I le Aoao o le Ekalesia

O le autu o le Mutuale i le tausaga lenei o le “Ia outou tutu ai i nofoaga paia, ma aua le masii ese” (MF&F 87:8). Alii ma tamaitai talavou, o loo manaomia e le Liahona ni o outou ata o outou tutu i nofoaga paia. O ata o faaalia ai outou o faaaluina o outou taimi faatasi ma o outou aiga, auauna atu, fai le galuega faafaifeautalai, fatuina o ni faatufugaga, suesueina o le talalelei, suesueina o le natura, ma isi mea! O le auala lenei e auina mai ai lou ata:

• Ia pu’e e se tagata lou ata ao e tu i se nofoaga paia.

• Imeli mai lou ata manino lelei i le liahona@ldschurch.org.

• Faaopoopo i ai se savali pe aisea ua paia ai lenei nofoaga mo oe.

• I lau imeli, faamolemole ia aofia ai lou igoa atoa, aso fanau, igoa o le uarota ma le siteki (po o le paranesi ma le itu), ma se tuatusi imeli a ou matua.

O ata o le autalavou mai le lalolagi atoa o le a faaalia i se lomiga i le lumanai.

Ia Tesema 2012, ina ua maea le faatulagaina o le siteki lona 3,000 o le Ekalesia i Sierra Leone i Aferika i Sisifo, sa faia ai e Elder Jeffrey R. Holland o le Korama a Aposetolo e Toasefululua se asiasiga faapitoa i se paranesi toagaogao ma taumamao a le Ekalesia i Rapati, Moroko.

I se faigalotu faapitoa i le afiafi o le Aso Sa, sa faasoa atu ai e Elder Holland alofaaga o taitai o le Ekalesia mo tagata uma o le Ekalesia i le lalolagi atoa, e tusa lava pe o le a le toagaogao o le fuainumera po o le taumamao i nofoaga latou te i ai.

“E le o faagaloina outou, ma o outou o se vaega o se galuega ofoofogia a o faailoa mai ma faatelevaveina e le Alii le faapotopotoina o Isaraelu i lenei tisipenisione maoae mulimuli,” o lana saunoaga lea.

I le Aso Sa, 17 o Mati, 2013, ina ua maea se faafiafiaga faaleaganuu ma le tolu vaiaso o maimoaga i le malumalu, sa faapaiaina ai loa le Malumalu o Tegucigalpa Hondura i ni sauniga se tolu, lea sa faasalalauina i iunite uma o le Ekalesia i Hondura ma Nikarakua.

O le au paia Hondura, o e sa masani ona malaga atu mo ni nai itula i le Malumalu o le Aai o Kuatemala, Kuatemala ua olioli i le vaaia o le faapaiaina o le uluai malumalu a le atunuu. Sa muai fofogaina e le Au Peresitene Sili le malumalu i se tusi i le aso 9 o Iuni, 2006, ma sa suatia le eleele i le nofoaga ua i ai nei i le aso 12 o Setema, 2009.

I le faaiuga o le 2012 sa malaga atu ai Peresitene Thomas S. Monson i Siamani e feiloai ai ma tagata o le Ekalesia i Hamburg, Berlin, Munich, ma Frankfurt, Siamani, ma sa ia faamalosiau atu ia i latou ina ia mulimuli ia Iesu Keriso.

Sa ia ta’u atu i le au paia i Frankfurt, “Sa Ia aoao mai le faamagalo atu e ala i le faamagaloina. Sa Ia aoao atu le agalelei e ala i le agalelei atu. Sa Ia aoao atu le tuuto atu e ala i le ofoina mai o Ia lava.”