Veiwasei vata kei na dua na iTokani

Ena dua na siga niu vakarautaka tiko na noqu lesoni ni semineri, a yaco mai vei au e dua na ka veivakurabuitaki totoka ka taudonu. Ena noqu wilika tiko na lesoni me baleta na siga ka tarava, au a raica na matana e dua noqu itokani mai koronivuli kau vakila deivaki ni dodonu meu na wasea vua na noqu ivakadinadina.

Dina ga ni matata na ka veivakurabuitaki oqo, au a domobulataka. Au a taqayataka de na mani besetaki au na noqu itokani, vakabibi baleta ni o koya e sega ni vaka na mataqali goneyalewa ka rawa ni na taleitaka me lewe ni Lotu.

 Au nanuma lesu tale e dua na vosa nei Sisita Mary N. Cook ena mataveiliutaki raraba ni Gone Yalewa ena nona a bolei keda me da cakacaka vakaukauwa ka vosa vakadodonu.¹ Au vinakata me vakaoqo, au mani vola e dua na ivola vua na goneyalewa oqo ka vakadinadinataka na dina ni Lotu kei na noqu taleitaka na iVola i Momani. Ena siga ka tarava au a vakacuruma e dua na iVola i Momani, vata kei na noqu ivola, ena loma ni nona beki.

 Au qai kurabui, ni a ciqoma vakarawarawa na kosipeli na noqu itokani. Me tekivu mai na siga o ya, ena dau tukuna tiko vei au se cava a vulica ena nona wilika na iVola i Momani. Ni oti e vica na macawa, au mani vakatakilai koya kivei rau na daukaulotu. Sega walega ni bera, nona sa ciqoma na veivakadeitaki mai na Yalo Tabu ni veika sa vulica tiko e dina. Au a tagi vata kei rau na daukaulotu ena nona tukuna vei keitou na veika e a vakila. Sa mani papitaiso sara na noqu itokani, ka rau sa qoroqoro na nona itubutubu ena veisau rau sa raica vua.

 Au sa marautaka dina niu a vorata na noqu lomataqaya ka vukea na kena vakauti na kosipeli ki na bula ni noqu itokani.