Elder Larry Echo Hawk

Me tekivu mai na siga oya ena 1972 a rogoca kina o Elder Larry Echo Hawk ni vosa o Elder Spencer W. Kimball (1895–1985) na nona sa raica rawa ni ra na iliuliu vuli o ira na iTaukei kei Amerika, sa solia na nona bula me “laveti ira cake na tamata.”

Ni lewe ni Pawnee Nation, a sucu o Elder Echo Hawk mai Cody, Wyoming e Amerika, ena Okosita ni 1948 vei rau o Ernest kei Jane Echo Hawk. A tubu cake e Farmington, New Mexico e Amerika, ka ratou a vakavulici ka papitaiso kina o koya kei na nona matavuvale mai vei ira na daukaulotu ni YDE ena 1962.

Ni yabaki 17, oti na kena lauta na matana e dua na polo ni baseball, a yalataka vua na Turaga ni kevaka ena sega ni boko na matana, ena wilika na iVola i Momani. A vinaka tale na matana ka wilika e ya 10 na tabana ena dua na siga me voleka ni tolu na vula.

“Oqori na gauna qaqa duadua vakayalo au qai bau sotava, ena nona vakadinadinataka vei au na Yalo Tabu ni dina na iVola i Momani,” e kaya o Elder Echo Hawk. “Na veika au sotava oqori sa vakaukauwataki au ena noqu bula taucoko me vukea na noqu tamata vinaka cake.”

A vakacurumi ki na Brigham Young University–Provo ena dua na sikolasivi ni veicaqe ka rawata na koroi ni vulici ni vakaukauwa yago kei na maroroi manumanu kila. Ena 1970 a vakasukai kina ena lagilagi mai na United States Marine Corps ni oti e rua na yabaki ni veiqaravi. A taura mai na University of Utah ena 1973 na nona koroi vakadoketa.

Sa veiqaravi oti o Elder Echo Hawk vakaloya, daubulilawa ni yasana, vunilawa ni yasana, parofesa ni lawa e BYU, ka iVukevuke ni Sekeriteri ni Tabacakacaka ni Veika e Loma vei Ira na Idia—e dua na itutu e dodonu me na vakacegu mai kina me rawa ni ciqoma na veikacivi ki na iMatai ni Kuoramu ni Vitusagavulu.

A vakaitavi o Elder Kimball ena nodrau vakamau o Elder Echo Hawk kei na watina, o Terry Pries, ena Valetabu e Salt Lake ena Tiseba ni 1968. Sa dau tu e yasana ena nona veiqaravi vakaqasenivuli, bisopi, lewe ni matabose e cake, ka peresitedi ni iteki. Erau nodrau itubutubu e ono na gone.