Gidii’en Got ko Urngin e Ngiyal’

Bay e lem ko ngiyal’ kug bitir ko reb e nam u fayleng ningan ngongoliy e saysing ko postcard ko gubin e season u lan reb e duw. Urngin e pul ni ke yaen e ba ma’ang’ang mab fel’. Nap’an e rran u winter nib fel’, e ice nib polo’ ke garar nga dakaen fapi burey nib tolang ma fapi kanawo’en e binaw. Spring e ke fek e nuw nibe be’echnog ma puf urngin mit e paan. Lane lang nib sasigal nap’an e summer e ba pii’ fan e yal’ nib tomalngin. Ma autumn nib fel’ e ke thilyeg e nam ko urngin mit e orange, mag’chol’ nge rowrow’. Nap’an kug bitir, Gube a’dag urngin e season, mada’ ko daba’, Gube a’dag e rogon rad niyad ba thil’thil’.

Bay urngin mit e season u yafas rodad. Boech e ba gwael nib fel. Ma boch e danga’. Boechi erran ko yafas rodad marib fel’ ya’an woed saysing ko calendar. Machane bay boch erran ma tin nira karing e amith u gum’racha’dad ma fek nga yafas rodad to’orngin e gafgow, puwaen’, nga mo’oy.

Gube lemnog ko e ngiyal’ fa reb gadad gubin kad lemnoged nib fel’ ningad paered ulane nam ni kan sug ko fapi rran nib machaelboeg ngiyal’ ma chuweg ko kireb e ngiyal’ uthilin.

Machane dani buch. Ma gathi fel’ ningad athpeged.

Nap’an gube sul ngadakaen e yafas rog, ngan nang fan ni bay bo’or e nigyal’ ko tugul e ke yib ngog nap’an kug waen ufithik e ngiyal’ nib yoko’.

E Chitamangdad nu Tharmiy ni gubin lowaen’ rok ma nang ni fapi bitir Rok ningar manged e gidii’ ni kan taermedliy ningar manged, thingar nanged urngin e ngiyal’ ko togopluw nap’an e milekag ko yafas. Fare profet Lehi ulan fare Babyor ku Mormon ke yoeg fa’anra dariy’ e togopluw, “‘ma tin nib mat’aw e dabi buch” (2 Nephi 2:11). Arragon, i’ir e tin mo’oy ko yafas nira ayuwegdad ningad nanged, faned, ma faflaen’ e thibngin riy’ (mu guy D&C 29:39; Moses 6:55).

President Brigham Young ke yoeg e biney rogon: “Urngin e gidii’ nib lowean’ ni kan pii’ed e crown ngak ko e crown ko fel’ngin, yafas ni dariy’ tungun, ma yafas nib manemus thingar ranoed ufithik urngin e sikeng ni kan taermedliy ko e gidii’ nib lowaen’, ningar thapeged e fel’ngin mar chibiyraed nga lang. Urngin e gafgow ni ke yib ngadakaen e gidii’ nira yim’ ran gafgownog riy’ … ninge taermedliyraed ningar falflaen’gaed u poewchen en Somoel. … Urngin e sikeng ma ba’nen nira buch kam gelnog bachan nib t’uf ko thapeg rom.”¹

Fare duwer i’ir gathi fa’an gadadra nanged e ngiyal’ ko gafgow machane urrogon gadadra ngongoliy nap’an e yoko’. E wo’en nib ga’ nap’an fapi ngiyal’ nima thil ko yafas ningad koeled ko fare thin nib mich ku Got, bachan e machib Rok e kan sunmiy gathi kemus ninge ayuweg ko fapi yoko’ ko yafas machane nge powiy’dad u wuru’. Chitamangdad nu Tharmiy ke pii’ e thin Rok udakaen fapi profet Rok— e nang fan nib ga’ puluwan ni kan sunmiy ninge powiy’dad ufithik e togopluw ko ngiyal’ nib mom’aw ngak e faflaen’ ni dani yoeg nge magal ko yafas nib manemus. I’ir e yang nib ga’fan ko yafas rodad ningad gayed e gelngin, gel bugwaen, ma laniyaen’ ningad koeled ko tin riyul’ ma mat’aw ni dariy’ fan e kireb nira yib ngodad.

Picha ni ka ranoed nga fithik e raan ko tawfe man fek fare tawa’ath ko fare Kan Thothup ea karted ay’rad nga daken e kanawo’ ni ngan mang pigirdii’en makan tay’chilen ni ngad laked ni gadad ba dugliy ma gadad ba yul’yul’ ni ngad laked loen ay fare Tathapeg.

En Tathapeg ke fil ni be mateg ram’en e yal’ rok “nga daken e girdi’ nib tagan nge girdi’ ni bfel’ nta’reb rogon, ma … be [pi’] e n’uw ngak e pi’in yad be rin’ e tin nib mat’aw nge pi’in yad be rin’ e tin nib kireb” (Matthew 5:45). Boech e ngiyal’ dabiyog ningad nanged mang fan e mom’aw, ma tin nib kireb, ra buch ko yafas ney. Machane e gachalpen Kristus, ngad pagaen’dad ni fa’an gadadra “gay ufithik e mag’aen’, meybil, nga michaen’, … gubin e tin ra muruwel ni fan e fel’ [wa’athdad], fa’an [gadadra] yan nib mat’aw” (D&C 90:24; kan puluw).

Ko e chongin e Galasia Rok, ko e Gidii’en Got, ngad pigpignoged ufithik e faflaen’ ma fel laniyaen’dad u urngin mit e lane lang ma urngin e ngiyal’. Ma nap’an ngad rrin’ed, ra sug e gum’racha’dad ko e mich nib thothup, athap nima gol, ma t’ufeg ko tharmiy.

Arragon, gadad ra yan ufithik urngin e ngiyal’—arragon e ba fel’ mab amith. Machane dariy’ fan e ngiyal’, e gadad gubin e gachalpen ku Yesus Kristus, gadad ra athapeg nga Dakaen nap’an ngad ranoed ko magal Rok.

Ran ngochngoch’eg, gadad gubin e Gidii’en Got, ba laniyaen’dad ningad filed Marunga’gen, mad t’ufeged Ngak, mab t’ufeged ngak boch e gidii’. Gadad e tamilekag ngadakaen e kanawo’ nib taw’ath ko gachalpen, ngad ranoed nga but ngak e tin nu tharmiy.

Aram fan, ngad manged e Gidii’en Got ko spring, summer, fall nga winter. Ngad manged e Gidii’en Got ko urngin e ngiyal’.