Wiik in Ijtō
Ad Rilo̧mo̧o̧r Jisōs Kraist eaar kakūrm̧ool Pinmuur eo—me ekoba en̄taan eo An ilo Gethsemane, debwāāl eo An ilo Golgotha, im Jerkakpeje eo An jān lōb—ilo wiik eo āliktata in mour eo An.
Ilo Ko̧o̧njeļ eo ilo Lan̄ m̧okta jen an kar laļ in ejaak, Jemedwōj Ilan̄ eaar kwaļo̧k karōk eo An n̄an kōj, ajri ro Nejin. Jaar lam̧ōj kōn lan̄lōn̄ ke Jemedwōj Ilan̄ eaar kālet Jisōs Kraist n̄an kōm̧m̧ane lo̧mo̧o̧r eo (lale Job 38:7 im Abraham 3:27). Ļotak jen Mary ilo Bethlehem, Jisōs eaar ejjeļo̧k an jerawiwi. Kōn Pinmuur eo An, jemaron̄ bar jepļaak im mour ippān Jemedwōj Ilan̄ im bōk mour indeeo. Jisōs Kraist enaaj bar itok ilo kajoor im aiboojoj n̄an jokwe ioon laļ in ilo Millenium, im Enaaj jutak āinwōt Riekajet eo an aolep armej ilo raan eo āliktata.
Pija kein rej jān pija in Baibōļ ko me rej kwaļo̧k wiik eo āliktata in mour eo an Rilo̧mo̧o̧r eo. Ļōmņak in riiti eoon ko kar kōlaajraki n̄an kajjojo pija. N̄an juon laajrak in iien ko ejejjet, jaat in ej kwaļo̧k ekōjkan karōkan jeje ko rekwojarjar jān Ko̧jpeļ bok ko emān ilo Bible Dictionary ak Guide eo n̄an Jeje ko Rekwojarjar. Pija in Baibōļ ko rej pād ilo biblevideos.lds.org.
Raan eo kein kōļalem m̧okta jen Kejota eo, Jisōs eaar iuwe ioon juon ton̄ki n̄an Jerusalem āinwōt kar kanaan kake. Armej raar kile E āinwōt aer Kiin̄, raar lam̧ōj “Hosana,” im raar erļo̧ke nuknuk ko aer im raan wōjke ko n̄an ere im̧aan iaļen donkey eo. (Lale Matu 21:1–11; Mark 11:1–11; Zechariah 9:9.)
Images © IRI
Ilo iien eo kein karuo ilo tōre in kwaļo̧k eo an ilo kanniōk, Jisōs eaar karreoik meļan ko an tampeļ eo. “Naaj likūt etan m̧weo im̧ōn jar, a kom̧ij kōm̧m̧ane ro̧n̄ an ro ri kowadōn̄,” E ar jiron̄ļo̧k ruiakake ro (Matu 21:13). Innām elōn̄ iaan ripilo ro im rikūrro ro raar itok n̄an E ilo tampeļ eo, Eaar kemour er. Ak ke pris ro reļļap im skraib ro rej lo menin bwilōn̄ ko An, raar illu im pukōt juon wāween n̄an kakkure E. (Lale Mau 21:12–17; Mark 11:15–19.)
Images © IRI
Jisōs Kraist, eo Nejin Jemed Emake wōt, kar jilikintok n̄an laļ bwe en lo̧mo̧oren aolep armej jān Wōtlo̧k eo. (Lale 1 Nipai 11:16–22, 26–33; Alma 7:10–13.)
Images © IRI
Ilo aolepān wiik eo, Rilo̧mo̧o̧r eo eaar kwaļo̧k jet iaan katak ko An rem̧m̧an tata, ekoba katak ko kōn kōrā eo emej pāleen. (Lale Mark 12:41–44; Luk 21:1–4.)
Images © IRI
Ilo jikin Kallib Gethsemane, Rilo̧mo̧o̧r eo eaar bukwelōlō im jar, Eaar en̄taan kōn jerawiwi ko an laļ kōm̧m̧an bwe En udiddid kōn metak, im to̧o̧rļo̧k bōtōktōk ilo ron̄in ānbwinnin, im en̄taan jim̧or ilo ānbwin im jetōb (lale D&C 19:18). Tokālik Judas Iscariot im juon kumi in ritariņae raar jibwe Jisōs, im aolep rikaļoor ro raar būrom̧ōj kōn Irooj im ko. (Lale Matu 26:36–56; Mark 14:32–50; Luk 22:39–53.)
Images © IRI
Ilo kōjota eo An āliktata, Jisōs eaar kallim̧uri rikaļoor ro An bwe renaaj bōk Rikaenōm̧m̧an eo, ak Jetōb Kwojarjar, n̄e Ej ilo̧k. Eaar katakin er n̄an keememej E kōn bōk kwojkwoj eo. Ilo jem̧ļo̧kin ļo̧k jotan eo, Jisōs eaar jar kōn rikaļoor ro An ijo Eaar jar bwe rikaļoor ro an ren maron̄ erom juon wōt ilo ippān doon. (See Matu 26:17–30; Mark 14:12–26; Luk 22:14–32; Jon 13–17.)
Images © IRI
Ālkin juon tōre epen im ekōmetak, Jisōs Kraist eaar kōtļo̧k E make n̄an debwāāl, kadedeļo̧k “katok eo eļap im āliktata” bwe en kōm̧m̧an iaļen lo̧mo̧o̧r n̄an aolep ajri ro nejin Anij (lale Alma 34:14–15). M̧okta jen an bon̄, ro rikaļooran Jisōs raar kōm̧akūt Ānbwinnin jān debwāāl eo, kanuknuk E kōn nuknuk im toļoje, im likūt E ilo juon lōb. (Lale Matu 27; Luk 23; Mark 15; Jon 19.)
Images © IRI
Joraanlo̧k in jibbon̄in Jabōt eo, Mary Magdalene im kōrā ro retiljek jet raar tōkeak ļo̧k ilo lōb eo n̄an kapit ānbwinnin Jisōs. Raar lo mejān lōb eo em̧ōj an jabwil ļo̧k im ruo enjeļ raar kwaļo̧k ennaan in ekabwilan̄lōn̄: “E jako ijin: Bwe E ar jerkakpeje” (Matu 28:6). Jerkakpeje Rilo̧mo̧o̧r eo em̧ōj an anjo̧ jān mej an kanniōk im kapidodoik n̄an kōj kajjojo n̄an bar mour: “Bwe āinwōt ilo Adam ro otemjej rej mej, āindein barāinwōt ilo Kraist ro otemjej re naaj mour” (1 Korint 15:22). (Lale Matu 28; Mark 16; Luk 24; Jon 20).
Images © IRI