Thawj Pawg Thawj Tswj Hwm tsab Xov, Yim Hli Ntuj 2013
Pom, Nco Qab, thiab Ua Tsaug
Vajtswv hais kom peb ua Nws tsaug rau txhua txoj koob hmoov uas peb txais los ntawm Nws. Yooj yim rau peb lam hais ua tsaug thaum peb thov Vajtswv, peb pheej hais ib co lus tiam sis tsis muaj siab xav hais ua tsaug kom muab ib lub txiaj ntsim ntawm peb lub siab rau Vajtswv. Peb yuav tsum “ua tsaug … raws li tus Ntsuj Plig qhia” (Q&K 46:32) xwv kom peb yuav ris Vajtswv txiaj rau tej yam uas Vajtswv pub rau peb.
Peb yuav ua li cas kom nco qab txog tej yam uas Vajtswv tau ua rau peb? Tus Thwj Tim Yauhas sau ntawv txog tej yam uas tus Cawm Seej qhia peb txog ib lub txiaj ntsim nco txog qhov uas los ntawm lub txiaj ntsim Vaj Ntsuj Plig Dawb Huv: “Tus Nplij Siab uas yog tus Vaj Ntsuj Plig tus Dawb Huv, uas kuv thov kom Leej Txiv txib los, nws yuav qhia txhua yam rau nej thiab pab kom nej nco txhua yam uas kuv tau qhia rau nej lawm” (Yauhas 14:26).
Tus Vaj Ntsuj Plig Dawb Huv ua rau peb nco qab txog tej yam uas Vajtswv tau qhia rau peb. Thiab ib txoj kev uas Vajtswv siv kom qhia peb yog los ntawm Nws cov koob hmoov; yog li ntawd, yog peb yuav siv peb txoj kev ntseeg, tus Vaj Ntsuj Plig Dawb Huv yuav ua rau peb nco txog Vajtswv txoj kev muaj siab dawb siab zoo.
Nej sim qhov no thaum nej thov Vajtswv hnub no los tau. Nej muaj peev xwm ua raws li lo lus txib uas hais tias “Nej yuav tsum ua tus Tswv nej tus Vajtswv tsaug txog txhua yam” (Q&K 59:7).
Thawj Tswj Hwm Ezra Taft Benson (1899–1994) hais tias kev thov Vajtswv yuav pab kom muaj sij hawm ua li ntawd. Nws hais tias: “Muaj ib lub sij hawm uas tus Yaj Saub Yauxej hais tias ib txoj kev txhaum loj heev uas ib Tsoom Haiv Neeg Ntseeg hauv Hnub Nyoog Kawg yuav ua yog kev txhaum vim tsis ris Vajtswv txiaj. Nyaj peb feem coob tsis tau xav hais tias qhov ntawd yog kev txhaum loj heev. Thaum peb thov tus Tswv peb nyiam thov kom muaj cov koob hmoov ntxiv. Tiam sis tej lub sij hawm kuv xav tias peb yuav tsum siv sij hawm ntau thov Vajtswv ua Nws tsaug thiab ris Nws txiaj rau tej koob hmoov uas peb twb txais lawm. Muaj ntau yam uas ua rau peb zoo siab.”1
Tej zaum hnub no nej yuav muaj sij hawm hnov tau lub txiaj ntsim Vaj Ntsuj Plig Dawb Huv. Tej zaum nej yuav ua Vajtswv tsaug thaum nej pib thov Nws. Tej zaum nej yuav pib suav nej cov koob hmoov ces tos ib me pliag. Yog tias nej siv nej txoj kev ntseeg, nrog lub txiaj ntsim Vaj Ntsuj Plig Dawb Huv, nej yuav nco txog lwm txoj koob hmoov hauv nej lub siab. Yog tias nej ua Vajtswv tsaug rau txhua txoj koob hmoov ntawd, tej zaum nej yuav siv sij hawm ntev me ntsis thov Vajtswv. Nej yuav nco txog, thiab nej yuav ris Vajtswv txiaj.
Tej zaum nej ua tau li no thaum nej sau ntawv hauv nej phau ceev xwm txheej. Tus Vaj Ntsuj Plig Dawb Huv tau pab tib neeg txij thaum chiv keeb los. Nyob hauv phau Mauxes nej nco qab tias, “Thiab tau ceev ib phau ntawv nco txog, phau uas tau sau, los ntawm Adas yam lus, vim tau pub rau lawv coob npaum li uas lawv hu Vajtswv kom sau los ntawm lub txiaj ntsim kev tshoov siab” (Mauxes 6:5).
Thawj Tswj Hwm Spencer W. Kimball (1895–1985) piav txog tus txheej txheem sau ntawv txog kev tshoov siab hais tias: “Cov uas ceev ib phau ntawv nco txog haj yam yuav nco txog tus Tswv hauv lawv lub neej txhua hnub. Tej phau ceev xwm txheej yog ib txoj kev suav peb cov koob hmoov thiab qhia txog cov koob hmoov no rau peb xeeb leej xeeb ntxwv.”2
Thaum nej pib sau ntawv, tej zaum nej yuav nug nej tus kheej, “Hnub no Vajtswv tau ua dab tsi kom foom koob hmoov rau kuv thiab cov uas kuv hlub?” Yog tias nej ua li ntawd ntau zaus thiab muaj kev ntseeg, ces nej yuav nco qab txog nej cov koob hmoov. Thiab tej lub sij hawm yuav ua rau nej nco txog tej txiaj ntsim uas nej tsis tau pom thaum nruab hnub tiam sis thaum ntawd nej yuav paub tias yog Vajtswv txoj kev pab nej lub neej.
Kuv thov kom peb yuav sib zog muaj kev ntseeg pom, nco qab, thiab ua Vajtswv tsaug rau tej yam uas peb Leej Txiv Saum Ntuj Ceeb Tsheej thiab peb tus Cawm Seej tau ua thiab yuav qhib kev rau peb rov qab mus cuag Nkawd.
© 2013 los ntawm Intellectual Reserve, Inc. Ceev txhua txoj cai. Luam tawm hauv Teb Chaws Amelikas. Pub luam tawm ua lus Akiv: 6/13. Pub txhais ua lus Hmoob: 6/13. Kev txhais First Presidency Message, August 2013. Hmong. 10668 295
Qhia los ntawm tsab Xov No
Nyob hauv nws tsab xov, Thawj Tswj Hwm Eyring caw peb nco txog Leej Txiv Saum Ntuj Ceeb Tsheej txoj kev ua siab dawb siab zoo thaum peb thov Vajtswv. Sib tham nrog cov uas nej qhia txog qhov uas kev ris Vajtswv txiaj thaum nej thov yuav pab peb pom Vajtswv txoj kev pab hauv peb lub neej. Xav seb puas xav txhos caug thov Vajtswv nrog cov uas nej qhia thiab hais kom tus uas thov Vajtswv seb nws puas xav hais lus ua tsaug xwb.
Tej zaum koj kawm tau txog qhov uas kev ris txiaj tseem ceeb npaum li cas thaum koj nyeem tej nqes no ntxiv rau tej nqes uas Thawj Tswj Hwm Eyring hais: Phau Ntawv Nkauj 100; Mauxiyas 2:19–22; Amas 26:8; 34:38; Lus Qhuab Qhia thiab Kev Khi Lus 59:21; 78:19; 136:28.