Ɔasoɛr

Jesus Christ No Wusoɛr ho nokwar dasegye yɛ enyidado nye enyimpi si ho farbaa. Na dɛm so obotum ayɛ ama Nyankopɔn ba biara. Dɛm na ɔyae maa me wɔ Ɔbiradze 1969, ɔhyewber da kor bi a menã wui, menya no mber a egu mu yi, na ɔbɔkɔ do akɛpem dɛ mubohu no bio.

Ntsɛmara na enyigye bɛhyɛɛ mpaapaa mu tsiabaa no mu awerɛhow no anan mu. Nna ɔbor enyidado a ɔwɔ ma enyigye nhyiamu bio no. Osiandɛ Ewuradze edua No nkɔnhyɛfo mu ada dodow edzi no na osiandɛ Sunsum Krɔnkrɔn no esi Wusoɛr no ho nokwar no pi ama me no ntsi, mutum hu wɔ m’adwen mu mbrɛ ma nkabɔmu a yɛbɛsan nye hɛn adɔfo a wɔatsew hɔnho na wɔasoɛr efi owu mu no bɛyɛ.

“Woyinom nye hɔn a wɔbɔsoɛr wɔ atseneneefo wusoɛr no mu. …

Wonyinom nye hɔn a wɔakyerɛw hɔn edzin wɔ sor, bea a Nyankopɔn na Christ yɛ adze nyina do ɔtsɛmbuafo no.

“Woyinom nye hɔn a wɔtsen a wɔnam Jesus a ɔyɛ ahyɛmu fofor mu ntamugyinafo no do woedzi mu no, ɔno nankasa no bɔgyaa a okyii dze bɔɔ werdam a odzi mu no” (D&C 76:65, 68–69).

Osiandɛ dɛ Jesus Christ bubuu owu no mpokyerɛ mu ntsi, Ɔsor Egya Ne mba a wɔwoo hɔn ba wiadze yi mu nyina dze nyimpadua a orunnwu da bɔsoɛr efi owu mu. Ntsi emi na ɔwo hɛn dasagye wɔ dɛm nokwar a ɔyɛ enyimnyam ho yi botum eyi ebusuanyi anaa nyɛnko bi a oefi mu ho yaw no bɔr no efi hɔ, na ɔdze enyigye enyidakwan nye enyimpi si a otsim ahyɛ anan mu.

Ewuradze ama hɛn nyina wusoɛr akyɛdze a, wɔdze hɛn esunsum bɛhyɛ nyimpadua a dzɛmdzi biara nnyi mu (hwɛ Alma 11:42–44). Menã bopue dɛ akataasia na ɔahyerɛn a, mpanyinyɛ na mfe pii mu a ohuun amandze wɔ honandua no efi hɔ. Ɔbɛba ɔno hɔ na hɛn so hɔ dɛ akyɛdze.

Mbom hɛn a yɛbɛpɛ dɛ yɛnye no bɛtsena afebɔɔ no otwar dɛ yɛsan mu yi dza ɔbɛma yɛafata dɛm nkitahodzi no, dɛ yɛbɛtsena bea a Egya na No Dɔba a Ɔasoɛr no tse wɔ enyimnyam mu no. Hɔ nkotoo nye bea a ebusua abrabɔ bɔkɔ do onnyiewiei. Dɛm nokwar no ho dasagye no atow me enyimpi si mu dɛ menye hɔn a modɔ hɔn no, yebodua Jesus Christ No Werdambɔ a oridzi dwuma wɔ hɛn abrabɔ mu no, dze afata ntwerba a ɔkrɔn kɛse no wɔ celestial ahenman no mu (hwɛ D&C 76:70).

Ewuradze ma hɛn kwankyerɛ wɔ onnyiewiei nkwa ahwehwɛdze yi ho wɔ sacrament mpaabɔ no mu a ɔboa me, na obotum aboa wo. Wɔtõ nsa frɛ hɛn dɛ yɛbɛdan bio aba hɛn enuma ahyɛmudzi do no wɔ sacrament nhyiamu biara mu.

Yɛbɔ anohoba dɛ yɛbɛkaa Agyenkwa no aber nyina. N’afɔrbɔ ho asɛnkyerɛdze no boa hɛn ma yenya enyisɔ wɔ kaw kɛse a Otuae dze bubuu owu no mpokyerɛ mu, dze maa hɛn ehumbɔbɔr, na Ɔmaa hɛn bɔn nyina ho bɔnfakyɛ sɛ yɛsan mu yi dɛ yebonu hɛnho a.

Yɛbɔ anohoba dɛ yebesie Ne mbrasɛm. Yɛrekenkan kyerɛwsɛm nye nkɔnhyɛfo atseafo hɔn nsɛm na yɛretsie hɔn a woekenyan hɔn a wɔkasa wɔ hɛn sacrament nhyiamu ase no, kaa hɛn hɛn ahyɛmu no ama yeedzi do. Sunsum Krɔnkrɔn no dze mbrasɛm a ohia tsitsir dɛ yedzi do dɛm da no hyɛ hɛn adwen nye hɛn akoma mu.

Sacrament mpaabɔ mu no, Nyankopɔn bɔ anohoba dɛ Ɔbɔsoma Sunsum Krɔnkrɔn no ma Ɔnye hɛn abɛtsena (hwɛ Moroni 4:3; 5:2; N & A 20:77, 79). Mehu dɛ dɛm mber kumaa mu no Nyankopɔn botum ama menya dza ɔtse dɛ kokoa mu mpɛnsapɛnsamu. Ɔtwe m’adwen gyina dza mayɛ a ɔsɔ N’enyi, nnuho nye bɔnfakyɛ a mehia, nye nkorɔfo enyim nye edzin a Ɔbɛpɛ dɛ mosom hɔn ma No do.

Mfe a etwa mu no, dɛm sũahu ntaataado yi adan enyidado abɛyɛ ayamuyie ho atsenkã, na ɔdze taduasi abrɛ me dɛ Agyenkwa No Werdambɔ na Wusoɛr no ebue ehumbɔbɔr ama me.

Megye dase dɛ Jesus nye Christ a Ɔasoɛr no, hɛn Agyenkwa, na hɛn fasusu a odzi mu nye onnyiewiei nkwa kwankyerɛfo.