Hɛn Asodzi dɛYɛbɛgye Binom

Mber bi a etwa mu no, menyaa krataa a banyin bi a ɔatɔ dɔnsuar efi Asɔr no mu no, kyerɛwee. Ɔtse dɛ hɛn asɔrmba mu dodowara. Ɔkyerɛɛ dza ɔmaa ɔbɛyɛɛ akɔtrɔbɔdwe wiei no, ɔkyerɛɛw dɛ:

“Nna mowɔ no mbordo na afei mowɔ kumabaa bi. M’enyi nngye na metse dɛ mbrɛ miridzi nkõgu wɔ adze nyinara mu. Sɛ asɛmpa no efi m’abrabɔ mu mpo a, oemmfi m’akoma mu dabiara da. Meserɛ wo mpaabɔ.

“Meserɛ, mma wo werɛ mmfir hɛn—Nda a Odzi Ekyir Ahotseweefo a yɛayew no a, yɛwɔ abowano ha yi. Minyim bea a Asɔr no wɔ, mbom ɔtɔfabi a mihia obi ma ɔakyerɛ me kwan no, ɔahyɛ me nkuran, oeyi mo suro, na ɔagye dase akyerɛ me.”

Ber a merekenkan krataa yi, m’adwen danee kɔr nsera bi a medze kɔr wiadze mu nsaano mfonyinsie bea kɛse bi hɔ—Victoria nye Albert Museum a ɔwɔ London, Ngyiresi Aborɔkyir a, ɔayɛ atsenkã no. Hɔ no na nsaano mfonyin a wɔdze ato adze fɛɛfɛɛ mu a, ɔyɛ Joseph Mallord William Turner n’edwindze mapã a, ɔyɛɛ no afe 1831 mu no, wɔ. Nsaano mfonyin no kyerɛ mununkum a ɔahyɛ tumm nye po a ɔapram n’ebufuwhyew mu a, ɔkyerɛ mbusu na owu a ɔreba. Kan bi a ofi nsuhɛn bi a woehyia amandze no hyerɛn fi ekyirekyir. N’enyim no, nkwa-gye hɛmba kɛse a, asorɛkye kɛse bi a ɔdze nsu a oruhur reba atow no akɔ sor, wɔ hɔ. Mbanyin no kwan hɔn ntabon no akokodur mu dze nkwa-gye hɛmba no wura ehum no mu. Ɔyer no nye mba beenu gyina mpoano a, nsu afow hɔn na mframa ahwe hɔn. Wɔdze ahopopo hwɛ po do. M’adwen mu no, motwaa nsaano mfonyin ne dzin no do tsia. Emi dze ɔbɛyɛɛ Yɛrekɛgye Nkwa.¹

Abrabɔ n’ehum mu no, nna esian esuma hyɛ mu. Mbanyin na mbaa, mberantsɛmba na nkataasia bohu dɛ wɔatɔ dɔnsuar ma woehyia ɔsɛɛ. Woana na ɔbɔkɔn nkwa-gye hɛmba no, oegya ne fie na n’ebusua ahotɔ ekyir, na ɔakɔ akɛgye nkwa?

Hɛn dwuma no mbor hɛn do. Yɛreyɛ Ewuradze No soma; yɛfata No mboa.

Owura no somdwuma mu no, Ɔfrɛɛ enufo wɔ Galilee dɛ wongyaa hɔn asawu no na wombedzi N’ekyir, rese dɛ, “Mebɛyɛ hom nyimpa enufo.”² Hom ma yɛnkɛkã mbaa nye mbarimba enufo no ho, ama yeetum aama mboa a yebotum.

Hɛn dwuma nye dɛ yɛbɔkɔ akɛgye hɔn a woefi asɔr dwumadzi ahobambɔ mu, ama yɛdze woyinom aaba ma wɔabɛmee wɔ Ewuradze Ne nsɛm mu, ebenya Sunsum no N’anyɛnkoyɛ ma “[wɔa]nnyɛ ahɔho nye amamforafo bio, [wɔa]yɛ ahotsewfo no kuromamfo nye Nyankopɔn fifo.”³

Mehu dɛ botan siantsir tsitsir ebien ara na ɔma wɔsan bɔbɔ hyew, na ɔdze nsesã ba su, suban, nye ndzeyɛɛ mu. Odzi kan, ankorankor san ba osiandɛ obi akyerɛ mbrɛ hɔn onnyiewiei ndaamba botum abɛyɛ, na ɔaboa hɔn ma woesi no egyinae dɛ wobenya. Hɔn a wɔmmbɔ hyew no nntum nntsena dza ɔnnyɛ ntowdo mu, ber a woehu dɛ wobotum enya dza ɔkrɔn.

Otsĩa ebien, binom san ekyir osiandɛ adɔfo binom anaa “ahotsewfo no kuromamfo” edzi Agyenkwa no N’afotu do, ma wɔadɔ hɔn nyɛnko dɛ hɔn ho⁴ na wɔaboa binom ma woenya hɔn adaaso ne mãhyɛ na hɔn botae horow no aba mu.

Dza ogya ma iyi ba ntsɛm ayɛ—na ɔbɔkɔ do ayɛ— ɔdɔ fapem no.

Nkorɔfo no ankasa a, woehyia amandze wɔ Turner ne nsaano mfonyin a ehum apram po no, tse dɛ hɛn asɔrmba a wɔmmbɔ hyew dodowara a, wɔtweɔn hɔn a wɔkɔn nkwa-gye ahɛmba no dɛ, wɔnkɛgye hɔn. Hɔn akoma sũ hwehwɛ mboa. Enãnom nye egyanom bɔ mpaa ma hɛn hɔn mbambanyin nye mbabaa. Nyernom totɔserɛ ɔsorsor dɛ nsa nkã hɔn ekunnom. Ɔtɔfabi a, mbofra bɔ mpaa ma hɔn awofo.

Ɔyɛ me mpaabɔ dɛ nkyɛ yebenya pɛ dɛ yɛbegye hɔn a wɔmmbɔ hyew no na yɛdze hɔn asan aba Jesus Christ N’asɛmpa ne dɛw mu, ama wɔnye hɛn nyina ebenya dza fekuwbɔ emudzi mu dze wɔ ma.

Nkyɛ yɛatsen hɛn nsa agye hɔn a woetwa hɛnho ehyia no: nkɔdaa na mbiriwa no, ekunafo no, ayarfo, hɔn a woedzi dzɛm, hɔn a wɔmmbɔ hyew, nye hɔn a worinnsie mbrasɛm no. Nkyɛ yɛatsen nsa a ɔboa nye akoma onyim ayamuhyehye ama hɔn. Yɛyɛ dɛm a, yɛdze enyigye bɛhyɛ hɔn akoma mu, na yebenya abodwee sũahu huãhuãm a ɔba hɛn do, ber a yɛboa binom wɔ onnyiwiei anamɔnkwan no do no.