Kaisug sa Pagsagubang sa Unos

Sa ikaduhang gabii sa among kamping sa Young Women sa stake, adunay dakong unos ug alimpulos. Ang akong ward adunay mga 24 ka batan-ong mga babaye nga nangapil sa kamping ug duha ka lider, ug kaming tanan kinahanglang mapaigo sa usa ka gamayng cabin alang sa proteksyon. Kusog kaayo ang bundak sa ulan, ug nagkagrabe ang hangin. Kanunay nakong gipahinumduman ang akong kaugalingon sa pag-ampo nga maluwas nga gihatag sa among presidente sa stake sayo pa niana. Ang among ward nag-ampo usab isip usa ka grupo sa among cabin, ug ako usab personal nga nag-ampo.

Daghan sa mga babaye ang nangahadlok, ug sayon rang makita kon ngano. Ang among cabin dili kaayo lig-on, ug kami duol kaayo sa usa ka suba. Mga 20 ka minutos ang unos migrabe pag-ayo nga ang tibuok stake kinahanglang mobalhin gikan sa ilang mga cabin sa ward ngadto sa mga cabin sa mga counselor, nga anaa sa mas taas nga lugar. Ang akong presidente sa stake nag-ampo pag-usab, ug kami nanganta og mga himno, mga kanta sa Primary, ug mga kanta sa kamping sa pagpaningkamot sa paghupay sa among kaugalingon. Oo, kami nangahadlok, apan kami mibati nga ang tanan mamaayo ra. Tunga sa oras human niadto mahimo nang mobalik sa among mga cabin sa ward.

Sa wala madugay among nasayran kon unsa ang nahitabo sa alimpulos niadtong gabhiona. Kini natunga ngadto sa duha ka unos. Ang usa niini milipot paingon sa among tuo ug ang usa ngadto sa wala. Ang among nasinati dili gani dako kaayong kadaut!

Nasayud ako nga ang Dios nakadungog sa among mga pag-ampo niadtong gabhiona ug Siya mipanalipud kanamo gikan sa dakong kadaut sa unos. Nganong matunga man ang usa ka alimpulos gawas lang kon pagbuot kini sa Dios? Nasayud ako nga diha sa unos sa kinabuhi, kita kanunay nga makaampo ngadto sa Langitnong Amahan ug Siya maminaw ug motubag kanato, maghatag kanato og kaisug ug proteksyon nga atong gikinahanglan aron kita luwas nga makasagubang niini.