Kacivaka na Lotu na Lewenivuli Vou ni iTabagone me baleta na 2013

Sa kacivaka na Lotu e dua na lewenivuli vou— Ia Mo Lako Mai, Mo Muri Au: iVurevure ni Vuli me baleti Ira na iTabagone —me baleti ira na veikuoramu ni Matabete i Eroni, kei na kalasi ni Goneyalewa, kei na itabagone ena Matawilivola ni Sigatabu me baleta na 2013.

E dua na inaki levu ni Ia Mo Lako Mai, Mo Muri Au me vukei ira na qasenivuli—ena lotu vakakina e vale—me ra veivakavulici me vaka na iVakabula, me caka na lesoni me vaka e dua na veitalanoa ka yavutaki ena kosipeli. Era na sureti na itabagone me ra na vakaitavi vakalevu cake ena veivakavulici kei na vuli.

“Na vakanamata e vagolei ki na vaqaqacotaki kei na tarai cake ni vakabauta, na saumaki mai, kei na ivakadinadina, ena kena vakayagataki na nodra ivakavuvuli buta katakata duadua na Vakaitutu Raraba kei na mataveiliutaki raraba ni veimataisoqosoqo,” e tukuni ena dua na ivola ni Mataveilitaki Taumada ena 12 ni Sepiteba, 2012.

Na Ia Mo Lako Mai, Mo Muri Au e tauyavutaki ena veiwasewase lalai ka vakanamata ki na dua na ulutaga vakaivunau ena veivula qai wasei ena Matawilivola ni Sigatabu, kalasi ni Goneyalewa kei na Matabete i Eroni.

Ena dua na iwasewase e tiko kina e levu cake na lesoni mai na kena e rawa ni vakavuvulitaki ena dua na vula, era sa kerei kina na qasenivuli kei ira na iliuliu me ra vakasaqara na veivakauqeti ka veitaratara me lewai kina na ituvatuva ni lesoni me vakayagataki.

E dua na ivoladusidusi vou, Vakavulica na Kosipeli ena iVakarau ni iVakabula, ena vukei ira na iliuliu kei na qasenivuli me ra kila vakavinaka cake na ivakarau me moici kina na lesoni ki na nodra gagadre na nodra itabagone kei na ivakarau me ra vukei kina na itabagone me ra vulica na kosipeli.

Na lesoni kece e rawa ni taba mai na Initaneti. Na Ia Mo Lako Mai, Mo Muri Au sa na vakarau tu ena dua na siga mai muri. Ena mua ni 2012 sa na vakarautaki tu ena Initaneti na ituvatuva kece sara ni lesoni ena 23 na vosa.

Sa na rawa vei ira na lewenilotu, iliuliu, kei na qasenivuli me ra raica na lewenivuli vou ena lds.org/youth/learn.

Era na vakarautaka na iliuliu mai na iwasewase kei na noda veivanua na veituberi ena vukudra na iliuliu kei na qasenivuli ni bera ni cava na 2012.