Molimau e auala i le Seminare

Ata

Sa aoao au e lou tina i le talalelei a o ou laitiiti, ae talu ai sa lei avea lou tama ma se tagata o le Ekalesia, sa ou tuufesilisili ai lava i taimi uma pe o ou i ai i le ala sao. Sa ou le malamalama lava pe aisea na le auai ai lou tama i le Ekalesia pe afai e moni. Ae, sa ou fiafia pea e alu i le Peraimeri ma usu ia viiga. Sa ou olioli foi i taimi na faitau mai ai e lou tina ia tusitusiga paia ia te au, ma i sina mea itiiti ma sina mea itiiti sa ou amata ai ona atiae lau lava ia molimau.

Ina ua ou auai i Tamaitai Talavou, o se tasi o sini na ou faia o le faasoa atu lea o lau molimau i Aso Sa anapogi uma. O le tuuina atu o lau molimau sa avea o se mausa mo au ma na faamalosia ai lou manao e faateleina lou malamalama ina ua mafai ona ou lesitala i le seminare.

O lau vasega muamua lava o le seminare sa aoaoina ai le Feagaiga Tuai. I lena tausaga na le gata ina sa ou ola ae e talisapaia ma faatauaina le Feagaiga Tuai, ae sa ou aoao foi i le taua o malumalu ma mea tau gafa.

Sa ou auai faatasi ma isi tamaiti mai lau uarota ma auai i le faia o galuega o talafaasolopito o aiga. Sa matou faavasegaina le faitau fiaselau o igoa ma atiae se alofa tele mo tagata sa toetoe lava a matou le iloaina—na o o latou igoa ma isi faamaumauga tapulaa. E ui na ou iloa sa taua le galuega sa matou faia, ae na ou lagonaina le lotovaivai ma le le fiafia i nisi taimi. Sa ou galue ina ia mafai ona faia sauniga mo tagata sa ou le iloaina, ae sa le mafai ona ou aapa atu i lou lava ia tama. Sa lei malamalama o ia i le taua o le mea sa ou faia. Sa faaauau pea ona ou tatalo ma anapogi ina ia pai atu ia te ia.

O le tausaga na sosoo ai i le seminare na matou suesueina ai le Feagaiga Fou. I se tasi taeao ina ua ou ala ae, sa amata ona ou faitau e uiga i le Faaola i Ketesemane. Sa tafe mai loimata i ou mata a o ou iloaina o le toto na Ia faamaligiina sa mo a’u. Sa ou moomoo maimau pe ana ou le agasala! Sa oo mai upu a Isaia lea na matou suesue i ai i le tausaga ua mavae i lou mafaufau: “Ua manua o ia ona o a tatou solitulafono, ua momomo o ia ona o a tatou amio leaga:o le aoaiga e filemu ai tatou sa i ona luga lea” (Isaia 53:5). A o ou faitau e uiga i le Faasatauroga ma le Toetu, sa sau lou tina i totonu o le potu. Sa ou faasoa atu ia te ia ou lagona, o lau molimau, ma lou manao mo lou tama ia iloa le mea ua ou aoaoina i le seminare.

Sa faaauau pea ona tuputupu ae lau molimau i le tausaga na sosoo ai a o matou faitauina le Mataupu Faavae ma Feagaiga. Sa ou maua se molimau o Iosefa Samita o se perofeta. Sa tonu foi ia te au e mulimuli i lana fataitaiga ma ole atu i le Atua pe moni le Ekalesia. E ui ua uma ona ou maua se talitonuga i lou loto, ae i se tasi aoauli sa tuua ai na o au ma sa ou tatalo ai ma le faamaoni. A o ou tatalo, na ou iloaina ai o loo atiaeina le molimau lea sa ou ole atu ai a o ou suesue i tusitusiga paia ma auai i le seminare.

Na tatala e le Alii lou mafaufau ma lou loto i lena tausaga, ma ou malamalama ai i le Mataupu Faavae ma Feagaiga ou te lei malamalama muamua i ai. Sa ou aoao foi i le taua tele o agaga (tagai MF&F 18:10–16) ma sa amata ai ona faasoa atu lau molimau faatupulaia ia i latou sa leiloaina le talalelei, e aofia ai ma lou tama.

Sa ou iloaina o le suesueina o le Tusi a Mamona i lou tausaga faaiu i le seminare o le a faamalosia ai foi lau molimau. A o ou suesue moni lava, sa ou lagonaina le alofa o le Tama Faalelagi ia te au. Sa musuia au i tala ma oo ai i le tulaga lea sa na o le pau lava le mea na ou manao e fai o le faitauina lea o le Tusi a Mamona. Sa amata ona ou aveina le Tusi a Mamona i le aoga ma faitau i ou taimi avanoa. Sa ou amata foi ona talanoaina mea sa ou faitauina i lou tama.

I se tasi aso ina ua maea se talanoaga umi ma lou tama e uiga i le talalelei, sa ou luiina o ia e faitau atoa le Tusi a Mamona. Na ou molimau i ai, e pei foi o au, e mafai foi ona ia maua se molimau.

Ou te fiafia e faapea atu sa faitau e lou tama le Tusi a Mamona. Ina ua ia faia, sa ia iloa e moni le Ekalesia ma muilimuli ane ai papatisoina! Ua sauniuni nei lou aiga ina ia faamauina i le malumalu. Ou te iloa o le auai ai i le seminare ma le faitauina o tusitusiga paia na fesoasoani ia te au e atiae lau lava molimau, ma ou te iloa e faamanuiaina e tusitusiga paia ia aiga.