Alofa Tunoa mo Pato Tina ma Au

I se tasi aoauli o le tautotogo sa ou utaina ai lau taavale e amata ona fela’ua’i lau fanau laiti e toalima i a latou aoga ma toleniga. A o ou utaina seevae lakapi ma ato siva, sa ou matauina se pato tina ma ana tamai pato o savavali i lalo i le alasavali o le matou nuu.

A o ou matamata atu i ai, sa amata ona ia sopoia le aualatele. Ae paga lea, sa ia filifili e sopo atu i luga o se mea valavala i luga o le alavai, ma a o ia pasia, sa mulimuli atu lana fanau. Sa see i lalo i va o uamea o le mea valavala lea ni tamai pato se fa e aunoa ma se laveai.

Ina ua taunuu le tina i le isi itu, sa ia iloaina o loo misi nisi o lana fanau ma sa mafai ona lagona atu lo latou fetagisi e tau le lagona. I lona le iloaina atoa o lana mea sese, sa ia toe foi atu ai i luga o le mea valavala lea, e saili mai lana fanau ua misi ma toe leiloloa atu ai ma le isi lua. Faatasi ai ma le faateia ma sina le fiafia i le le lelei o lana faaiuga, sa ou alu atu ai i le mea valavala uamea lea e vaai pe mafai ona ou siiina i luga. E ui sa ou faaaogaina lou malosi atoa, ae sa na o sina minoi lava o le uamea valavala, ma ua ou tuai foi e piki se tasi o lau fanau.

I le manatu ai o le a ou foia le faafitauli i se taimi mulimuli ane pe a le tele se pisi, sa ou oso ai loa i totonu o le taavale a o memumemu ma le faafiaamiotonu, “E le agavaa o ia e avea ma se tina.”

I le isi itula ma le afa na sosoo ai, sa ou faia ai le tele o mea sese faamatua ia e fai soo. O mea sese nei na ou augani ai mo se faamagaloga mo le tele o taimi mai lau fanau ma lou Tama i le Lagi. O taimi taitasi e naunau ai e faia ia lelei atili ma aua nei toe pa’u atu i le mailei o nei vaivaiga. Pe a ou avaavau atu i se tasi o lau fanau mo le taufaalili i se isi, e tatagi leotele mai pea a’u upu i ou taliga, “E le agavaa o ia e avea ma se tina.”

Sa faafuasei ona ou lagonaina se agaalofa faagaeetiaina mo lena pato tina. Sa taumafai o ia e taulima le lalolagi i ona lagona na ia maua, e pei lava foi o au. Ae o nisi taimi o na uiga e le lava, ma e mafatia ai lava le ma fanau.

Sa ou naunau e aveese le uamea valavala lea ma sii ese mai i fafo tamai pato. A o ou taamilo mai le tulimanu o le matou auala, sa ou vaaia se tamai vaega o potopoto ai. Sa sii ese e lo matou tuaoi le uamea valavala, oso i totonu o le alavai, ma sii mai ma le faaeteete ia tamai pato i fafo ma le saogalemu. Sa taufetuli solo nai tamai meaola ma le fefefe e sue lo latou tina, o loo savalivali ma le popole i totonu o se vaovao lata ane. Sa lei fesili le pato tina mo se fesoasoani, ae sa alu atu i ai lou tuaoi ina ua le ’a’u lana puipuiga. Sa lofituina au i lagona a o ou mafaufau i le Faaola i le faia o lea mea e tasi mo au ma lau fanau.

O nisi taimi tatou te le atoatoa ai, e oo lava i taimi e i ai lo tatou naunautaiga silisili ma taumafai i le mea sili tatou te mafaia. Peitai, “ua lava [le] alofa tunoa [o le Faaola] mo tagata uma o e e latou te faalotomaualalaloina i latou lava i [Ona] luma” (Eteru 12:27). E faamafanafanaina au i le iloaina o le a le faaleagaina e o’u le atoatoa la’u fanau ma o le a avea i latou ma e mauaina le alofa, filemu, malamalama, ma le alofa tunoa mai lo tatou Faaola. Na te “aapa mai a o ou aapa atu ia te Ia”¹ ma finagalo ia manuia au ma lou aiga. O le a le manumalo lava o tatou le atoatoa pe a tatou faalotomaualaloina i tatou lava ma tutu faatasi ma le Alii i la tatou itu.