Ati a‘e te Ekalesia

Teie te tumu parau matahiti o te feia apî, « A ti‘a na outou i roto i te mau vahi mo‘a ra, e eiaha ia faanuu-ê-hia’tu » (PH&PF 87:8) E te feia apî tamaroa, e te feia apî tamahine, te imi nei te Liahona i te mau hoho‘a no outou e ti‘a ra i te mau vahi mo‘a ra. Te hoho‘a e faaite ra ia outou e te utuafare, i roto i te taviniraa, i roto i te ohipa misionare, i roto i te ohipa ano‘ihi, i roto i te tuatapaparaa evanelia, te hi‘ohi‘oraa i te natura, e te vai atu ra ! Teie te ravea no te hapono i ta outou hoho‘a :

• E pata te hoê taata ia outou i te vahi mo‘a e ti‘a outou.

• E hapono mai na roto i te rata uira i te hoho‘a pa‘ohe (« nette » roa a‘e) i te liahona@ldschurch.org.

• A papa‘i i te tahi parau no te faataa mai no te aha e vahi mo‘a te reira no outou.

• I roto i ta outou rata uira, a tuu atoa mai i to outou i‘oa taatoa, te tai‘o mahana fanauraa, te i‘oa o te paroisa e te tĭtĭ (e aore râ te amaa e te mataeinaa) e te i‘oa o te rata uira a to outou metua.

E tuuhia te mau hoho‘a no te feia apî na te ao atoa nei i roto i te hoê ve‘a i muri iho.

I te ava‘e no te titema 2012 ra, i muri to’na faati‘araa i te 3000raa o te tĭtĭ o te Ekalesia i Sierra Leone i Afirita Too‘a o te ra, ua rave o Elder Jeffrey R. Holland no te Pŭpŭ no te Tino Ahuru Ma Piti Aposetolo i te hoê tere farerei taa ê i te hoê amaa iti o te Ekalesia, tei te atea rii i Rabat, Maroc.

I roto i te hoê pureraa taa ê i te pô Sabati, ua faaite o Elder Holland i te here e vai ra i roto te feia faatere o te Ekalesia no te mau melo atoa o te Ekalesia na te ao nei, noa’tu te numera iti o ratou e te atea o te vahi.

« Aita outou i mo‘ehia, e tuhaa outou no te hoê ohipa umere a te Fatu i te imiraa e i te haapeepeeraa i te haaputuputuraa o Iseraela i roto i teie tuuraa evanelia rahi e te hopea », te na reira ra oia.

I te Sabati 17 no mati 2012 ra, i muri mai i te hoê pô faahanahanaraa e toru hepetoma opani iriti, ua haamo‘ahia te hiero no Tegucigalpa i Honduras na roto e toru tuhaa pureraa, tei haapurorohia i te mau amuiraa atoa o te Ekalesia i Honduras e i Nicaragua.

Oaoa roa te mau melo no Honduras, ratou na mua a‘e tei tere tau hora no te haere i te hiero no Guatemala City i Guatemala, i te iteraa i te haamo‘araa o te hiero matamua i to ratou fenua. Ua faaara-na-mua-hia teie hiero na roto i te hoê rata a te Peresideniraa Matamua no te 9 no tiunu 2006, e ua haamata te ope matamua i taua mahora ra i te 12 no tetepa 2009.

I te hopea matahiti no 2012, ua tere te peresideni Thomas S. Monson i Heremani no te farerei i te mau melo o te Ekalesia i Hambourg, Berlin, Munich e Frankfurt i Heremani, e no te a‘o ia ratou ia pee ia Iesu Mesia.

« Ua haapii Oia i te faaoreraa hara na roto i te faaoreraa’tu i te hara », ua parau oia i te mau melo i Frankfurt. « Ua haapii Oia i te aroha na roto i te tororaa’tu i te rima aroha. Ua haapii Oia i te paieti na roto i te horo‘araa’tu Ia’na iho ».