ʻe Lava Fēfē Ke Tau Fakaʻaongaʻi Lelei ʻA E Faingamālie Ke ʻAlu ki he Temipale?

‘Oku monūʻia e mēmipa kotoa ‘o e Siasi ‘o Sīsū Kalaisi ‘o e Kau Māʻoniʻoni ‘i he Ngaahi ‘Aho Kimui Ní, ke nau moʻui ‘i ha kuonga kuo ueʻi fakalaumālie ai ‘e he ʻEikí ‘a ‘Ene kau palōfitá ke toe fakalahi ‘a e faingamālie ke nau ofi ange ai ki he ngaahi temipale māʻoniʻoní.

Koeʻuhí ko ‘eku ‘ofa ‘iate kimoutolú, ko ia te u lea fakahangatonu atu ai ʻo ‘ikai toe heliaki. Kuó u mamata ‘i ha ngaahi taimi lahi ki ha niʻihi fakafoʻituitui kuo nau fai ha ngaahi feilaulau kāfakafa ke nau ō ki he temipalé ‘i ha feituʻu mamaʻo. Ka ko e taimi ‘oku langa ai ha temipale ofí, kuo taimi nounou pē pea ‘ikai ke ‘alu maʻu pē ki ai ha tokolahi. ‘Oku ‘i ai haʻaku fokotuʻu: Ko e taimi ‘oku ofi ai ha temipalé, ‘e lava ke hanga ‘e ha fanga kiʻi meʻa iiki ‘o veteki hoʻo palani ke ke ‘alu ai ki he temipalé. Fokotuʻu ha taumuʻa pau, fakakaukauʻi ‘a e tūkunga ‘okú ke ‘i aí, mo e taimi ‘e lava ke ke kau atu ai ki he ngaahi ouau ‘o e temipalé. Pea ‘oua naʻa tuku ha meʻa ke ne veteki e palani ko iá. ‘E fakapapauʻi ‘e he palani ko iá ‘oku faitāpuekina tatau pē ‘a kinautolu ‘oku nofo ofi atu ki ha temipalé, pea mo kinautolu ko ia ‘oku palani kimuʻa pea nau fai ha fononga lōloa ki he temipalé.

ʻOku ou poupou atu ke mou takitaha fokotuʻu haʻamou taumuʻa neongo pe ko e hā hono lahí, ke ke lava ‘o maʻu ai e ngaahi ouau ‘oku fai ‘i hotau temipale ‘oku lolotonga ngāué. Ko e hā ha meʻa ‘e toe mahuʻinga ange ‘i he ‘alu atu pea kau ‘i he ngaahi ouau ‘o e temipalé? Ko e hā ha ʻekitivitī te ne lava ke ʻomi ha ola lahi ange mo ha fiefia lahi ange mo ha nekeneka ʻoku mahulu atu ʻi he moihū he temipalé?

Te u vahevahe atu he taimí ni mo ha toe ngaahi fokotuʻu ki he founga ke maʻu ai ha lelei lahi ange mei he ʻalu ki he temipalé.

• ʻAi ke mahino kiate koe e tokāteline fekauʻaki mo e ngaahi ouau fakatemipalé, kae tautautefito ki he mahuʻinga ʻo e Fakalelei ʻa Sīsū Kalaisí.¹

• Lolotonga hoʻo kau atu ki he ngaahi ouau ‘o e temipalé, fakakaukau ki ho vā mo Sīsū Kalaisí pea mo Hono vā mo ʻetau Tamai Hēvaní. ʻE tataki ‘e he kiʻi ngāue faingofuá ni ha mahino lahi ange ki he natula fakalangi ‘o e ngaahi ouau fakatemipalé.

• Fakahaaʻi maʻu pē ʻi he faʻa lotu ʻa hoʻo houngaʻia ʻi he ngaahi tāpuaki taʻemafakatataua ʻoku maʻu mei he ngaahi ouau fakatemipalé. Moʻui he ʻaho kotoa pē ke fakamoʻoniʻi ai ki he Tamai Hēvaní mo Hono ʻAlo ʻOfaʻangá ‘a hoʻo mahuʻingaʻia ‘i he ngaahi tāpuaki ko iá.

• Fakataimi-tēpileʻi ha taimi tukupau ke ʻaʻahi ki he temipalé.

• Tuku ha taimi feʻunga ke ʻoua naʻá ke fakavavevave holo ʻi he loto temipalé.

• Toʻo ho uasí ʻi hoʻo hū ki he fale ʻo e ʻEikí.

• Fakafanongo tokanga mo loto tauʻatāina ki hono fakahoko e konga takitaha ʻo e ouaú.

• Tokanga ki he tokotaha fakafoʻituitui ʻokú ke fakafofongaʻi ʻi he ouaú. Lotua ke ʻiloʻi ʻe he tokotaha ko iá hono mahuʻinga ʻo e ngaahi ouaú pea moʻui taau pe teuteu ke taau mo e lelei ‘e maʻu mei aí.

ʻI heʻeku fanongo he taimi ʻe niʻihi ki ha kuaea lolotonga hano fakatapui ʻo ha temipale, ʻoku ou maʻu ha ongo makehe pea ʻokú ne hiki hake ai hoku laumālié mo e ʻatamaí. ʻOku ou kuikui pea kuo tuʻo lahi ʻeku sioloto atu ki ha falukunga kakai tokolahi ʻi ʻolunga he temipalé pea ʻalu pē taimí mo e fakautuutu honau tokolahí. ʻOku ou ongoʻi ʻoku nau fakafofongaʻi e ngaahi laumālie tokolahi ʻoku tatali mai ke fakahoko e ngāue fakafofongá maʻanautolu ʻi he feituʻu hūfangaʻanga ko iá, pea fiefia he faifai angé pea ʻi ai ha feituʻu ʻe lava ke fakatauʻatāinaʻi ai kinautolu mei he ngaahi seini ʻokú ne taʻofi ʻenau fakalakalaka taʻengatá. Ke lava ʻo fakahoko ʻení, kuo pau ke ke fai e ngāue fakafofongá mei heni. ʻE fie maʻu ke ke ʻilo hoʻo ngaahi kuí. ʻOku toe faingofua ange ʻa e ngāué ʻi he polokalama FamilySearch foʻoú ʻi ha toe taimi. ʻOku fie maʻu ia ke ʻiloʻi e ngaahi kui ko iá, teuteu e fakamatala ke lava ʻo fakahoko ai honau ouaú, pea haʻu ki he fale ʻo e ʻEikí ʻo fakahoko e ngaahi ouau kuo fuoloa ʻenau tali mai ke maʻú.

Ko ha meʻa fakafiefia ke kau atu ki he ngāue ʻo ha temipale!