Liliu ʻe he Hisitōlia Fakafāmilí e Lotó

Naʻe tomuʻa tala ʻe ʻEletā Peletilī D. Fositā ʻo e Kau Fitungofulú, ko e lahi ʻo e ngaahi senitā hisitōlia fakafāmili ʻo e kahaʻú ʻe ʻi he ʻapí ia, ʻi haʻane lea naʻe fai he ʻaho 23 ʻo Māʻasí fekauʻaki mo e Konifelensi ʻa e RootsTech 2013 Family History and Technology ʻi Sōleki Siti, ʻIutā, USA.

Naʻe pehē ʻe ʻEletā Fositā, ko ha Tokoni Talēkita Pule ʻo e Potungāue Hisitōlia Fakafāmilí, ʻe vavé ni ha ʻi ai ha kakai ʻe hiva miliona he māmaní pea kuo ʻosi teuteu ʻe he ʻEikí ha tekinolosia ke malava ai ʻo “[haʻi fakataha mo fakafehokotaki kotoa ʻa e ngaahi fāmili ko iá].”

Naʻá ne fakamamafaʻi hono mahuʻinga ke fakahoko e hisitōlia fakafāmilí, ako e ngaahi talanoa ʻo ʻetau ngaahi kuí—ʻo ʻikai ko e tohihohokó pē, kumi e ngaahi hingoá mo e ngaahi ʻahó. Naʻá ne pehē, ʻoku ʻi he ngaahi maka fakamanatu ʻi ha faʻitoka pē he māmaní ʻa e hingoa, ʻaho fāʻeleʻi, kiʻi toloi (dash), pea mo e ʻaho maté. Naʻá ne pehē, “[ʻOku ngali fuʻu siʻisiʻi mo ʻikai mahuʻinga ʻa e kiʻi toloi ʻi he vahaʻa ʻo e ʻaho fāʻeleʻí mo e ʻaho maté, ka ʻoku kātoi kotoa ai hotau hisitōliá. Ko ia, neongo ʻoku tau faʻa tokanga pē ki he ʻilo ʻo e ngaahi ʻaho ko iá, ka ko e ʻofa ki heʻetau ngaahi kuí—ʻa e liliu hotau lotó ki heʻetau ngaahi tamaí—ʻoku hoko ia ʻi hono ʻilo ʻo e toloi ko iá].”

Naʻá ne fakamatala ʻo pehē, ʻoku fakatahaʻi kitautolu ʻe he hisitōlia fakafāmilí ʻi heʻetau fevahevaheʻaki e ngaahi talanoá mo ngāue fakatahá. “Ko ia ai, ʻoku liliu ʻe he tohi-hohokó ʻetau sātí; liliu ʻe he hisitōlia fakafāmilí hotau lotó.”