Elder Terence M. Vinson

O Elder Terence M. Vinson, lea faatoa valaau i le Korama Lua a Fitugafulu, sa lei faalogo lava i le upu Mamona ae lei feiloai ia Kay Anne Carden i le amataga o le vaitau o le 1970 i Sini, Ausetalia. Sa talanoa le paga lea e uiga i mea tau lotu ma mulimuli ane ai oo i se maliliega. O Aso Sa taitasi, sa la auai ai uma i le lotu a Terence ao talavou faapea ai ma se paranesi laitiiti o Le Ekalesia a Iesu Keriso o le Au Paia o Aso e Gata Ai. O le tasi vaega e feiloai i se fale tele ma matagofie, ao le isi i se tamai avanoa laitiiti mautotogi lea sa mafai ona gafatia e ni nai tagata o le Au Paia o Aso e Gata Ai.

Ae ina ua mavae sina taimi “sa maasiasi le faatusatusaga,” ma na amata ai e Terence ona fai ana lesona a faifeautalai. Sa tele ni ana fesili. Ona oo lea, ao auai i le konafesi a le siteki, sa ia lagonaina se savali i le manino e pei ona tautalagia ai. “Sa manaomia ona ou auai i le Ekalesia ina ia mafai ai ona ou alualu i luma. Sa maua ni tali i fesili uma sa ia te au,” sa ia saunoa ai.

Sa papatisoina o ia i le vaiaso na sosoo ai.

Sa soifua mai Terence Michael Vinson i Sini, Ausetalia, ia Mati 1951 ia John Laurence ma May Therese A. Vinson. O lona tama, le sa galue o se tineimu, na ositaulaga ina ia mafai e lana fanau e toafitu ona a’otauina.

Sa maua se faailoga o le tagata malaga a Elder Vinson i mea tau matematika ma faafuainumera mai le Iunivesite o Sini ma se tipiloma faafaiaoga mai le Kolisi Faafaiaoga o Sini. Sa ia maua foi se tipiloma o le fuafuaina o mea tautupe mai le Iunivesite o Deakin ma se faailoga o le matuaofaiva i mea tautupe faaaoga mai le Iunivesite o Macquarie. I le taimi o lana matata faalegaluega, sa lauiloa ai o ia o se faiaoga o le numera, failauga, ma se faufautua mo mea tautupe ma sa puleaina se pisinisi mo le fuafuaina o mea tautupe ma teugatupe.

Sa faaipoipo atu o ia ia Kay Anne, le tamaitai lea na faalauiloaina ia te ia le talalelei, i le aso 2 Me, 1974, i Sini, ma sa faamauina le ulugalii i le aso 23 Aokuso, 1975, i le Malumalu o Hamilton Niu Sila; e toaono le la fanau. E lei atoa se tolu tausaga talu lona papatisoga, ae valaauina Elder Vinson e avea ma epikopo. Sa auauna atu o ia i le tele o au peresitene o siteki ma sa avea o se sui lisone ma se Fitugafulu Eria.