Kalahngan ong Ahi Sounpadahk en Santi Sukuhl

Ahi pwihn en Santi Sukuhl sohte kin kasalehda wahu ansou koaros. I kin pereniki rong padahk nan wihk koaros, ahpw ekei pak E kin mwomwen me mehteikan nan ahi pwihno sohte kin pereniki rong. Re kin kalapw koasoaipene de mwadongki neirail mehn mwadong kan ni ansou me aht sounpadahko kin songosongen kasukuhlih kiht. I nsensuwedkihla pwe ekei pak I kin tehkada me I pil kin iang wia kisehn kahpwalo.

Ehu wihko se uhdahn suwed, oh ni imwin ansoun kasukuhlo, pilen mesen aht sounpadahko pa keredi pwehki sohte mehmen rong ah padahko. Ni aht aluhieisang nan aht perehn sukuhlo, I poakpoakehda ih.

Rahn Sarawi mwurin mwo aht sounpadahko kawehwehiong kiht me E kapakap pak tohto nan wihko, reperepen kaweid, oh E lemehda me E anahne kasalehiong kiht ehu kasdohn Mwomwohdiso. E tapiada kasdohu, me pid mour en Sises Krais oh manaman kapwuriamwei kan me E ketin kapwaiada.

Ni ahi wie medemedewe kasdohu nihsoutiko, I kehn mehkot ehu soahng. Ni ansouohte, I esehda me I wie kekehn Ngehn Sarawio, laudsang me I kin kehn ansou koaros mwowe. Ni ansouohte I koasoanehdi me I men wekidala ahi mour pwe I en ahpwete duwehla Sounkomouro, oh I esehda me irairo me I lelohng nan Santi Sukuhl rahno uhdahn kalaudehla ahi kadehde. I kalahnganki ahi sounpadahk en Santi Sukuhlo oh mehkoaros me E kin wia ong aht pwihn en sukuhl nan wihk koaros.