“Ариун явдлын хуулийг зөрчих нь яагаад ноцтой нүгэл болохыг би найздаа яаж тайлбарлах вэ?”

Бидний хүн нэг бүрийн талаар бурханлаг зорилго Тэнгэрлэг Эцэгт байдаг бөгөөд уг зорилго нь Ариун сүмд хэрэгждэг. Бид гэр бүлээрээ үүрд мөнхөд лацдан холбуулахын тулд Ариун сүмд орохоор зохистой байх ёстой. Бид Тэнгэрлэг Эцэгтэйгээ дахин хамт амьдрах болно. Хамгийн чухал нь зохисгүй хүмүүсийн хүлээн авч чадахгүй үүрдийн баяр баясгаланг бид хүлээн авах боломжтой.

Биднийг бэлгийн харилцааны хувьд цэвэр ариун байх юм бол, Ариун сүмд орж, ариун нандин гэрээнүүдийг сахихаар зохистой байхыг дэмждэг. Хэрэв бид ариун явдлын хуулийг дагавал ирээдүйд бид бат бөх гэрлэлт ба гэр бүлтэй болж чадна. Сатан биднийг уруу татахаар үргэлж бэлэн байдаг боловч залбирал, судар ба сайн найз нарынхаа тусламжтайгаар бид уруу таталтыг давж чадна.

Бид ариун явдлын хуулийг сахиснаараа Бурханы мэлмийд цэвэр ариун харагдаж, өөртөө хүндэтгэлтэй хандахын зэрэгцээ бусдыг бидэнд хүндэтгэлтэй хандахад нь тусалдаг. Хэрэв бид ариун явдлын хуулийг дуулгавартай сахьвал Бурханы хүүхдүүд гэдгээ харуулж, өндөр жишгүүдээ чанд баримталж чадна. Бидэнд харамсах зүйл байхгүй болно. Бид ялангуяа энэ хуулийг сахих талаар Тэнгэрлэг Эцэгийнхээ хүслийг биелүүлбэл, бидний амьдрал энэ дэлхий дээр ч, ирэх дэлхийд ч аз жаргалаар дүүрэн байх болно.

Их Эзэн ариун журам ба ариун явдалд баярладаг бөгөөд юм бүхэн өөрийн цаг хугацаанд болж өнгөрдөг. Ариун явдлын хууль бол Их Эзэнээс бидэнд өгсөн зарлиг юм. Залбирал ба Ариун Сүнсний нөхөрлөл бол ариун явдалтай байх нь адислал мөн гэдгийг ойлгоход туслах маш чухал хоёр зүйл мөн.

Хэрэв бид нөхөн үржихүйн бэлэгт хөнгөн хуумгай хандвал Бурханы энэхүү үнэт бэлгийг ердийн зүйл мэт үзсэнтэй адил юм. Таныг бэлэг өгөхөд бэлэг авч байгаа хүн үүнийг онцгой үнэ цэнэтэй зүйл гэж үзэхгүй бол танд сайхан санагдахгүй. Нөхөн үржихүйн хүчийг хүн ариун зүйл гэж үзэн, үүнд үргэлж хүндэтгэлтэй ханддаг байх ёстой. Учир нь бид бүгд Бурханы Ариун сүм учраас Ариун сүм шиг цэвэрхэн, ариун байх ёстой.

Та гэм нүгэлгүй цэвэр ариун байснаараа, улам аз жаргалтай амьдарч, илүү ихээр адислагдах болно. Бидний бие махбод Ариун сүмтэй адилхан бөгөөд Тэнгэрлэг Эцэг “ариун бус сүмд оршдоггүй билээ” (Aлма 7:21). Иймээс бид гэм нүгэлгүй цэвэр ариун байх юм бол, Сүнс бидэнд орших болно.

“Ирээдүйн эхнэр буюу нөхөр чинь одоо чамайг харж байвал чи биеэ хэрхэн авч явах вэ?” гэх мэтийн асуулт асууж, найзынхаа асуултад хариул. Ариун явдлын хуулийг зөрчсөн бүх хүмүүс үүнийхээ төлөө их харамссан гэж би дуулсан. “Хэрэв ирээдүйн хүүхэд чинь чамаас ариун явдлын хуулийг зөрчсөн үү? гэж асуувал чи юу гэж хариулах вэ?” Найзаас чинь хүүхэд нь энэ асуултыг асуухаас өмнө ариун явдлын хуулийг одооноос эхлэн сахих нь хэчнээн чухал болохыг найз чинь ойлгосон байх хэрэгтэй. Та энэ ариун хуулийг зөрчихгүй байснаар өөрийгөө цэвэр ариун байлгаж, эрүүл саруул, аз жаргалтай амьдарч чадна.

Ариун явдлын хуулийг зөрчсөний сөрөг үр дагавар олон боловч тэдгээрийг бүгдийг нь эрүүл мэндийн хичээлээс мэдэх боломжгүй байдаг. Ариун явдлын хуулийг зөрчихөд Сүнс амьдралаас чинь холдон зайлж, ойр дотны хүмүүсээ гомдоохын хамт таны сэтгэл санаа ч таатай бус болно. Би танд Мормон захиас дахь “Chastity: What Are the Limits?” видеог [at youth.lds.org англи, португаль, испани хэлээр] үзэхийг зөвлөж байна.

Ариун явдлын хуулийг зөрчих нь хор уршигтайг би найздаа тайлбарласан. Учир нь нөхөн үржихүйн хүч зөвхөн хууль ёсоор гэрлэсэн эхнэр, нөхөр хоёрын хооронд байдаг. Бид ариун явдлын хуулийг зөрчвөл Ариун Сүнсийг амьдралаасаа алдана.