«Nahea vau ia faataa i to’u hoa e, no te aha te ofatiraa i te ture no te viivii-ore e riro ai ei mana‘o hape ?»

E opuaraa hanahana ta te Metua i te Ao ra no tatou paatoa, e e faati‘ahia te reira opuaraa i roto i te hiero. E mea ti‘a ia vai ti‘amâ tatou no te tomo i roto i te hiero ia nehenehe to tatou utuafare ia taatihia e a muri noa’tu. E ora faahou tatou e to tatou Metua i te Ao ra, e hau atu râ, e farii tatou i te popou hope ore, o ta te parau-ti‘a ore e ore e farii.

Te faaitoitohia nei tatou ia vai mâ i te pae no te apeni ia nehenehe ia tatou ia ti‘amâ no te tomo i roto i te hiero ma te tape‘a i te mau fafauraa mo‘a. Ia pee tatou i te ture no te viivii-ore, ua nehenehe atura ïa ta tatou e patu atu i te faaipoiporaa e te utuafare puai no ananahi. Te tere noa nei Satane no te faahema ia tatou, na roto râ i te pure, te mau papa‘iraa mo‘a e te mau hoa maitai, e nehenehe ta tatou e upootia i te reira.

Te vai nei e rave rahi faahopearaa ino no te ofatiraa i te ture no te viivii-ore, aita râ te taatoaraa e haapiihia nei i roto i te hoê piha haapiiraa no te ea. E faaatea ê te ofatiraa i te ture no te viivii-ore i te Varua i rapae i to outou oraraa, e haapêpê i te feia na piha‘i iho ia outou e e faatupu i te mana‘o ino no outou iho. Teie te tahi mana‘o, te mata‘ita‘iraa i te hoê video no Moromona Messages, te upoo parau « Chastity: What Are the Limits ? » [i ni‘a ia youth.lds.org i roto i te reo peretane, potutara e paniora].

Na roto i te peeraa i te ture no te viivii-ore, e vai mâ noa tatou i te mata o te Atua, e faatura tatou ia tatou iho e e tauturu atoa tatou i te tahi mau pu‘eraa ia faatura ia tatou. Ia haapa‘o tatou i te ture no te viivii-ore, ua faaite ïa tatou e, e mau tamarii tatou na te Atua e te turu nei tatou i te mau faatureraa teitei. E ape tatou i te tatarahaparaa. Ia faaroo tatou i to tatou Metua i te Ao ra, no ni‘a ihoa râ i teie ture, e oaoa rahi a‘e to tatou oraraa i ni‘a i te fenua nei e i te ao no a muri mai.

Ahani e, ua rave-ata-noa-hia te horo‘a no te fanauraa, e faarirohia ïa teie horo‘a rahi a te Atua ei mea mâtau noa. E ere te hoê horo‘a i te mea faahiahia mai te peu eita te taata ta oe e horo‘a i te reira e feruri i te reira ei mea taa ê. E ti‘a roa i te hoê taata ia rave i te mana fanauraa mai te hoê mea mo‘a ; no te mea ho‘i e, e hiero tatou paatoa na te Atua e e mea ti‘a ia vai atuatu e te mâ mai te hoê hiero.

Ia vai mâ outou i te hara nei, e rahi a‘e to outou oaoa e e haamaitaihia outou. Mai te hiero ra to tatou mau tino, e no te Metua i te Ao ra « aore oia e parahi i te hiero viivii » (Alama 7:21). No reira, ia vai mâ tatou i te hara nei, e parahi mai te Varua i piha‘i iho ia tatou.

A pahono i te uiraa a to outou hoa na roto i te aniraa i te tahi mau uiraa : « Eaha’tura ïa ahani e, e hoa faaipoipo ta oe e mata‘ita‘i ra ia oe ? » Te taata atoa ta’u i ite e, ua ofati i te ture no te viivii-ore, ua tatarahapa i muri iho. « Eaha’tura ïa ahani e tamarii ta oe e ani mai oia e, ua ofati anei oe i te ture no te viivii-ore ? » Titauhia to outou hoa ia haapii i te faufaa rahi o te ture no te viivii-ore i teie nei, na mua a‘e e ani mai te hoê tamaiti e aore râ tamahine i teie uiraa. Titauhia ia vai atuatu outou e ia vai mâ no te arata‘i i hoê oraraa oaoa e te ora maitai ma te mana‘o hapa ore i te ture mo‘a tei ofatihia.

E mea au na te Fatu te peu mâ e te viivii-ore, e e ti‘a i te mau mea atoa e tupu i to’na taime ti‘a. E faaueraa na te Fatu te ture no te viivii-ore. Te pure e te hoaraa o te Varua, o te ano‘iraa maitai roa ïa no te ite mai e, e haamaitairaa te vai-viivii-ore-raa.

E faataa atu vau i to’u hoa e, e mana‘o hape te ofatiraa i te ture no te viivii-ore no te mea, ua faati‘ahia te mana no te fanauraa no te feia faaipoipo ana‘e. Ia ofati tatou i te ture no te viivii-ore, e faaatea ê te Varua Maitai i to tatou oraraa.