2013
Jenisim Laef i go long Lod
Febwari 2013

Visiting Tijing Mesej, Febwari 2013

Jenisim Laef i go long Lod

Wetem prea, stadi long toktok ia, mo olsem we i stret, toktok raon long hem wetem ol sista we yu stap visitim. Yusum ol kwestin blong helpem yu blong mekem ol sista blong yu oli kam strong moa mo blong mekem Rilif Sosaeti i kam wan aktiv pat long laef blong yu. Blong kasem moa infomesen, go long reliefsociety.lds.org.

Pikja
Rilif Sosaeti sil

Fet • Famle • Help

Ol niu sista blong Jos—wetem Ol Yang Woman we oli stap kam insaed long Rilif Sosaeti, ol sista we oli stap kambak long Jos, mo ol niu konvet—oli nidim sapot mo frensip blong ol visiting tija. “Taem ol memba oli tekempat, i wan impoten pat blong holemtaet niu konvet mo karembak ol lesaktiv memba oli kambak fulwan long aktiviti,” Elda M. Rasel Balad blong Kworom blong Olgeta Twelef Aposol i talem. “Pikimap visen ia se Rilif Sosaeti … i save kam [wan long] ol frensip risos we i gat moa paoa we yumi gat long Jos. Go aot eli long olgeta we oli stap tijim olgeta mo stap mekem olgeta oli kambak bakegen, mo lavem olgeta insaed long Jos tru long oganaesesen blong yu.”1

Olsem ol memba blong Rilif Sosaeti, yumi save helpem ol niu memba blong oli lanem ol besik praktis blong Jos, olsem:

  • Givim wan toktok.

  • Stap serem testemoni.

  • Stap laef folem loa blong livim kaekae.

  • Stap pem taeting mo ol narafala ofring.

  • Tekempat long wok blong famle histri.

  • Mekem ol baptaes mo ol konfemesen blong ol olfala we oli bin ded finis.

“I nidim ol fren we i save lisin, blong mekem ol niu memba oli filim kamfot mo welkam long jos,” Elda Balad i talem.2 Yumi evriwan, be speseli ol visiting tija, oli gat ol impoten responsabiliti blong mekem fren wetem ol niu memba olsem wan wei blong helpem olgeta blong “jenisim laef blong olgeta [fulwan] i kam long Lod” (Alma 23:6).

I Kamaot long Ol Skripja

2 Nifae 31:19–20; Moronae 6:4

I Kamaot long Histri blong Yumi

“Wetem namba blong ol konvet we i stap go antap oltaem,” Presiden Godon B. Hinkli i talem (1910–2008), “yumi mas traehad bigwan blong givim moa help long olgeta taem oli stap faenem rod blong olgeta. Olgeta evriwan i nidim tri samting; wan fren, wan responsabiliti, mo blong stap fidim olgeta wetem ‘gudfala toktok blong God’ (Moronae 6:4).”3

Ol visiting tija oli stap long gud ples ia nao blong helpem olgeta we oli stap visitim. Fasin blong mekem fren i kam faswan, olsem we i bin hapen long wan yang Rilif Sosaeti sista we i bin visiting tija blong wan olfala sista. Oli bin slo blong mekem fren kasem taem we oli bin wokbaot saedsaed long taem blong wan projek blong klinap. Oli bin kam fren, mo taem tufala i bin stap tokbaot Visiting Tijing Mesej, tugeta, tufala i bin kakae gud “long gudfala toktok blong God.”

Presiden Josef Filding Smit (1876–1972) i bin talem se Rilif Sosaeti “i wan impoten pat blong kingdom blong God long wol ia mo … i helpem ol fetful memba blong hem blong kasem laef we i no save finis long kingdom blong Papa blong yumi.”4

© 2013 i kam long Intellectual Reserve, Inc. Oli holem evri raet.Oli printim long YSA. Oli letem long Inglis: 6/12. Oli letem translesen: 6/12. Translesen blong Visiting Teaching Message, February 2013. Bislama. 10662 852

Ol Not

  1. M. Russell Ballard, “Members Are the Key,” Liahona, Sept. 2000, 18.

  2. M. Russell Ballard, Liahona, Sept. 2000, 17.

  3. Gordon B. Hinckley, “Every Convert Is Precious,” Liahona, Feb. 1999, 9.

  4. Joseph Fielding Smith, long Daughters in My Kingdom: The History and Work of Relief Society (2011), 97.

Wanem Mi Save Mekem?

  1. Mi stap prea from kompanion blong mi mo askem se Spirit bae i lidim mitufala taem mitufala i helpem ol sista blong mitufala?

  2. Long wanem wei nao yumi givim seves long wanwan sista we yumi stap luakotem blong mekem se oli save se yumi kea gud long olgeta?