Kile, Kememej, im Leļo̧k Kam̧oolol

Anij ej kajjitōk bwe jān leļo̧k kam̧oolol n̄an E kōn jabdewōt kōjeram̧m̧an ko jej būk jān E. Epidodo n̄an kōj n̄an erom jab itok limo ilo jar in kam̧oolol ko ad, emakijkij āliji ejja naan ko wōt bōtaab ilo ejjeļo̧k kōttōpar n̄an leļo̧k kam̧oolol ko āinwōt juon menin letok an bōro n̄an Anij. Jej aikuj leļo̧k kam̧oolol ilo Jetōb (lale D&C 46:32) kōn menin jej en̄jake lukkuun kam̧oolol kōn ta eo Anij eaar letok n̄an kōj.

Ekōjkan ad maron̄ kememej em̧ool juon m̧ōttan in aolep men Anij eaar kōm̧m̧ani n̄an kōj? Rijilōk Jon eaar ļo̧o̧ke ta eo Rilo̧mo̧o̧r eaar katakin kōj kōn juon menin letok an kememej me ej itok kōn menin letok eo an Jetōb Kwojarjar. “A Ri Kaaenōm̧m̧an, E Jetōb Kwojarjar, Eo Jema enaaj jilkintok ilo Eta, Enaaj katakin kom̧ men otemjej, im kakeememej men otemjej n̄an kom̧, men ko Iar ba n̄an kom̧” (Jon 14:26).

Jetōb Kwojarjar ej bōktok ememļo̧kjeņ ko an ta eo Anij eaar katakin kōj. Im juon iaan wāween ko Anij ej katakin kōj ej kōn kōjeram̧m̧an ko An, im kōn menin, eļan̄n̄e jej kālet n̄an kōjerbal tōmak, Jetōb Kwojarjar enaaj bōktok jouj an Anij n̄an kakeememej kōj.

Komaron̄ idajon̄jon̄e men jab in ilo jar rainin. Komaron̄ ļoor jiron̄ eo me ej ba bwe kwoj aikuj kam̧oolol Irooj am̧ Anij kōn aolep men (lale D&C 59:7).

Būreejtōn Ezra Taft Benson (1899–1994) eaar elmakote bwe jar ej ejaak iien n̄an kōm̧m̧ane men jab in. Ekar ba: “Rikanaan Joseph eaar ba ilo juon iien bwe juon iaan jerawiwi ko reļļap tata me Armej ro Rekwojarjar ilo Raan-ko Āliktata naaj bōd kake ej jerawiwi in jab kam̧oolol. Ij tōmak elōn̄ iaad eaar jab ļōmņak kōn men jab in āinwōt juon jerawiwi eļap. Ewōr juon kōņaan eļap n̄an kōj ilo jar ko ad im ilo akweļap ko ad ippān Irooj n̄an kajjitōk kōn elōn̄ļo̧k kōjeram̧m̧an ko. Bōtaab jet iien ij en̄jake jej aikuj wujlepļo̧k jar ko ad n̄an kwaļo̧k kam̧oolol im leļo̧k kam̧oolol kōn kōjeram̧m̧an ko em̧ōj kadede kar būki. Ekanooj ļap ad lem̧ōņōņō kaki.”¹

Emaron̄ wōr kain en̄jake in kōn menin letok eo an Jetōb Kwojarjar rainin. Komaron̄ jino juon jar am̧ make kōn kam̧oolol. Komaron̄ jino bwini kōjeram̧man ko am̧ innām bōjrak ium̧win jidik iien. Eļan̄n̄e kwoj kōjerbal tōmak, kōn menin letok eo an Jetōb Kwojarjar, kwonaaj lo bwe ememļo̧kjeņ ko an kōjeram̧m̧an ko jet naaj jiōbtok n̄an ļōmņak eo am̧. Eļan̄n̄e kwoj jino n̄an kwaļo̧k kam̧oolol kōn kajjojo iaer, jar eo am̧ emaron̄ bōk juon iien eaitokļo̧k jān m̧okta. Ememļo̧kjeņ enaaj itok, im barāinwōt kam̧oolol.

Komaron̄ kajieon̄ ejja men eo wōt ilo am̧ je juon ļo̧o̧k ilo jōnōļ eo am̧. Jetōb Kwojarjar eaar jipan̄ armej ro kōn men jab in jān jino in iien. Kwoj kemeemej bwe bok in Moses ej ba bwe juon bok in kemeemej kar kōjparoke ilo kajin eo an Adam im ilo bok jab in kar ļo̧o̧ke bwe jabdewōt armej me kar kūr ioon Anij n̄an maron̄ jeje jān jetōb in im̧we.(lale Moses 6:5).

Būreejtōn Spencer W. Kimball(1895–1985) eaar kōmeļeļeik bwe jekjek eo an jeje im̧we: “Ro me rej kōjparok bok in kakeememej eo eļapļo̧k aer kōjparok im kakeememej Irooj ilo mour ko aer aolep raan. Jōnōļ ko rej juon wāween bwini kōjeram̧m̧an ko ad im door juon ļo̧o̧k in kōjeram̧m̧an kein n̄an ro ineed.”²

Ilo am̧ jino jeje, komaron̄ kajjitōk ippam̧ make, “Ekōjkan an Anij kar kōjeram̧m̧an n̄a im ro ij iakwe er rainin?” Eļan̄n̄e kwoj kōm̧m̧ane men jab in ebwe an emakijkij im kōn tōmak, kwonaaj lo am make kememej kōjeram̧m̧an ko. Im jet iien enaaj wōr am̧ menin letok ko kar bōktok n̄an ļōmņak eo am̧ bwe kwar likjab n̄an kili ilo raan eo innām bōtaab kwonaaj jeļā kar juon un̄ur an pein Anij ilo mour eo am̧.

Ij jar bwe jen maron̄ kōm̧m̧ane juon kijejeto eban jem̧ļo̧k ilo tōmak n̄an kile, keememej, im n̄an leļo̧k kam̧oolol n̄an ta eo Jemedwōj Ilan̄ im ad Rilo̧mo̧o̧r kar kōm̧m̧ane im rej kōm̧m̧ane n̄an kōpeļļo̧k iaļ eo n̄an kapijuknen n̄an Er.