Pining e Magar ngak e pi Sensey ko Skul ko Madnom

Skul ko Madnom rog e gathi gubin ngiyal’ ma ba mocho’. Gu ba adag ni guma motoyil ko pi n’en ni yibe fil u lane gubin e wik, machane boech ngiyal’ ma ran ga’ar e boech e gidii’ u lane clas rog e dabun. Baga’ ni yaed ma non ngorad fa yaed be gosgos ko atari napan e sensey romad ni be sensey nag mad. Gu kiribaen riy, machane bingiyal’ gag e biyang ko fare magawon.

Reb e wik ma kari gel e kireb ngomad ko somm’on, ma tomur ko clas, me yoer e sensey romad ni bachan ni dariy bee’ ni ra motoyil ko n’en nibe fil. Napan ni gamad be chuw u lan fare class, ma kug kirbaen’ ngak.

Bin migid e Madnom me weliy e sensey romad nike meybil nib alamrin e re wik nem, nibe gay e kanawo’, ma yib ngak ni nge dag ngomad ba kachido ko galasia. Me tabab nag fare kachido, mornga’agen e yafas rok Yesus Kristus nge pi ma’ang’ang nike rrin’.

Napan ni gube lem nag e ra kachido nem e ra balayal’ nem, mug thamiy ban’en nib thil. Mug na’ab ni gube thamiy fare Kan Thothup, nib alamrin ko rogon ni yugma thamiy kafram. Tumgin mug adag ni ngug thilyeg rogon e paer rog ni ngug boed i Tathapeg, mug nang ni n’en nike buch ko Skul ko Madnom e ra raan nem e kari gel nag e mich rog. Ri gub falfalen’ ko sensey ko skul ko Madnom rog nge gubin ban’en ni ma rrin’ ni fan e clas romad ni gubin e wik.