Manaʻo no te amuiraa rahi

Ahuru ma pae mahana hou te haamataraa o te amuiraa rahi tataʻitahi, e faatautau to matou utuafare i ta matou tapaʻo faaiteraa i te haamataraa o te « A feruri na, o vai te haere mai e tamaa i teie pô ? » I muri iho, e tuu atu matou i te mau hohoʻa apî roa aʻe o to tatou mau peropheta, e hiʻo e e heheu parau mai roto mai i te veʻa a te Ekalesia no niʻa i te amuiraa i maʻiri aʻenei.

E faaineine au na roto i te imiraa i te peropheta ta matou e farii i taua pô ra. I te tahi taime, e imi au i te tahi mau tauihaa na rapae i te fare no te faahohoʻa i te tahi mau mea tei itehia ia’u, e e tuu vau i te reira i niʻa i te hoê mereti. I te taime tamaaraa i te pô, ia faati‘a anaʻe au i te mau aamu no niʻa i te tauihaa tataʻitahi, e imi te taata tataʻitahi o vai taua taata ra. I te tahi atu taime, e faatia vau i te hoê aamu e aore râ, e piti, ta te peropheta i faatia i roto i te amuiraa rahi i maʻiri aʻenei.

Ua maere au i te mau mea ta ta’u mau tamarii e haamanaʻo no niʻa i to tatou mau peropheta here e mau aposetolo, e ua ite au e, ua faarahi atoa teie haʻuti ohie roa i to’u here e i to’u ite no niʻa i teie mau taata rahi.

I te haereraa mai o Elder Neil L. Andersen no te Pŭpŭ no te Tino Ahuru Ma Piti Aposetolo e ta’na vahine o Kathy, i roto i ta matou amuiraa tĭtĭ, ua faatiʻa mai te tuahine Andersen i te hoê aamu ia matou. Ua parau mai oia e, a ora ai ratou i Farani, ua neneʻi faarahi oia i te mau aʻoraa o te amuiraa na ta raua mau tamarii tataʻitahi—e tae roa’tu i te mau tamarii apî roa. Ua hitimahuta oia i te iteraa i te moni hoo o te mau api neneʻi, inaha, e moni rahi roa. Ua tupu mai ra te manaʻo i roto i toʻna feruriraa e : « Eaha te mea faufaa no oe ia farii to oe utuafare i te mau parau a te mau peropheta ? »

Ua putapû roa vau i teie aamu, e ua imi au i te raveʻa ia farii te taata tataʻitahi i roto i to matou utuafare i te hoê neneʻiraa no te mau aʻoraa o te amuiraa. Ua anaanatae roa ta maua mau tamahine. Ua faaohipa matou i te reira i roto i te pureraa pô utuafare e i roto i te tuatapaparaa papaʻiraa moʻa. Ua au roa vau i te hiʻoraa i te hoê tamahine ia taiʻo i te mau aʻoraa o’na anaʻe, e ia tapaʻopaʻi i te reira i te hoê peni. Hoê tamahine ta’u, no bapetizo-noa-hia aʻenei, ua ani mai ia’u ia taiʻo maua i te mau aʻoraa te tahi e te tahi.

I roto i ta’u haapiiraa i roto i te Sotaiete Tauturu, ua titau vau i te mau tuahine tataʻitahi ia hiʻohiʻo faahou i te mau aʻoraa no te amuiraa i maʻiri aʻenei ; ua taiʻoiʻo faahou te tahi mau tuahine i te mau aʻoraa, ua mataʻitaʻi te tahi pae i niʻa i te Itenati. E rave rahi tuahine tei parau e, ua ite ratou e, ua ineine maitai a‘e ratou no te amuiraa i muri nei.