai lea ona tatou aveesea mauga. O le taimi lava e i ai se lotogatasi ma se mana faapena, o se faaeega paia mai le lagi, e oo mai i faifeautalai taitoatasi uma i le misiona, e leai se mea e mafai ona “taofia le galuega mai lona alualu i luma.” O le ala lenei “o le a agai ai i luma le upu moni a le Atua i le manino, mamalu, ma le tutoatasi.”¹

Tatou te maua lena talitonuga mautu pe a leai se sooga vaivai i le filifili, pe a leai se ava o iloaina i le ofutau. O le taua faasagatau i le tiapolo ma le leaga, o le auala lea e maua ai manumalo uma o le talalelei—e tasi le feagaiga i le taimi, tasi le tagata i le taimi, tasi le faifeautalai i le taimi.

O le pogai lena na fetalai mai ai le Alii i taitai anamua o le Ekalesia, “Ia outou fusia faatasi ai outou lava ia outou faia ma le paia atoatoa i o’u luma—o le tulaga e oo i ai lo outou faia o lenei mea, o le a faaopoopo ai le mamalu i le malo ua outou maua” (MF&F 43:9–10).

O le gagana lena faafeagaiga. O le mea tonu lena tatou te o i le malumalu e fai—ia fusia faatasi i tatou lava i le Alii ma i le tasi ma le isi ma faatasi ai ma lena malosiaga tatou te “galulue ai i le paia uma.” O le isi itu, e oo mai ia i tatou ma la tatou galuega le mana ma le mamalu. O le aano tonu lena o le tausia o feagaiga na fetalai mai ai le Alii, “O A’u, o le Alii, e noatia a’u pe a outou faia mea Ou te fai atu ai; ae a outou le faia mea Ou te fai atu ai, e leai se folafolaga mo outou” (MF&F 82:10).

Talitonu mai ia te au. O le ki i lenei galuega o loo i ai lea i le tausia o a tatou feagaiga. E leai lava se isi auala e mafai ona tatou maua ma faaali atu ai mana o le faaleatua. Ua ia te outou le folafolaga a le Alii i lena mataupu.

O le a e alu atu i le malumalu e sauni ai oe mo lau misiona. Tausi au feagaiga na fai ai iina, feagaiga taitasi uma. O ni folafolaga e sili ona patino, sili ona paia e osia e i tatou taitoatasi ma lo tatou Tama oi le Lagi.

A o ou talosagaina lenei mea mai ia te outou, ou te manao ia outou iloa, o le a ou faia foi lena mea. O le a ou tausia foi a’u feagaiga. O se tasi o na feagaiga o le, i le avea ai ma se sui o le Korama a Aposetolo e Toasefululua, o se molimau faapitoa “o le suafa o Keriso i le lalolagi atoa” (MF&F 107:23). I le tausia o la’u feagaiga, e le gata ina ou molimau atu ia te outou i le aso e uiga i le Alii o Iesu Keriso ma o Ia sa faasatauroina, ae o au o se molimau—na valaauina, faauuina, tofiaina e ave atu lena molimau i le lalolagi. Ou te fiafia lava e auai faatasi ma outou i lena galuega, a’u uo talavou pele.

Ou te iloa o loo soifua le Atua, o Ia o lo tatou Tama moni oi le Lagi, ma o le a Ia tausia Ana folafolaga ia i tatou e faavavau. Ou te iloa o Iesu o le Keriso, le Alo Pele e Toatasi o le Tama i le tino, ma le Faaola o le lalolagi. Ua ou iloa na puapuagatia, maligi Lona toto, ma maliu ina ia tatou maua le ola e faavavau.

Ou te iloa na faaali le Tama ma le Alo i le taulealea perofeta o Iosefa Samita, le perofeta maoae muamua o lenei tisipenisione, o le na maligi foi lona toto o se molimau i lona valaauga, o le faailoga mulimuli o le faamaoni aiai o se tasi i ana feagaiga. Ou te iloa o na ki faaperofeta ua tuufaasolo ifo i se laina e le motusia i le 15 o isi tamalii seia oo mai i lenei taimi o loo i ai i le vaaiga ma le galuega faaperofeta a Peresitene Thomas S. Monson, o le faitaulaga sili pulefaamalumalu a le Atua i le lalolagi.

E moni lenei galuega. E moni nei tautinoga. Ua ou iloa e tutoatasi mai i se isi lava alii po o se tamaitai soifua na ola. Ua ou iloaina e ala i faaaliga a le Agaga Paia, lea e tuuina mai le taitaiga i lo’u olaga ma le taua i la’u molimau ma auina atu au—faatasi ma outou—e avea ma se molimau faapitoa i le Togiola o le lalolagi.