Talofa! O au o Uili mai Taiuani
Mai se faatalanoaga ma Amie Jane Leavitt
E i ai ni gaoioiga faaleaiga e te fiafia lava i ai? O Uili ma lona uso o Aleni, e fiafia e faaalu ia Aso Toonai faatasi ma le latou aiga e maimoa ai i nofoaga fou i le motu o Taiuani, i le mea o loo latou nonofo ai.
E tele aso malolo fiafia ma faafiafiaga i Taiuani. Ia Setema, matou te faamanatuina ai le Aso Fiafia o le Masina. E faatasitasi le matou aiga atoa, ma matou aai i keke masina suamalie, o meaai ia e faatumu i le kulimi o pi mumu po o kulimi o fatu o le lilivai.
I Taiuani, e tele lava ina maua o matou avanoa e faia ai galuega faafaifeautalai. I le aoga, e ao lava ona ou aoaoina lau vasega i se mea ou te iloaina e uiga i le faamaoni. Sa ou aoaoina i latou i le auala e usuina ai le pese a le Peraimeri “Tu Atu mo le Mea Sao.”
Ae matou te lei momoe, matou te faitauina tusitusiga paia o se aiga. E fiafia lava Aleni i le tala e uiga ia Mose ma le gata apamemea. O le tala ou te fiafia lava i ai o le taimi lea na lapataia ai e le Alii ia Liae e tuua Ierusalema ma tau atu ia Nifae e fau se vaa e o ai i le nuu folafolaina.
A tuua le aoga, ma te savavali ma lou uso i le fale faatasi ma tamamatua. E fai a ma meaaoga ma aai faatasi ma tina ma tama i le aiga o le afiafi. O le meaai ou te fiafia lava i ai o le povi e ave i ai le saimini, ae o Aleni o le falai alaisa. E ma te fiafia uma foi i meaai suamalie.