A faaora i to’u aau

I te mahana faahanahanaraa no te poheraa o to’u taea‘e, ua feruri au i ni‘a i to’u taime mai te mahana a pohe ai oia. Ua haamana‘o vau eiaha noa te mauiui rahi ta’u i farii, oia’toa râ te mau haamaitairaa ta te Fatu i horo‘a no’u.

Aita roa vau i taa maitai, e nahea te mau taata e ti‘a ai ia parau e, te pohe o te hoê taata i herehia e nehenehe e hopoi mai i te haamaitairaa. Aita roa vau i taa maitai, e nahea vau ia farii i te oaoa e te aau mehara no te hoê mea o te haamauiui roa ia’u. Te vai ra hoê pô, inaha, o tei taui i te taatoaraa o to’u hi‘oraa atea.

Ua ti‘a mai au i te maororaa pô e te aau teiaha mau, o ta’u i ore a‘enei i farii. E mea teimaha roa te oto. Ua topa turi atu vau e ua uuru i te hoê pure i to’u Metua i te Ao ra. I to’u oraraa atoa, ua haapiihia vau no ni‘a i te Taraehara e te mana faaora, e semeio ho‘i, a Iesu Mesia. E teie nei, ua tamatahia to’u faaroo. Te ti‘aturi mau ra anei au ? Ua ani au i to’u Metua i te Ao ra ia faaora mai i to’u aau. E oto rahi mau teie no’u ia faatitiaifaro o vau ana‘e.

I muri iho ua tupu te hoê mana‘o hau, te tamahanahana e te here i ni‘a i te taatoaraa o to’u tino. E au ra ia’u e, ua tauahi te Atua i To’na na rima ia’u ma te paruru ia’u i te oto rahi o ta’u i farii. Te vai mo‘emo‘e noa ra to’u taea‘e ia’u, tera râ e nehenehe ta’u e hi‘o ma te mata taa ê. E rave rahi mau mea no’u nei ia haapii mai na roto i teie iteraa.

Ua ite au te vai noa ra te here e te hau o te Fatu. E ti‘a noa ia tatou ia rave mai.