Ang Basahon ni Mormon Nagtudlo kabahin ni Jesukristo

Ang Daang Tugon naghisgut kanato kabahin ni Jesukristo sa wala pa Siya moanhi aron mopuyo sa yuta. Siya gitawag nga Jehova. Ang Daang Tugon naghisgut sa mga tawo kinsa misunod ni Jehova.

Ang Bag-ong Tugon usa ka basahon sa kasulatan nga naghisgut kanato sa kinabuhi ni Jesus dinhi sa yuta. Ang iyang mga disipulo misulat kabahin sa Iyang kinabuhi ug sa Iyang mga pagtulun-an.

Ang Basahon ni Mormon naghisgut usab kabahin ni Jesukristo ug sa mga tawo nga misunod Kaniya.

Ang Basahon ni Mormon nagsugod sa Jesuralem panahon sa Daang Tugon, mga 600 ka tuig sa wala pa matawo si Jesus. Kini naghisgut sa unsang paagi si propetang Lehi ug ang iyang pamilya mibiya sa Jerusalem ug gigiyahan ngadto sa yuta nga saad, tabok sa dagkong dagat [ocean] sa Bag-ong Kalibutan.

Ang mga propeta sa Basahon ni Mormon mitudlo nga si Jesus moabut sa kalibutan. Sila usab mitudlo nga ang paghinulsol ug pagsunod ni Jesukristo makahatag og kalipay.

Human si Jesus gilansang ug nabanhaw sa Jerusalem, Siya mibisita sa Bag-ong Kalibutan aron sa pagtudlo sa katawhan. Siya mitudlo kabahin sa bunyag, sa sakrament, ug unsaon sa paghigugma sa uban. Siya miorganisar sa simbahan uban sa napulog duha ka mga Apostoles. Siya mipundok sa mga bata ug mipanalangin kanila, sama sa Iyang gibuhat sa Bag-ong Tugon.

Sama sa mga propeta sa Biblia, ang mga propeta sa Basahon ni Mormon mipakigbahin sa ilang mga pagpamatuod ni Jesukristo.

Ang katapusang propeta sa Basahon ni Mormon mao si Moroni, kinsa natawo mga 400 ka tuig human nga mibisita si Jesus sa Bag-ong Kalibutan. Sa wala pa siya mamatay, si Moroni misulat nga bisan kinsa nga mobasa sa Basahon ni Mormon mahimong masayud nga kini tinuod kon siya mag-ampo nga may hugot nga pagtuo. Si Moroni midapit sa tanan sa “pagduol ngadto kang Kristo” (Moroni 10:32).

Ang mga bata karon mahimong mag-ampo usab aron makadawat og pagpamatuod nga ang Basahon ni Mormon tinuod ug si Jesukristo mao ang ilang Manluluwas.