Tangkyu long Tija blong Mi blong Sandei Skul

Klas blong mi blong Sandei Skul i no oltaem kwaet. Mi lavem blong lisin long lesen evri wik, be samtaem ol narafalawan insaed long klas oli no stap lisin. Plante taem oli stap toktok long wanwan long olgeta o pleplei ol gem long ol lektronik tul taem tija blong mifala i stap traem blong tijim mifala. Sori, samtaem mi faenem se miwan mi pat blong problem ia.

Wan wik mifala i bin go mowas bitim oltaem, mo long en blong klas, tija blong mifala i bin krae bigwan from i no gat wan man i stap lisin long hem. Taem mifala i bin kamaot long klasrum, mi bin harem nogud from hem.

Long nekis Sandei, tija blong mifala i bin eksplenem se hem i bin prea fulap long wik ia, i bin lukaotem help, mo i bin hapen se hem i mas soem long mifala wan muvi blong Jos. Hem i statem muvi, we i abaot laef blong Jisas Kraes mo ol merikel we Hem i bin mekem.

Taem mi stap tingbaot muvi ia long naet ia, mi bin filim wan samting i defren. Kwiktaem nomo mi luksave se mi stap filim Tabu Spirit, moa bitim we mi bin filim bifo. Wantaem nomo mi disaed se mi wantem blong ol jenis long laef blong mi blong kam moa olsem Sevya, mo mi bin luksave se eksperiens ia long Sandei Skul long dei ia, i bin mekem testemoni blong mi i kam moa strong. Mi mi glad tumas long tija blong mi blong Sandei Skul mo evri samting we hem i stap mekem blong klas blong mifala evri wik.