ʻEletā S. Gifford Nielsen

ʻOku manako ʻaupito ʻa ʻEletā Sitenilī Kīfooti Nelasoni ki he meʻa fakasipotí, ka ʻoku ʻikai ko e sipotí ʻa e meʻa mahuʻinga taha heʻene moʻuí. ʻOkú ne tui ʻoku mātuʻaki mahuʻinga ke potupotu tatau pea ko e fakavaʻe ʻo e fiefiá ʻa e ongoongoleleí he taimí ni pea ʻi ʻitāniti.

Naʻe fāʻeleʻi ia ʻi ʻOkatopa 1954 ʻia Heuli mo Loisi Nelasoni, nofo ʻi Polovo ʻi ʻIutā, USA, ʻo aʻu ki heʻene ʻosi mei he kolisí. Naʻe akoʻi ange heʻene mātuʻá ha tōʻonga mahuʻinga ʻoku fakatefito ʻi he ongoongoleleí kuó ne tataki ʻene moʻuí.

Hili haʻane tofanga ʻi ha lavea lahi ʻo ne fakangata ʻene vaʻinga ʻakapulu he kolisí, ne pehē ʻe ʻEletā Nelasoni naʻá ne ʻilo ai he ʻikai lava ʻe he laveá ʻo toʻo e meʻa mahuʻinga taha ʻi he moʻuí.

Hili haʻane fakaakeake lelei, naʻe vaʻinga kuotapeeki leva ʻi ha Timi ʻAkapulu Liiki Fakafonua, ka naʻe hili ha taʻu ʻe tolu kuo ʻikai ola lelei. Naʻe manukiʻi ia ʻe he kakaí. Ko ha taimi ia ʻo e fakakaukau loto mo e fekumi pe ko e hā ʻa e meʻa ʻoku tui moʻoni ki aí. Naʻe pehē ʻe ʻEletā Nelasoni, “[Naʻá ku ako ʻoku ʻikai teitei liʻaki koe ʻe he Fakamoʻuí, tatau ai pē pe ko e hā.],” ʻoku nofo he taimí ni ʻi Suka Leni, ʻi Tekisisi.

Kapau ʻoku ʻi ai ha potu-folofola ʻoku feinga ke fakatatau ki ai ʻene moʻuí, ko e Mātiu 5:14–16: “Ko e maama ʻo māmani ʻa kimoutolu. Tuku ke ulo pehē hoʻomou māmá ʻi he ʻao ʻo e kakaí, koeʻuhí ke nau mamata ki hoʻomou ngāue leleí, pea fakamālōʻia ʻa hoʻomou Tamai ʻa ia ʻoku ʻi he langí.”

 Naʻe pehē ʻe ʻEletā Nelasoni, “ʻOku fakamafao atu ʻe he ʻEikí hono toʻukupú kiate koe. ʻOkú ke ʻofa kiate Ia ʻaki hoʻo moʻui ʻaki ʻa e ongoongoleleí.”

Naʻe fetaulaki mo Uenitī ʻOloseni ʻi he lolotonga ʻo ʻene ʻi he kolisí. Naʻá na mali ʻi he Temipale Polovo ʻIutaá he ʻaho 23 ʻo ʻEpeleli 1975. Naʻe maʻu hono mataʻitohí ʻi he fetuʻutakí mei he ʻUnivēsiti Pilikihami ʻIongí. Naʻe hoko ko e kuatapeeki ki he timi ʻOila ʻa Hiusitoní mo e talēkita sipoti ki he televīsone KHOU ki muʻa pea toki ui ke ngāue taimi kakato ki he Siasí.

Ne hoko ʻa ʻEletā Nelasoni, ʻa ia ko ha tamai ki ha fānau ʻe toko ono, ko ha faiako semineli, palesiteni ʻo e Kau Talavoú, palesiteni ʻo e kōlomu ʻo e kaumātuʻá, pīsope, mo e palesiteni fakasiteiki. Naʻe hoko ko e Fitungofulu Fakaʻēlia ʻi he taimi ne ui ai ki he Kōlomu ʻUluaki ʻo e Kau Fitungofulú.