Ko ʻEku Fakamoʻoni he ʻAho Kotoa Pē

ʻI heʻeku tupu haké, ne u fakasio maʻu pē ha taimi ʻe hoko ai ha meʻa fakaofo ke fakamoʻoniʻi kiate au ʻoku ʻi ai haʻaku fakamoʻoni. Naʻá ku faʻa fanongo he ngaahi talanoa lahi ki he ngaahi taimi fakaofo naʻe hoko ʻi he akó ʻo ʻiloʻi taʻe toe veiveiua ʻe he kakaí ʻoku moʻoni e ongoongoleleí. Naʻe lahi e ngaahi talanoá mei he tuʻumaʻu ʻo fakafepakiʻi e ʻahiʻahí pe faingataʻá, ki hono takiekina mai ha kakai ʻe laungeau ki he Siasí ʻi ha fanga kiʻi ngāue iiki mo faingofua, ʻo aʻu ki ha ngaahi taimi naʻe fakaava hake pē ʻe he kakaí e folofolá ki he potu folofola tonu pē ko e tali ia ki he faingataʻa ʻoku nau fehangahangai mo iá. Ko e ngaahi talanoa ne u manako aí ko ha taha naʻe fononga poʻuli ki honau ʻapí, ʻo hao mei ha fakatuʻutāmaki naʻe ʻikai ʻilo ki ai ka naʻá ne toki ʻiloʻi he ʻaho ʻe tahá. Ne u fanongo ʻi ha ngaahi talanoa kau ki ha ngaahi fakamoʻui fakaofo pe ko hano maluʻi ʻe he kau ʻāngeló ha kakai. Ne ʻikai ke u faʻa tatali ki ha taimi ʻe hoko mai ai kiate au ha meʻa tatau. Naʻá ku fakakaukau te u mamata ki ha kau ʻāngelo mo ha ngaahi maama te ne fakahaaʻi mai kiate au ʻoku ʻi ai haʻaku fakamoʻoni ki he Siasí.

Naʻe akoʻi au heʻeku ongomātuʻá ke lotu, ʻalu ki he lotú, lau e folofolá, tui e vala ʻoku tāú, moʻui maʻa mei he ngaahi tākiekina ʻa e māmaní, pea falala ki he ʻEikí. Naʻá ku maʻu e loto falala ke moʻui angatonu. Ka naʻá ku loto pē ke fakamoʻoniʻi ʻoku ʻi ai haʻaku fakamoʻoni pea ʻi ai ha taha te ne fakatokangaʻi au koeʻuhí ko e meʻa ko iá.

ʻI he efiafi fakafāmili ʻi ʻapí pe ʻi he Lautohi Faka-Sāpaté, ne mau ako ai e ngaahi meʻa ke lea ʻaki ʻa ia ʻe tokoni ki hono fakafepakiʻi e ngaahi takiekina fakatamaikí. Ne ʻikai ke u faʻa tatali ke fakaʻaongaʻi e ngaahi lea ko iá. Hangē ko ʻení, ne u fakakaukau ki ha ʻeva holo mo hoku ngaahi kaungāmeʻá. ʻE toʻo hake ʻe ha taha ha ʻolokaholo pea ʻave takai holo ia. ʻOku ʻomi e kapa piá kiate au pea nau sio kotoa mai kiate au. ʻE fakalalahi e mālohi e ivi takiekina ko iá. Ka te u tuʻu hake ʻo pehē atu, “ʻIkai, ko e Māmonga au, pea ʻoku ʻikai ke u inu ʻolokaholo!” ʻE ofo e taha kotoa. He ʻikai teitei lava heʻenau fakaʻaiʻaí ke u tukulolo. Faifai pea mātuku e fakafiefiá, pea haʻu ha taha ʻo talamai naʻá ne tanganeʻia heʻeku lototoʻá pea ʻokú ne loto ke ako lahi ange ki hoku siasí. ʻE hiva fakafetaʻi e kau ʻāngeló, pea ʻe fakafonuʻaki au e māmá.

Naʻe ʻikai ke teitei hoko ia. Naʻe ʻikai ke teitei ʻahiʻahiʻi au ʻe ha taha ʻi ha founga pehē. Naʻe hangē kuo nau ʻilo pē ʻeku tuʻunga moʻuí mo e founga ʻeku moʻuí. Naʻá ku ongoʻi loto-mamahi he naʻe ʻikai ke hoko mai e “momeniti fakaofó” ia.

Ka ʻi he taimi ní ʻoku ou maʻu ha fakamoʻoni ʻoku ʻikai ke maʻu ia mei ha hā mai ʻa e kau ʻāngeló. Ka ko ʻeku fakamoʻoní ʻoku maʻu ia mei hono moʻui fakaʻaho ʻaki e ongoongoleleí, ongoʻi e fakamoʻoni ʻa e Laumālie Māʻoniʻoní, mo fiefia he ngaahi tāpuaki faingofua ʻoku maʻu mei he talangofuá.

ʻOku ou ʻiloʻi ko hai au. ʻOku ou ʻilo ʻoku ʻofaʻi au ʻe he ʻOtuá. ʻOku ou ʻilo naʻe fakaleleiʻi ʻe he Fakamoʻuí ʻeku angahalá. Ko ʻeku fakamoʻoní ia. ʻOku ou maʻu ʻa e nongá ʻi hono ʻiloʻi ʻení.

He ʻikai te u pehē naʻá ku maʻu ha momeniti fakaofo ʻi heʻeku ʻiloʻi ʻoku moʻoni e Siasí, ka ʻoku ou fiefia ke ʻiloʻi ʻoku ʻi ai haʻaku fakamoʻoni. Pea ka ʻi ai ha taimi ʻe toki hā mai ai ha kau ʻāngelo kiate au, te u fiemālie pē ʻi he moʻui angamahení mo e tāpuaki faingofua ʻo hono ʻiloʻi ʻoku moʻoni e ongoongoleleí.