Bonnie L. Oscarson

Lolotonga ʻene hoko ko e metuloni ʻo e Temipale Sitokalahoma Suetení mei he 2009 ki he 2012, ne mamata ai ʻa Poni Lī Kulini ʻOsikāsoni ki he feilaulau ʻa e Kāingalotu mei Sueteni, Noaue, mo Letiviá ke nau omi ʻo mōihū ʻʻi he fale ʻo e ʻEikí.

Neongo ia, naʻe ʻikai ke ne ʻilo he taimi ko iá, ʻe tokoni ʻa e ngaahi meʻa naʻá ne ako mei he kāingalotu “mātuʻaki masiva mo līʻoa pea mo lotoʻaki kakató ni” ke tataki ia ʻi hono fatongia ko e palesiteni lahi ʻo e Kau Finemui ʻa e Siasí.

Naʻá ne pehē, “Koeʻuhí kuo fili he taimí ni ha Kau Finemui tokolahi kei taʻu siʻi ke ngāue fakafaifekau mo hū he temipalé, ʻoku ou fakatauange ʻe tokoni ʻeku taukei he ngāue ʻi he temipalé ke mahino kiate au e founga ke tokoni ai ke nau mateuteú.”

Naʻe fāʻeleʻi ʻa Poni Lī Kulini ʻi ʻOkatopa 1950 ʻi Sōleki Siti kia Fio Sēmisi mo Siini S. Kulini. Ko e taimi naʻe pehē ai ʻe heʻene ongomatuʻá naʻa na fie maʻu ʻena fānaú ke nau foua ʻa e Siasí ʻi ha feituʻu mavahe mei ʻIutaá, ne hiki leva e tokotaha taʻu hiva ko Poní mo hono fāmilí ki ʻOkalahoma, USA. Naʻe toe nofo foki ʻa e fāmilí he taimi ʻe taha ʻi Kololato mo Tenesī ki muʻa pea nau toki hiki ki Misuli, ʻa ia ne fetaulaki ai ʻa Poni mo Paula Keni ʻOsikasoni ʻi he konga kelekele ʻo e temipale ʻi Hihifo Mamaʻó ʻi Misuli—ko ha feituʻu mahuʻinga lahi koeʻuhí he ʻokú na fakatou maʻu ha ngaahi kui naʻe nofo ʻi he feituʻu Hihifo Mamaʻó.

Hili ʻena hū ki he ʻUnivēsiti Pilikihami ʻIongí, ne mali leva ʻe ongomeʻá ni he ʻaho 19 ʻo Tīsema 1969, ʻi he Temipale Sōlekí; ne toki kau mai ha fānau ʻe toko fitu ki he fāmilí.

Naʻe taʻu 25 pē ʻa Sisitā ʻOsikasoni ʻi he taimi naʻe ui ai hono husepāntí—naʻe ngāue fakafaifekau taimi kakato ʻi he Misiona Suetení 1965 ki he 1968—ke hoko ko e palesiteni ʻo e Misiona Sueteni Kotipokí.

ʻI he foki mai ʻa e fāmili ʻOsikasoní ki he ʻIunaiteti Siteití, naʻa nau nofo ʻi Misuli, Niu Sēsī, Masasūseti, pea mo Tekisisi, ʻa ia naʻe hoko ai ʻa Misa ʻOsikasoni ko e tokoni palesiteni fakavahe ʻo ha falekoloa. Naʻe maʻu ʻe Sisitā ʻOsikasoni ha fiefia lahi, hangē ko ʻene ongomātuʻá, he nofo ʻi he ngaahi feituʻu naʻe tokosiʻi ai e kāingalotu ʻo e Siasí.

Ne ʻosi hoko tuʻo tolu ʻa Sisitā ʻOsikasoni ko ha palesiteni ʻo e Kau Finemuí, mo ha faiako semineli pongipongi ʻi ha taʻu ʻe hiva, mo ha faiako ʻo e Tokāteline ʻo e Ongoongoleleí.