Fili ʻa e Māmá

ʻI heʻeku kei siʻí, naʻá ku faʻa ilifia he fakapoʻulí. Naʻá ku faʻa fanongo ki ha ngaahi ongo faikehe he poʻulí. Kimuʻa peá u ʻalu ʻo mohé, te u lokaʻi kotoa e ʻū matapaá pea vakaiʻi mo hoku lalo mohengá. Ne u vakaiʻi foki mo ʻeku kōpate faʻoʻanga valá. Naʻe ʻikai ke u fakapapauʻi pe ko e hā e meʻa ʻoku ou ilifia aí, ka naʻe ʻi ai pē e ngaahi taimi ne u ongoʻi ilifia ai.

ʻI heʻeku ako ke lotú, ne u ongoʻi fiemālie mo nonga. Ne u fakatokangaʻi ha ongoʻi fiemālie pea ne u ʻilo te u malu pē mo hao.

Ko e taha e meʻa ʻoku ou manatuʻi mei heʻeku kei siʻí ko e māmá. ʻI heʻeku kei talavoú, naʻe silaʻi au mo hoku tokouá ki heʻema faʻeé mo e tamaí ʻi he Temipale Sōlekí. ʻOku ou manatuʻi e vala hinehina hoku fāmilí mo e niʻihi kehé, ʻa e maama lahi ʻo e temipalé, mo e ongoʻi nonga ne u maʻu he ʻaho ko iá.

Neongo ko ha ngaahi manatu ʻeni he ngaahi taʻu kuohilí, ka ʻoku ou manatuʻi ʻa e ilifia he fakapoʻulí pea mo e fiefia ne u ongoʻi he maama ʻo e temipalé. ʻI heʻetau feinga ko ia ke moʻui ʻaki e ongoongoleleí, ʻoku fakafonu kitautolu ʻaki e māmá, pea ʻoku ʻikai leva ha fakapoʻuli ʻiate kitautolu. ʻOku ʻikai ke fenāpasi e māmá mo e tuí pea mo e fakapoʻulí mo e ilifiá. ʻI hono fakafonu kitautolu ʻe he māmá, ʻoku tau ongoʻi fiefia, nonga mo malu. ʻOku ou ʻamanaki te tau fili maʻu pē ʻa e māmá.