Poraus seni ewe Aewin Presetensi, March 2013
Kinamwe, Kopwe Asoso
Fan eu ran ekkoch ier ra no, mwirin ua tumunu ekkoch mettochun angang, ua mefi pwe upwe churi emon fefin mi mano punuan i emon chon nonnom non neninen tumunu chinnap non Salt Lake City. Ua chok wawa wai we ikkewe.
Nupwen ua feino ngeni rumwan, ese wor masouan. Ua eisini emon chon angang ia a nom ia me a emweniei ngeni eu nenien asoso. Ikkewe ua kuna ei fefin mi mano punuan a chufengen ren pwiin we me pwan emon chienan. Aua pwapwa ne poporaus fengen.
Nupwen aua poraus, emon mwan a feino ngeni ewe rumw ne angei unuman soda seni ewe mwasin. A nengeniei me a apasa, “En, ka Tom Monson.”
“Ewer,” ua pwonueni. “Me ka nikinikinin emon Hemingway.”
A ponueni pwe i Stephen Hemingway, noun Alfred Eugene Hemingway, a wisen ai chon aninis nupwen ua emon pisiop fitu ier me nom me ua chok kokkori pwe itan Gene. Stephen a ereniei pwe seman we a nom non ewe chok neni me chipu epwene mano. Gene a kokkori itei, me chon ewe famini ra mochen fos ngeniei nge rese tufichin kuna eu nampan fon fan itei.
Ua muttir feino ren Stephen ngeni rumwen ai chon aninisin nom, ikkewe a wor pwan ekkoch noun kewe semirit ra chufengen, me punuan we a fen mano ekkoch ier me nom. Ekkewe chon famini ra nuku pwe ai kuna Stephen non ena rumwen asoso pwe ponuen Semach won Nang ren ar ennetin mochen pwe upwe kuna semer me mwen a mano me ponueni an kokko. Ua pwan mefi ina usun, pun ika Stephen ese tonong non ewe rumw ikkewe ua nom non ewe chok fansoun a feito, usap fen sinei pwe Gene a nom non ena neni.
Aua awora eu efeioch ngeni. Ewe ngunun kinamwe a nonnom. Aua pwapwa ne chufengen, me mwirin ua su senir.
Sorotan emon a kokkoriei me pwar ngeniei pwe Gene Hemingway a mano—ukukun 20 minoch mwirin angei efeioch seni am me noun we at.
Ua pwarata eu iotekin kinisou ngeni Semach won Nang ren An emwen, minne a emweniei ai upwe feino ngeni ewe nenien tumunu chinnap me a emweniei ngeni chienei we Alfred Eugene Hemingway.
Ua nuku pwe ekiekin Gene Hemingway non ena pwinin—nupwen ewe Ngun mi Fel a nom neich, a pwan ikiotek netipetekison, me a awora feiochun pristut—a pwan nikinikin kapasen ewe kon “Master, the Tempest Is Raging”:
Kopwe nonnom, O Chon Angaseno mi fefeioch!
Kosap nikitiei ai upwe aneamon,
Me ren pwapwa upwe tori ewe neni mi feioch
Me upwe asoso non ena nenien kinamwe.
Ua chuen tongei ena kon me ua pwarata usun ewe kinamwe a awora:
Ina mo nowatten nesat mi menumen
Are chon ir mi ngaw are met chok,
Ese wor sat epwe orumi ewe siip ikkewe a nom
Ewe Mastan sat me fonu me nang.
Ir meinisin repwe anneasosichi netipom:
Kimanwe, kopwe asoso.1
Seni chonun mas me sossot, seni niuokus me netipechou, seni tipemwaremwar me memefin anaemon mwirin chon tongei ra mano, mi wor pwarata pwe manau ese much. Ach Samon me Chon Amanau mi ewe minen pwarata mi manau.2 An kapas non pukfel mi och: “Oupwe ukutiw ne fiu, iwe oupwe sinei pwe ngang Kot” (Psalm 46:10). Ua pwarata pwe mi ennet.
© 2013 seni Intellectual Reserve, Inc. Meinisin pung mi kawor. A för non Amerika. Kapungunon non fosun Merika: 6/12. Kapungunon chiakun: 6/12. Chiakun First Presidency Message, March 2013. Chuukese. 10663 901
Afanafan seni Ei Poraus
Ei poraus mi tongeni awora kinamwe ngeni ekkewe ir mi tongei emon a mano are ekkewe ir ra weires fan osukosuk. Fiti porausen Preseten Monson, kopwe ekiekin aporausa eu nein ekkei wokisin, anongonong won namwotan ekkewe ir ka aiti: Job 19:25–26; 1 Korinth 15:19–22; Mosaia 24:13–15; Doctrine and Covenants 122:7–9. Ika ka angei emwen, kopwe tongeni pwarata usun ewe kinamwe ewe Chon Amanau a awora ngonuk non om sossot.