Ewe Pwin me Mwen Krismas mi Fakkun Allim

Non ai ua marita, ewe pwinn mwen Krismas a eu fansoun mi fakkun apwapwa. Am me chon ai famini aua föri pizza, feino kon fetan, me chufengen ren eu fennen Krismas. Aua kon non sokkopaten ngingi me neuommong ne etiki konun Krismas won sokkopaten pisekin ettik. Semem a osupwano ewe pwinn ren mefian usun Krismas me ena a efisi am kechiwen pwapwa. Manau ese tongeni öchuno nap seni ewe pwinn me mwen Krismas.

Nupwen ua ekkis wattetä, inei we a poputa ne tutumunu emon nengin chon ewe neni, iten Kelli. Kelli a chok fefeito ren imwem iteitan ran mwirin sukun nupwen inan we, Patti, a chok akangang. Kelli a tapweto mwiri usun chok emon kukkuk konak—a neuomong o pwan tipemong. A kinamwe nupwen fansoun Patti a angei noun we nengin me ra feino seni imwei me ai famini a kinamweno.

Fan eu December, ua fakkun nuokus nupwen inei we a tungor Patti me Kelli ar repwe fiti kem non ewe pwinn me mwen Krismas. Ai Pwinn me Mwen Krismas. Inei we a takir me a apasa, “Esapw tongeni siwini mettoch.” Nge ngang mi sinei nap seni i. Repwe eitano anem pizza. Kelli epwe turunufasei am kewe kon. Ua fangeta ngeni ewe Pwinn me mwen Krismas mi fakkun ngau nap seni meinisin.

Nupwen ewe pwinn a eto, Patti me Kelli ra fitikem, me aua fofos me takir me kon fengen. Mi pung ren Inei we. A unusen allim. Nupwen a sereni nukenepwin ra apasa kinisou ngeni kem iwe ra pwan feino. Ua feino annut nge netipei a uren tong me kinisou. Ua kaeo pwe ekkewe niffangen Krismas mi auchea rese ta ren ach aea fengenir. Nge ra fen ochuno me achommongono nupwen sia fangereno.