Cov Mus Saib Xyuas tom Tsev tsab Xov, Kaum Ib Hlis Ntuj 2010
Los, Koom Nrog Peb
Txawm yog nej raug xwm txheej dab tsi, txawm nej zaj keeb kwm zoo li cas los, los sis nej zaj lus tim khawv muaj zog npaum li cas los, yeej muaj chaw nyob hauv lub Koom Txoos no.
Muaj ib zaug ib tug txiv neej ua npau suav nws nyob hauv ib chav loj loj es cov neeg sawv cev rau txhua txoj kev teev ntuj thoob plaws lub ntiaj teb tau sib sau ua ke. Nws kawm hais tias muaj ntau yam los ntawm txhua txoj kev teev ntuj uas tsim nyog thiab ntxim nyiam.
Nws ntsib ib nkawm niam txiv uas sawv cev rau Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg thiab nug hais tias, “Nej yuam nej cov mej zeej ua dab tsi?”
Lawv teb tias, “Peb tsis yuam lawv ua dab tsi. Tiam sis tus Tswv hais kom peb muab txhua yam fij rau nws.”
Nkawm niam txiv ntawd piav txog kev hu neeg ua hauj lwm hauv lub Koom Txoos, kev mus saib xyuas tom tsev thiab kev mus qhia tom tsev, kev ua tub txib, muaj tsev neeg hmo ua ke, ua hauj lwm hauv lub tuam tsev, kev pab tib neeg, thiab kev txib qhia tej chav kawm.
“Nej puas them nej cov neeg rau txhua txoj hauj lwm lawv ua?” tus txiv neej nug nkawd.
Ob tug teb tias, “Peb tsis them. Lawv ua siab dawb pub kev pab.”
Nkawd hais ntxiv hais tias, “Tsis tas li ntawd xwb, txhua rau hli, cov mej zeej siv ob hnub koom los yog saib 10 teev ntawm lub tuam rooj sab laj.”
“Yus siv kaum teev mloog tib neeg hais lus tiag!” tus txiv neej xav tsis thoob.
“Neb tej kev sib ntsib hauv lub koom txoos txhua hnub caiv nev? Ntev li cas?”
“Peb teev, txhua Hnub Caiv!”
Tus txiv neej hais tias, “Auj yauj. Cov mej zeej ntawm nej lub koom txoos puas ua li nej hais tiag tiag?”
“Lawv ua li ntawd thiab ua ntxiv. Peb tsis tau hais ib yam dab tsi txog tsev neeg zaj keeb kwm, cov camp rau tub hluas ntxhais hluas, kev kawm vaj lug kub, kev kawm ua thawj coj, tej yam ntxim saib ntxim ua rau cov tub hluas ntxhais hluas txhua lub lim tiam, kev kawm vaj lug kub thaum sawv ntxov, kev tu lub tsev koom txoos, thiab kuj muaj tus Tswv txoj kev cai noj qab haus huv, kev yoo mov pab cov pluag txhua lub hlis, thiab kev them ib feem kaum.”
Tus txiv neej hais tias, “Kuv tsis paub. Vim li cas ib tug neeg yuav xav koom ib lub koom txoos zoo li ntawd?”
Nkawm niam txiv luag nyav thiab hais tias, “Wb tsuas tos koj nug li ntawd xwb.”
Vim Li Cas Ib tug Neeg Yuav Xav Koom Ib lub Koom Txoos Zoo Li Ntawd?
Niaj hnub no ntau lub koom txoos nyob thoob plaws lub ntiaj teb muaj cov mej zeej tsawg zuj zus tuaj, Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg yog lub koom txoos uas muaj mej zeej coob zuj zus tuaj sai dua li lwm lub koom txoos—txawm lub koom txoos no me tshaj lwm lub koom txoos—. Thaum lub Cuaj Hlis Ntuj xyoo 2013 lub Koom Txoos muaj 15 phlom tus mej zeej nyob thoob plaws lub ntiaj teb.
Muaj ntau yam uas qhia tias yog vim li cas, tiam sis thov cia kuv qhia nej ob peb yam.
Tus Cawm Seej lub Koom Txoos
Qhov ib, Yexus Khetos Nws tus kheej tau muab lub Koom Txoos no txum tim rov qab los hauv peb lub caij nyoog. Ntawm no nej muaj txoj cai ua tej yam los ntawm Nws lub npe—ua kev cai raus dej kom txais kev zam txim, muab lub txiaj ntsim Vaj Ntsuj Plig Dawb Huv rau lwm tus, thiab khi tej yam hauv lub ntiaj teb thiab saum ntuj ceeb tsheej.1
Cov uas koom lub Koom Txoos no hlub tus Cawm Seej Yexus Khetos thiab xav nrog Nws mus. Lawv xyiv fab vim lawv paub tias Vajtswv rov qab hais lus rau tib neeg dua. Thaum lawv txais cov kab ke pov thawj hwj dawb ceev thiab khi lus nrog Vajtswv, lawv hnov tau Nws lub hwj chim nyob hauv lawv lub neej.2 Thaum lawv nkag hauv lub tuam tsev dawb huv, lawv paub tias lawv nyob hauv Nws xub ntiag. Thaum lawv nyeem cov vaj lug kub dawb huv3 thiab ua raws li Nws cov yaj saub qhia, lawv nyob ze dua rau tus Cawm Seej uas lawv hlub.
Kev Muaj Siab Ntseeg
Ib yam uas qhia yog vim li cas yog qhov uas lub Koom Txoos muab cib fim rau tib neeg ua zoo.
Kev ntseeg Vajtswv yeej yog ib qho zoo, tiam sis tib neeg pheej xav ua tej yam ntau tshaj lawv xav mloog tej zaj lus qhia zoo los yog ua npau suav txog lawv lub tsev nyob saum ntuj.4 Lawv xav ua raws li lawv txoj kev ntseeg. Lawv xav sia siv thiab mob siab ua txoj hauj lwm tseem ceeb no.
Thiab yeej muaj li no thaum lawv koom nrog peb—lawv muaj cib fim siv lawv tej txuj ci, txoj kev khuv leej, thiab siv sij hawm ua tej yam zoo. Vim peb tsis them nqi rau cov xib hwb nyob hauv zej zog nyob thoob plaws lub ntiaj teb, peb cov mej zeej ua txoj hauj lwm txhawb pab lwm tus lawv tus kheej. Cov thawj coj hu lawv los ntawm kev tshoov siab. Tej lub sij hawm peb pab dawb; tej lub sij hawm lwm tus txib peb ua. Peb xav hais tias tej kev txib peb ua tej yam tsis yog tej lub nra hnyav tiam sis yog cib fim rau peb ua raws li peb tej kev khi lus hais tias peb yuav pab Vajtswv thiab Nws cov me nyuam.
Cov Koob Hmoov uas Muaj Nqi
Qhov peb uas qhia vim li cas tib neeg koom lub Koom Txoos yog qhov uas thaum yus taug kev ua ib tug thwj tim ces ua rau txais tau cov koob hmoov uas muaj nqi.
Peb xav hais tias kev ua kev cai raus dej yog qhov pib ntawm peb txoj kev ua ib tug thwj tim. Qhov uas peb niaj hnub nrog Yexus Khetos taug kev ua rau peb muaj kev kaj siab lug thiab paub lub ntsiab ntawm lub neej no thiab kev xyiv fab heev thiab txoj kev cawm seej nyob mus ib txhis thaum yav tom ntej.
Cov uas rau siab taug txoj kev no yuav tsis raug ntau yam kev tu siab, thiab kev nyuaj siab ntawm lub neej no.
Cov uas pluag hauv sab ntsuj plig thiab muaj siab ncaj nrhiav tau kev txawj ntse uas muaj nqi heev.
Cov uas nyuaj siab los yog tus siab yuav nrhiav tau kev kho mob.
Cov uas ris kev txhaum hnyav heev yuav nrhiav tau kev zam txim, kev ywj siab, thiab kev so.
Rau cov uas Tawm Mus
Kev nrhiav qhov tseeb tau ua rau ntau plhom tus neeg nrhiav tau Yexus Khetos lub Koom Txoos. Tiam sis, muaj ib txhia uas tawm lub Koom Txoos uas lawv ib txwm nyiam mus.
Tej zaus ua rau yus xav paub, “Yog tias txoj moo zoo yog ib qho zoo heev, ua li cas yuav muaj tib neeg tawm mus?”
Tej lub sij hawm peb xav tias yog vim leej twg ua rau lawv tus siab los yog lawv tub nkeeg los yog ua txhaum. Tiag tiag, tsis yog ib qho yooj yim npaum li ntawd. Tsis muaj ib qho xwb uas qhia tias yog vim li cas txhua tus ua li ntawd.
Rau peb cov mej zeej uas peb hlub ib txhia siv ntau xyoo nug seb lawv puas xav tawm ntawm lub Koom Txoos mus.
Nyob hauv ib lub Koom Txoos uas saib tias kev ywj siab xaiv tseem ceeb heev, nyob hauv lub Koom Txoos uas tau txum tim rov qab los dhau los ntawm ib tug tub hluas uas muaj lus nug thiab nrhiav lus teb, peb saib taus cov uas ua siab ncaj nrhiav qhov tseeb. Tej zaum yuav ua rau peb nyuaj siab thaum lawv txoj kev nrhiav qhov tseeb coj lawv tawm ntawm lub Koom Txoos thiab qhov tseeb uas peb nrhiav tau lawm mus, tiam sis peb saib taus lawv muaj cai teev tiam Vajtswv tus uas Muaj Hwj Chim Tag Nrho raws li lawv lub siab nyiam, ib yam li peb qhia tias peb muaj cai zoo ib yam li ntawd.5
Cov Lus Nug uas Tseem Tsis Tau Teb
Ib txhia txhawj heev txog tej lus nug uas tseem tsis tau teb txog tej yam uas tau ua los yog tau hais thaum yav tas los. Peb lees hais tias nyob hauv 200 xyoos ntawm peb lub Koom Txoos zaj keeb kwm—nrog rau tej yam uas tshoov neeg lub siab, tej yam uas ncaj ncees thiab tej yam uas txhawb nqa tib neeg txoj kev ntseeg—muaj tej yam uas tib neeg tau hais thiab ua uas ua rau lwm tus xav paub yog vim li cas.
Tej lub sij hawm peb muaj lus nug tsuas yog vim peb tseem tsis tau muaj tag nrho cov xov xwm thiab peb yuav tsum ua siab ntev me ntsis ntxiv. Thaum peb paub qhov tseeb tag nrho lawm, ces peb yuav to taub tej teeb meem uas peb tsis tau to taub ua ntej ua rau peb txaus siab.
Tej lub sij hawm tib neeg nyias xav txawv nyias txog lub ntsiab ntawm “qhov tseeb”. Ib lo lus nug uas ua rau ib tug ua xyem xyav, tom qab lawv ntsuam xyuas zoo zoo, yuav txhawb lwm tus txoj kev ntseeg.
Qhov Yuam Kev ntawm Tib Neeg Tsis Zoo Tag Nrho
Thiab, kuv hais ncaj, tau muaj tej lub sij hawm thaum mej zeej los yog cov thawj coj nyob hauv lub Koom Txoos twb ua yuam kev. Tej zaum tau muaj tej yam uas lawv hais los yog ua uas tsis yog raws li peb tej ntsiab cai los yog cov lus qhuab qhia.
Nyaj lub Koom Txoos yuav zoo tag nrho tsuas yog tib neeg zoo tag nrho yog cov thawj coj. Vajtswv zoo tag nrho, thiab Nws cov lus qhuab qhia yeej dawb huv. Tiam sis Nws ua Nws tej hauj lwm dhau los ntawm peb—uas yog Nws cov me nyuam tsis zoo tag nrho—thiab tib neeg tsis zoo tag nrho ua yuam kev.
Nyob hauv phab ntawv qhia lub npe ntawm Phau Ntawv Maumoos, peb nyeem hais tias, “Thiab nim no, yog muaj tej kev yuam kev tej ntawd tsuas yog neeg tej kev tsis yog xwb; yog li ntawd, tsis txhob thuam tej yam uas yog Vajtswv li, xwv kom nej thiaj yuav raug nrhiav pom tsis muaj qhov ceb nyob ntawm Khetos lub rooj txiav txim.”6
Nws yeej zoo li no thiab yeej yuav zoo li no mus txog thaum hnub uas Khetos Nws tus kheej yuav tswj kav nyob hauv lub ntiaj teb.
Yog ib qho tu siab uas ib txhia tau ntog vim tib neeg ua yuam kev. Tiam sis txawm muaj li no los, qhov tseeb mus ib txhis ntawm txoj moo zoo uas nyob hauv Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg yeej yuav tsis ploj mus zuj zus los sis raug puas tsuaj.
Vim kuv yog ib tug Thwj Tim ntawm tus Tswv Yexus Khetos thiab vim kuv tau pom tej kev sab laj thiab tej hauj lwm ntawm lub Koom Txoos, kuv ua tim khawv hais tias tsis muaj ib qhov kev txiav txim tseem ceeb uas yuav hloov lub Koom Txoos no thiab cov ntseeg uas tsis tau mob siab nrhiav peb Leej Txiv Saum Ntuj Ceeb Tsheej txoj kev tshoov siab thiab txoj kev coj ua ntej. Nyov yog Yexus Khetos lub Koom Txoos. Vajtswv yeej yuav tsis cia Nws lub Koom Txoos mus deb ntawm txoj kev uas Nws pom zoo.
Muaj Chaw Rau Nej
Rau nej cov uas tau ncaim ntawm lub Koom Txoos mus, kuv hais rau nej, kuv cov phooj ywg zoo, hais tias muaj chaw rau nej nyob no.
Cia li los thiab muab nej tej txuj ci, tej txiaj ntsim thiab lub zog koom ua ke nrog peb li. Peb txhua tus yuav ua neeg zoo dua vim nej ua li ntawd.
Tej tug yuav nug hais tias, “Kuv tej kev ua xyem xyav nev?”
Tib neeg ib txwm muaj tej lus nug—ntau zaus lub txiv ntoo qheb ntawm kev ua siab ncaj nrhiav qhov tseeb tau loj hlob tuaj los ua ib tug ntoo qheb ntawm kev to taub. Cov mej zeej ntawm lub Koom Txoos feem coob tau muaj ob peb lub sij hawm thaum lawv xav xav txog tej lus nug tseem ceeb. Ib lub hom phiaj ntawm lub Koom Txoos yog kom tib neeg cog thiab tu ib lub noob ntawm txoj kev ntseeg—txawm yog yuav tsum cog lub noob ntawd nyob hauv cov av ntawm kev ua xyem xyav thiab tsis paub tseeb. Kev ntseeg yog kev cia siab rau tej yam uas peb tsis pom tiam sis muaj tseeb.7
$Yog li ntawd, kuv cov kwv tij thiab cov muam—kuv cov phooj ywg zoo—kuv thov nej, ua xyem xyav txog tej yam nej tsis paub tseeb ua ntej nej ua xyem xyav txog nej txoj kev ntseeg.8 Peb yeej yuav tsum tsis txhob cia peb tej kev ua xyem xyav ntes peb thiab cia peb tsis txais kev hlub, kev kaj siab lug, thiab tej txiaj ntsim uas los ntawm kev ntseeg tus Tswv Yexus Khetos.
Tej tug neeg yuav hais tias, “Kuv tsis sib haum nrog nej cov neeg nyob hauv lub Koom Txoos.”
Yog tias nej muaj peev xwm saib nyob hauv peb lub siab, tej zaum nej yuav paub tias nej sib haum nrog peb zoo dua li nej xav. Nej yuav xav tsis thoob hais tias peb muaj tej kev xav tau thiab tej kev nyuaj siab thiab kev cia siab zoo ib yam li nej. Tej zaum nej yuav xav tias nej lub neej dhau los yeej txawv ntawm Haiv Neeg Ntseeg feem ntau, tiam sis tej zaum qhov ntawd yog ib qho koob hmoov. Cov kwv tij thiab cov muam, cov phooj ywg, peb xav tau nej tej txuj ci thiab nej tej kev xav. Qhov uas muaj tib neeg sib txawv nyob thoob plaws lub ntiaj teb yog kev dag zog ntawm lub Koom Txoos no.
Tej zaum ib txhia yuav hais tias, “Kuv tsis xav tias kuv muaj peev xwm ua raws li nej tej kev cai.”
Ces cia li los xwb! Tus Tswv twb tsa lub Koom Txoos kom tu cov neeg tsis zoo tag nrho, cov nyuaj siab, thiab cov qaug zog. Muaj tib neeg uas xav xav ua raws li cov lus txib kawg siab kawg ntsws, txawm yog lawv tseem tsis tau ua li ntawd zoo tag nrho.
Ib txhia yuav hais tias, “Kuv paub ib tug mej zeej ntawm nej lub Koom Txoos uas siab dag. Kuv yeej yuav tsis koom ib lub koom txoos uas muaj ib tug zoo li no ua ib tug mej zeej..”
Yog tias nej xav tias tus neeg siab dag yog ib tug uas tsis ua raws nraim li nws ntseeg txhua lub sij hawm, ces peb txhua tus yog neeg siab dag. Tsis muaj leej twg uas zoo ib yam li Yexus Khetos zoo li peb paub peb yuav tsum ua. Tiam sis peb mob siab xav kov yeej peb tej kev ua yuam kev thiab tej kev xav ua txhaum. Peb xav ua zoo dua ntxiv kawg siab kawg ntsws nrog Yexus Khetos txoj Kev Theej Txhoj txoj kev pab.
Yog tias nej xav ua li no, ces txawm yog nej raug xwm txheej dab tsi, txawm nej zaj keeb kwm zoo li cas los, los sis nej zaj lus tim khawv muaj zog npaum li cas los, yeej muaj chaw nyob hauv lub Koom Txoos no. Los, koom nrog peb!
Los, Koom Nrog Peb!
Txawm peb ua yuam kev los, kuv paub tias nej yuav ntsib cov neeg zoo tshaj plaws nyob thoob plaws lub ntiaj teb no nyob hauv cov mej zeej ntawm lub Koom Txoos no. Yexus Khetos lub Koom Txoos yeej muaj cov neeg siab dawb siab zoo, siab ncaj thiab cov uas mob siab heev.
Yog nej xav tias nej yuav nrhiav tau tib neeg zoo tag nrho nyob no, nej yuav poob siab. Tiam sis yog nej nrhiav Khetos txoj lus qhuab qhia, Vajtswv txoj lus “uas kho neeg txoj kev nyuaj siab,”9 thiab tus Vaj Ntsuj Plig Dawb Huv txoj kev ua kom neeg dawb huv, ces nej yuav nrhiav tau tej ntawd nyob no. Nyob hauv lub caij nyoog uas tib neeg txoj kev ntseeg ploj zuj zus—nyob hauv lub caij nyoog uas tib neeg ntau xav tias lawv nyob deb ntawm lub ntuj ceeb tsheej—nej yuav nrhiav tau ib co neeg uas xav paub thiab xav nyob ze dua lawv tus Cawm Seej thiab xav ua hauj lwm pab Vajtswv thiab lawv cov neeg, ib yam li nej. Los, koom nrog peb!
Nej Yuav Tso Kuv Tseg Thiab Los?
Ua rau kuv nco txog ib lub sij hawm nyob hauv tus Cawm Seej lub neej thaum tib neeg coob tau tso Nws tseg.10 Yexus nug Nws kaum ob tug thwj tim tias:
“Nej yuav tso kuv tseg thiab los?
“Ximoos Petus teb Yexus hais tias, Tus tswv, yog peb tso koj tseg, peb yuav mus cuag leej twg? Koj tej lus pub tau txoj sia ib txhis rau neeg.”11
Muaj tej lub sij hawm thaum peb yuav tsum teb lo lus nug no. Peb puas yuav tso nws tseg thiab los? Los yog, zoo li Petus, peb puas yuav ua raws li cov lus ntawm txoj sia nyob mus ib txhis?
Yog nej nrhiav qhov tseeb, lub ntsiab, thiab ib txoj kev kom muab siab rau ntseeg; yog nej nrhiav ib qho chaw rau nej: Los, koom nrog peb!
Yog tias nej tau tso kev ntseeg tseg: Cia li rov qab los. Koom nrog peb!
Yog nej raug ntxias kom muab tso tseg: Cia li nyob ntev me ntsis ntxiv. Yeej muaj chaw rau nej nyob no.
Kuv thov kom nej txhua tus uas hnov los sis nyeem cov lus no: Los, koom nrog peb. Cia li los ua raws li Khetos uas muaj siab zoo txoj kev hu. Kwv nej tus ntoo khaub lig thiab nrog Nws mus.12
Los, koom nrog peb! Vim nyob no nej yuav nrhiav tau qhov uas muaj nqi tshaj txhua yam.
Kuv ua tim khawv hais tias nej yuav nrhiav tau tej lus ntawm txoj sia nyob mus ib txhis, kev cog lus tias yuav txais kev txhiv dim, thiab txoj kev kaj siab lug thiab kev zoo siab.
Kuv rau siab thov Vajtswv hais tias nej txoj kev nrhiav qhov tseeb yuav tshoov nej lub siab kom nej xav los thiab koom nrog peb. Los ntawm Yexus Khetos lub npe dawb ceev, amees.
© 2013 los ntawm Intellectual Reserve, Inc. Ceev txhua txoj cai. Luam tawm hauv Teb Chaws Amelikas. Pub txhais ua lus As Kiv : 6/13. Pub txhais ua lus Hmoob: 6/13. Kev txhais lus Visiting Teaching Message, November 2013. Hmong. 10671 295