Givim Seves Insaed long Tempol

Taem we mi kasem 17 yia, mi stat blong tingting series abaot fiuja blong mi, mo mi bin prea long Papa long Heven abaot wanem mi save mekem blong mekem mi rere blong go long wan misin mo blong kasem Melkezedek Prishud. Mi bin filim se mi nidim blong go long tempol fulap from se hem i haos blong Lod mo bae i ples we mi save kam moa kolosap long Papa blong mi long Heven.

Mekem se mi bin setem wan gol blong mekem 1,000 baptaes long wan yia. Mi bin filim tru nid ia blong setem gol ia; mi bin livim kakae blong save sapos hemia i wanem we mi mas mekem. Papa blong yumi long Heven i bin ansarem mi, mo mi stat blong go long Tampiko Meksiko Tempol evri Satedei.

Afta we mi bin mekem 500 baptaes, mi bin setem wan gol blong mekem famle histri long ol bubu blong mi, mo mi laekem tumas blong lukaotem ol famle, we i mekem se mi no save silip from mi stap lukaotem ol nem. Mi faenem 50 nem mo eit generesen blong famle histri blong mi; mi bin help blong mekem tempol wok blong olgeta.

Mi bin mekem ova 1,300 baptaes long en, mo mi bin graduet long seminari, mi bin kasem Melkezedek Prishud, mo mi stap naoia olsem wan fultaem misinari, we i wan long ol bigfala gol blong mi long laef.