Bishop Gérald Caussé

Sukad pa sa iyang pagkabata, si Bishop Gérald Jean Caussé, bag-ohay nga gitawag isip Unang Magtatambag sa Presiding Bishopric, nakakaplag kanunay og kalipay sa pagserbisyo sa Simbahan. Kana maayo nga butang, siya miingon, tungod kay diha sa iyang gamay nga branch sa Bordeaux, France, ang tanan gikinahanglan aron magpadayon ang unit. Dugang sa pagserbisyo sa mga korum sa Aaronic Priesthood sa iyang kabatan-onan, siya nagserbisyo isip Primary pianist sa edad nga 12, isip magtatambag sa Sunday School presidency sa edad nga 14, ug presidente sa Sunday School sa edad nga 16.

“Ang pagserbisyo sa Simbahan nakatabang nako nga makabaton og pagpamatuod,” siya miingon. Ang iyang amahan, kinsa kadaghan nagserbisyo isip presidente sa branch ug bishop, mahinungdanon kaayo sa positibong kasinatian ni Bishop Caussé.

“Sa dihang tin-edyer na ko, iya kong paubanon sa home teaching o pagbisita sa nanginahanglang pamilya,” miingon si Bishop Caussé. “Ang paglantaw kaniya, tingali mao ang labing maayo nga kasinatian sa pagkat-on aron sa pagpangandam sa pagpangulo sa priesthood.”

Sa wala madugay, si Bishop Caussé miserbisyo isip ward clerk, presidente sa elders quorum, high priests group leader, magtatambag sa bishop, magtatambag sa stake president, stake president, Area Seventy, ug ang pinaka bag-o isip sakop sa Unang Korum sa Seventy.

Si Bishop Caussé natawo sa Bordeaux, France, niadtong Mayo 1963, ngadto nila ni Jean ug Marie-Blanche Caussé. Siya nagserbisyo sa French Air Force sulod sa usa ka tuig sa batan-on pa, diin siya na-assigned sa NATO agency.

Iyang naangkon ang master’s degree sa business gikan sa ESSEC niadtong 1987. Iyang gisugdan ang iyang trabaho sa strategy consulting, diin siya migahin og unom ka tuig nga nagtrabaho sa mga opisina sa consulting firm sa Paris ug London. Sa wala madugay siya nagtrabaho sa usa ka dakong tindahan sa Europe, ug sa wala pa ang iyang calling sa Unang Korum sa Seventy niadtong 2008, siya nagtrabaho isip general manager ug sakop sa board sa pinakadakong tig-apud-apod og pagkaon sa France.

Siya ug si Valérie Lucienne Babin naminyo niadtong Agosto 1986 sa Templo sa Bern Switzerland. Sila adunay lima ka anak.