Gapas, Dam Mithmith

Reb erran boechi duw ni ke yaen, tomuren kug mu’ boech e muruwel u office rog, Kug thamiy e thamtham nib gel ningu waen ngug nang fan rebe pinn ni ke yim’ pomm’on rok irbe paer ulane tafen e gidii’ nikar labthir ulane Salt Lake City. Kug waen u karo rog nib papay.

Nap’an kug taw nga singil rok, Demo’ bee’ riy’. Kug fith ngak bee’ ko bu’uw ni ke yaen ngan me pii’eg nga reb e singil ko tofan. Aram kug piry’eg cha’ney ma irbe sabethin ko e walagen nge reb e fagar rok. Kug sabathingaed mug faflaen’gaed uta’abang.

Nap’an e sabathin romaed, reb e mo’on ke yib nga singil ere rayog ninge fek e cola ko vending machine. Ke sap ngog me yog, “Arragon, i gur i Tom Monson.”

“Arragon,” Kug fulweg. “Gab wad ya’an i Hemingway.”

Ke yoeg i’ir e Stephen Hemingway, fak Alfred Eugene Hemingway, ni ke pigpig ni counselor rog nap’an gag reb e bishop boech i duw ni ke yaen mug pinning fithingan ni Gene. Stephen ke yoeg ni chitamangin e bay kore ta’abrogon e facility nam me ke chuchgur ni nge yim’. Gene e yugbe yoeg fithingag, nge tabinaew rok e kar gayed rogon ningar noned ngog machane dab kar piriyeg’ed e numba ko telephone rog.

Kug chuw ko pi cha’nem mug warow Stephen nga singil ko counselor rog, ni bay urngin e bitir rok nikar mo’olungaed, e pinn rok e ke yim’ boech e duw faram. Chongin e tabinaew kar lemnoged ni kug mada’nog e Stephen u tafen e tofan i’ir e fulweg ko e Got ni Chitamangdad nu Tharmiy ko adag roraed ningu guyed e chitamangraed ou’moon nira yim’ mug fulweg e ning rok. Mug thamiy ni ta’abrogon, bachane fa’anra Stephen dabki yib nga singil nem nap’an kug sabathin ko binem e ngiyal’ nike rin’, dabkug nang ni bay Gene ko rigin’nam.

Kug yibliynoged. Me yib e ya’el ko gapas. Kug sabathingaed nib fel’, ma tomuren kug waen.

Bin magid e kakadabil kug thapeg e phone call me yog Gene Heminway nike yim’— riliw e minute tomuren ke thapeg fare taw’ath ni kug pii’ew ngak i gag nge fak.

Kug gog e meybil ko magar ngak e Got ni Chitamangdad ko tharmiy ko ayuw Rok, ni ke pinninged ningu waen kore care center nem me pii’eg nga fagar nib t’uf ngog i Alfred Eugene Hemingway.

Guba’adag ningu lemnog ni lem ku Gene Heminway fare nep nem—nap’an kug thamiyed e gwael ko Ya’el, mug ninged e meybil nib sobut’aen’, mug pii’ed e taw’ath ko priesthood— Pilung, “Master, the Tempest Is Raging”:

Kab t’uf e re tang nem rog ma gube micheg nima pi e gapas.

Udakaen e maap luwag nge sikeng, ufithik e rus nge kirebaen’, ufithik e amith ko gum’racha’ nge kirebaen’ ko yam’ e gidii’ nib t’uf, bay e milwol ni yafas nib manemus. En Somoel nge Tathapeg rodad i’ir e m’ag ko tin riyul’ ney.² E thin rok e be u chepin thothup ba fel’: Dam mithmith, mu nanged I gag Got” (Psalm 46:10). Gube pii’ e m’ag ko riyul’ ney.