Diakono apî roa

Ua tiʻa o Benji i mua i te hiʻo, ma te faaafaro i toʻna taamu arapoa. E mea tano maitai toʻna ahu uouo e toʻna piripou avae roa ninamu ereere. Ua paherehia to’na rouru. Ua ineine maitai oia no te faatoroʻahia ei diakono. No reira no te aha oia i mătaʻu ai ?

Ua rave mai ra o Benji i ta’na mau papaʻiraa moʻa e ua haere mai ra i rapae i te piha. Ua tamata oia eiaha e feruri i te huru taa ê o te mau ohipa i te fare pure i teie mahana. E te vai ra taua ohipa apî ra ta’na i manaʻonaʻo noa i te mau taime atoa a feruri ai oia i te reira : te opereraa i te oroʻa moʻa. E mai te mea noa’tu e, e hape oia i te taime matamua i teie hepetoma i muri nei ? Ua tamata atoa oia i te haamoʻe i te reira a faaruʻe atu ai oia i te fare.

Ua tere te pureraa oroʻa mai tei matarohia. Tera râ, i muri mai, ua haere o Benji e toʻna utuafare i roto i te piha ohiparaa a te episekopo Salazar. E mea taa ê mau ïa teie. Ua matau oia e, i teie taime, tei roto ïa oia i te Paraimere no te haamataraa.

Ua parahi o Benji i raro e ua tuu o papa, te episekopo, te peresideni o te feia apî tamaroa e na tauturu o te episekoporaa i to ratou rima i niʻa i toʻna upoo. Na papa i horoʻa ia’na i te Autahuʻaraa a Aarona. I te taime no te haamaitairaa, ua ore te maenuenu i roto i te opu o Benji. Ua ite oia i te hau e te oaoa.

Ua tiʻa o Benji e ua aroha rima i te taata tataʻitahi. E i muri iho, ua apa oia ia mama e i toʻna taeaʻe, o Jay, e i toʻna tuahine naʻinaʻi o Mirasol.

I muri aʻe, ua haere oia i te Haapiiraa Sabati. Noa’tu e, e ere te mau piha haapiiraa apî hoê â e ta te Paraimere, aita ïa i huru ê roa’tu. Te haapiiraa no niʻa ïa i te pure. Ua faroo oia e rave rahi haapiiraa no niʻa i te pure na mua aʻenei i roto i te Paraimere. Nehenehe atura ta Benji e huti mărû i te aho. Peneiaʻe e ere i te ohipa teimaha te riroraa ei diakono.

« E mea au roa », te na reira ra o Jay i niʻa ia Benji i muri aʻe i te pureraa. « Na’u e haamaitai i te oroʻa, e e nehenehe ta oe e opere ».

Ua ore aʻera te maenuenu. « E, e mea au roa », ta’na ïa i parau mărû noa. Te opereraa i te oroʻa moʻa te ohipa i haapeʻapeʻa rahi roa ia Benji !

I muri aʻe i taua pô ra, ua ite atu o Benji ia papa te taiʻo noa ra i niʻa i te parahiraa mărû. « Nahea mai te mea e, e moʻehia ia’u te hoê taata e aita ratou i farii i te oroʻa moʻa ? » ta’na ïa uiraa. « Nahea mai te mea e, e hape te avae ? » Ua ite roa oia i roto i toʻna feruriraa, ua marua te faarii i niʻa i te tahua, e ua pee te mau hapaina pape na te mau vahi atoa.

Ua uumi o papa i te tapono o Benji. « Te haamanaʻo nei au i te taime matamua a opere ai au i te oroʻa moʻa. E mea riʻariʻa aʻe paha vau ia oe i teie taime ».

Ua ama te mata o Benji i te hitimahuta. « O oe ? Aita hoê mea ta oe e riʻariʻa ! »

Ua ata o papa. « E rave rahi taime to’u riʻariʻaraa. Ua ite anei oe e, eaha te mea i tauturu ia’u ia ore te riʻariʻa ? »

Ua feruri rii o Benji maa taime iti. « Te pure ? »

Ua ataata o papa. Ua tiʻa te reira. Te pure E ua horoʻa mai to’u metua tane i te hoê haamaitairaa ia’u. Hinaaro anei oe ia horoʻa vau i te hoê haamaitairaa ia oe ? »

Ua tairiiri Benji i te upoo. « E ! Hinaaro roa vau i te reira ».

Ua putuputu aʻera te utuafare i roto i te piha faafaaearaa. Ua tuu aʻera o papa i toʻna na rima i niʻa i te upoo o Benji. A paraparau ai o papa, ua ite aʻera o Benji e, te haamata ra te roimata i te tahe mai. « A haamanaʻo », ua na reira o papa i roto i te haamaitairaa, « ua farii oe i te autahuʻaraa na roto i e hoê oroʻa moʻa. Ua horoʻa mai te Metua i te Ao ra ia tatou i te autahuʻaraa ia tiʻa ia tatou ia tavini ia vetahi ê. Mai te mea e, e nehenehe ta outou e rave i te reira ma to aau atoa, e haamaitaihia oe i roto i te reira mea e i roto i te mau mea atoa ».

Ua pure o Benji i te hepetoma taatoa no te ani i te tauturu. I te Sabati i muri iho, ua amui atu oia i te mau diakono i mua i te fare pureraa. Ua faaroo maitai oia a faahiti ai o Jay i te haamaitairaa o te faraoa.

I taua taime iho ra, ua tupu faahou te manaʻo peʻapeʻa i roto ia’na. E nehenehe mau anei ta’na e rave i teie ohipa ? E mea faufaa roa hoʻi ! Ua haamanaʻo aʻera oia i te mau fafauraa i roto i te haamaitairaa a papa. Ua ore aʻera toʻna mau manaʻo peʻapeʻa a parahi ai te Varua i niʻa iho ia’na.

Ua rave mai ra oia i te farii pane e ua haere atura ma te papû i niʻa i te mau anaʻiraa parahiraa i faataahia na’na. Ua faatoro mărû atura oia i te farii i te hoê vahine i niʻa i te anaʻiraa parahiraa matamua.

Ua ataata mai ra oia i niʻa ia’na. Ua ataata atura o Benji, ma te ite e, te tavini ra oia i te Fatu.